- Details
- Published on Tuesday, 27 September 2011 13:15
မုၼ် 2 ၸဝ်ႈတူၼ်(ပႃး) ၸုတ်ႇၾႆးၽဝ်တူဝ်ၵဝ်ႇ ပိူဝ်ႈတႃႇၼႄၵၢင်ၸႂ်သၢၼ်ၶၢတ်း လူင်ပွင်ၸိုင်ႈ မိူင်းၶႄႇဢၼ်ၵုမ်း ထိင်း လွင်ႈတူင်ႉၼိုင် ႁဵတ်းသၢင်ႈၸွမ်းၼင်ႇ လွင်ႈၵိူဝ်းယမ် ၸၢဝ်းပုတ်ႉ ဢၼ်ယၢပ်ႇယၢၵ်ႈၵိၼ်းလႄႈတုၵ်းယွၼ်း ႁႂ်ႈ မီးလွင်ႈလွတ်ႈလႅဝ်းတင်းၽၢႆႇသႃႇသႃၼႃႇ ၼႆ။
ၸုမ်းလွတ်ႈလႅဝ်းထိပဵတ်ႊ (Free Tibet) ဢၼ်မီးလုမ်းပွင်ၵၢၼ်ယႂ်ႇတီႈ ဝဵင်းလူင်လွၼ်ႊတွၼ်ႊ ၸိုင်ႈမိူင်းဢင်း ၵိတ်ႉ လၢႆးငၢၼ်းမိူဝ်ႈဝၼ်းထိ 26.09.2011 ဝႃႈ မီးမုၼ်ၸဝ်ႈ သင်ၶ ထိပဵတ်ႊ 2 တူၼ်ၸိုဝ်ႈႁွင်ႉ လွပ်ႊသင်ႊ ၶဵဝ်းလ်သင်ႊ လႄႈ လွပ်ႊသင်ႊ ၶွၼ်ႊၶျွၵ်ႊ ဢႃႇယု မွၵ်ႈ 18-19 ပီ၊ တင်းသွင်တူၼ်ဢဝ်ၾႆးၽဝ်တူဝ်ၵဝ်ႇတီႈဝတ်ႉ (ၵျွင်း) ၶိူဝ်းတိ ၼႂ်းမိူင်း ဢႃႊပႃႊ ၸေႈမိူင်း သေႊၶျူၼ်ႊ ၼႂ်းမိူင်းၶႄႇ မိူဝ်ႈဝၼ်းထိ 26.09. ပူၼ်ႉမႃးပိူဝ်ႈတႃႇၼေ ၵၢင်ၸႂ်သၢၼ်ၶတ်း လူင်ပွင်ၸိုင်ႈမိူင်းၶႄႇ ဢၼ်ၵုမ်းထိင်း လွင်ႈတူင်ႉၼိုင် ႁဵတ်းသၢင်ႈၸွမ်း လွင်ႈၵိူဝ်းယမ်ၸၢဝ်း ပုတ်ႉ ဢၼ်ၵိၼ်းတုၵ်ႉယုၵ်ႈ လႄႈ တုၵ်းယွၼ်းႁႂ်ႈမီးလွင်ႈလွတ်ႈလႅဝ်း ၽၢႆႇသႃႇသႃၼႃႇ ဝႃႈၼႆယဝ်ႉ။
သင်ၶၸဝ်ႈတင်းသွင်တူၼ်ၼၼ်ႉ ထုၵ်ႇသူင်ႇတူဝ်ၵႂႃႇယႃတီႈႁူင်းယႃ လႄႈ ၸုမ်းၶၢဝ်ႇ သျိင်းႁူဝ်ႊ (Xin Hua) ၶွင် မိူင်းၶႄႇ လၢႆးငၢၼ်းဝႃႈ တင်းသွင်တူၼ်လွတ်ႈၽေးယဝ်ႉ ဝႃႈၼႆ။
မိူဝ်ႈဝၼ်းထိ 16.03.2011 ပူၼ်ႉမႃး ၸဝ်ႈမုၼ်တူၼ်ၸိုဝ်ႈႁွင်ႉ လွပ်ႉသင်း ၶဵဝ်းလ်သင်း ပဵၼ်ၼွင်ႉၸၢႆးၸဝ်ႈမုၼ် ထိပဵတ်ႊ ၸိုဝ်ႈႁွင်ႉ ၽုၼ်းၶျွၵ်ႊ ဢႃႇယု 21 ပီ သၢၼ်ၶၢတ်းၼေၵၢင်ၸႂ်ၶႄႇလူၺ်ႈဢဝ်ၾႆးၸုတ်ႇၽဝ်တူဝ်ၵဝ်ႇထိုင် ပေႃးတၢႆ ဝႃႈၼႆ။
ၼႂ်းဝၼ်းလဵဝ်ၵၼ် ၽူႈၶၢၼ်ပၢၵ်ႇၽွင်းလူင်ၽၢႆႇၼွၵ်ႈမိူင်းၶႄႇ လၢတ်ႈဝႃႈ ၸဝ်ႈတႃႊလႆးလႃမႃႉ ၽူႈဢွၼ်ႁူဝ်တီႈ ၵိူဝ်းယမ်ၶွင်ၸၢဝ်းထိပဵတ်ႊ မိူဝ်ႈလဵဝ် ဢမ်ႇမီးတၢင်းလိူၵ်ႈ တေမႃးပဵၼ်ၸဝ်ႈ တႃႊလႆးလႃမႃႉ ထႅင်ႈၸဝ်ႈၼိုင်ႈ။ ၵွပ်ႈဝႃႈ လူင်ပွင်ၸိုင်ႈမိူင်းၶႄႇ တေပဵၼ်ၵူၼ်းလိူၵ်ႈၵူၺ်း ဝႃႈၼႆ။
ဝၢႆးၼၼ်ႉမိူဝ်းဝၼ်းထိ 24.09.2011 ပူၼ်ႉမႃး တႃႊလႆးလႃမႃႉ လၢတ်ႈဝႃႈ သင်မၼ်းၸဝ်ႈတေ တၢႆၵိူတ်ႇမႂ်ႇၸိုင် မၼ်းၸဝ်ႈတေတႅမ်ႈလူင်းၵႂၢမ်းသင်ႇ ဢၼ်မီးလၵ်ႊထၢၼ်ႊ (သၢၵ်ႈသေႇ) ၵဵဝ်ႇလူၺ်ႈ လွင်ႈႁဵတ်းသၢင်ႈၸိူဝ်းၼႆႉ ဝႃႈၼႆယဝ်ႉ။
