- Details
- Published on Wednesday, 28 September 2011 12:12
သိုၵ်းမၢၼ်ႈဢၼ်မႃးပၵ်းတပ်ႉဝႆႉတီႈၵဵင်းတွင်း ဢွၼ်ၵၼ်လၵ်ႉပၢႆႈ ဢိၵ်ႇတင်းၽူႈမီးၸၼ်ႉ ၶဝ်လၢႆလၢႆၵေႃႉ ၼႆ။
မိူဝ်ႈဝၼ်းထိ 23/9/2011 ပူၼ်ႉမႃးတပ်ႉသိုၵ်းမၢၼ်ႈ 576 ဢၼ်မႃးပၵ်းဝႆႉတီႈ ၾၢႆႇဢွၵ်ႇ ဝၢၼ်ႈပႃႇသႃၵဵင်းတွင်း ဢွၼ်ၵၼ်လၵ်ႉပၢႆႈဢိၵ်ႇတင်းၽူႈမီးၸၼ်ႉ ၶဝ်လၢႆလၢႆၵေႃႉ ၼႆယဝ်ႉ။
ၵူၼ်းၼႂ်းပိုၼ်ႉတီႈလၢတ်ႈဝႃႈ “လွင်ႈတၢင်းပၼ်ႁႃမၼ်းသမ်ႉ 1 - ၵွပ်ႈၵမ်းၵမ်းၵႆႉပဵၼ်ပၢင်တိုၵ်းသေၵူၼ်းလူင်ၸၼ်ႉ ပႃႈၼိူဝ်ၸႂ်ႉဢွၵ်ႇသွၵ်ႈတဝ်တိၵ်း၊ 2 - မႃးယူႇတီႈၵဵင်းတွင်း 6 ပီၼႆႉလွင်ႈၸႂ်ႉလွင်ႈၸၢႆႇငိုၼ်းတွင်းၵေႃႈဢမ်ႇပေႃး မိူၼ်ၸႂ်၊ 3 - ငိုၼ်းလိူၼ်ၵေႃႈဢမ်ႇလႆႈ ၵမ်းလဵဝ် လႆႈၵႂႃႇထုၵ်ႈ ဢဝ်ပွၵ်ႈဢိတ်းပွၵ်ႈဢွတ်း၊ 4 -ဢမ်ႇၵျိူၵ်ႈလွင်ႈတဵၵ်း တဵင်လွင်ႈမိူၵ်ႈမႂ်ႈ တေႃႇၵူၼ်းမိူင်း။ ၵွပ်ႈလီမိူဝ်ႇလီၸၢၼ်ႈၸိူဝ်းၼႆႉသေ ၶဝ်ၸင်ႇၸူဝ်းၵၼ်ဢွၵ်ႇပၢႆႈ တိၵ်း တိၵ်း”ဝႃႈၼႆ ။
ၸိုဝ်ႈသိုၵ်းမၢၼ်ႈၸိူဝ်းဢွၼ်လၵ်ႉပၢႆႈၼၼ်ႉ 1 - ၵူဝ်ႇမွင်ႇထူၺ်း ဢႃယု 26 ပီ ၸၼ်ႉ သၢမ်မႆတပ်ႉ 576။ 2 - ၵူဝ်ႇတဵင်းလုၼ်ႇ ဢႃယု 39 ပီ ၸၼ်ႉၼိုင်ႈမႆတပ်ႉ 576။
လႅင်ႇၶၢဝ်ႇလၢတ်ႈဝႃႈ “လၵ်ႉပၢႆႈၶဝ်ႈမႃးၸွမ်းၵူၼ်းတႆးမႃးမိူင်းထႆး၊ ဢၼ်လႆႈႁူႉၸိုဝ်ႈ လီ လီၼႆႉမီး 2 ၵေႃႉ။ ဢၼ်ပၢႆႈ လႄႈဢမ်ႇႁူႉၸၵ်းၸိုဝ်ႈၵေႃႈမီးလၢႆၵေႃႉ၊ ၸူဝ်ႈသိုၵ်းတႆးၵႆႉမိူဝ်း ငွႆးယိုဝ်းၶဝ်ၼႆႉၵႆႉလၵ်ႉပၢႆႈၵႆႉႁၢႆ တၢႆၵေႃႈတၢႆ” ဝႃႈၼႆ ယဝ်ႉ။
မိူဝ်ႈဝၼ်းၶဝ်ႈဝႃႇၼႂ်းလိူၼ်ပႅတ်ႇပူၼ်ႉမႃးၼၼ်ႉသိုၵ်းမၢၼ်ႈတပ်ႉတႃႈၵုၼ် 579 ထုၵ်ႇသိုၵ်းတႆးႁဵတ်းသိုၵ်းမူၵ်းယိုဝ်း တၢႆပႅတ်ႈ 2 ၵေႃႉတီႈပႃႇႁဵဝ်ႈၵုၼ်မူင်ႈ။ မိူဝ်ႈလိူၼ်ၵဝ်ႈလွင်ႈသမ်ႉ မိူဝ်းယိုဝ်းတီႈတပ်ႉပႃႇသႃ 576 ထႅင်ႈသိုၵ်းမၢၼ်ႈပႂ်ႉ ယၢမ်းဝၢတ်ႇၼိုင်ႈၵေႃႉ၊ တပ်ႉတီႈယူႇၵဝ်ႇ သိုၵ်းမၢၼ်ႈၵွႆမူတ်း ဝႃႈၼႆ ။
လႅင်ႇၶၢဝ်ႇလၢတ်ႈဝႃႈ ၼွၵ်ႈသေၼၼ်ႉ သိုၵ်းမၢၼ်ႈဢၼ်တေပၢႆႈထႅင်ႈမီးတင်းၼမ် ၵမ်ႈၽွင်ႈ တိုၵ်ႉၵႂႃႇထုၵ်ႈငိုၼ်းဝႆႉ ပေႃးဢွၵ်ႇဝႃႇၼႆႉ လႅပ်ႈတေပၢႆႈၶဝ်ႈတင်းမိူင်းထႆးထႅင်ႈ ဝႃႈၼႆယဝ်ႉ။
