- Details
- Published on Wednesday, 30 March 2011 20:55
ယွၼ်ႉဢိင်ႇသၼ်ႇ(ၽႅၼ်ႇလိၼ်ဝႆ) မိူဝ်ႈဝၼ်းထိ 24-25/03/2011 ပူၼ်ႉမႃးၼႆႉသေ ၵူၼ်းမိူင်း၊ ႁိူၼ်း ယေး လႄႈဝတ်ႉဝႃး သွင်ၽၢၵ်ႇၶၢင်ႈတၢင်းၵႃး ပွတ်းၸိူဝ်းတႃႈလိူဝ်ႇ ၸိုင်ႈတႆးပွတ်းဢွၵ်ႇ လူႉသုမ်းၼမ်၊ထိုင် မိူဝ်ႈလဵဝ်ၵေႃႈယင်းတိုၵ်ႉဝႆယူႇၶႂ်ႈၵူႈဝၼ်း၊ တီႈဢေႇသုတ်း ၼိုင်ႈဝၼ်းၼို်င်ႈပွၵ်ႈ၊ မိူဝ်ႈၼႆႉၵၢင်ၼႂ်ၸဝ်ႉၶၢဝ်း ယၢမ်းမွၵ်ႈ 2:45 ၼႃးထီးဝႆထႅင်ႈၵမ်းၼို်င်ႈ ၵူၺ်းဢမ်ႇပေႃးႁိုင်ၼႆ။
လွင်ႈၽႅၼ်ႇလိၼ်ဝႆပွတ်းတွၼ်ႈတႃႈလိူဝ်ႇ၊ မိူင်းလဵၼ်း၊ ၼႃးယၢဝ်း ၸိူဝ်းၼႆႉ တင်ႈတႄႇမိူဝ်ႈဝၼ်းထီႉ 24-30/3/2011 ၼႆႉမႃးၵူၼ်းတၢႆၶႂ်ႈမီးၸမ်မွၵ်ႈသွင်ပၢၵ်ႇ(200) ၵေႃႉ၊ ဝတ်ႉဝႃးၽႃသိူဝ်ႇ ၸိူဝ်းၵူၼ်ႇပင်းလူႉၵွႆ လႄႈၸိူဝ်းတႅၵ်ႇၸတ်ႉၸိူဝ်းၼႆႉမီးၸမ်မွၵ်ႈ 20-30 ဝတ်ႉ၊ ႁိူၼ်းယေးၸိူဝ်းၵူၼ်ႇပင်းလႄႈ လူႉသုမ်းၼႂ်း မိူင်း လဵၼ်း၊ တႃႈလိူဝ်ႇ၊ ၼႃးယၢဝ်းၸိူဝ်းၼႆႉ ၶႂ်ႈဝႃႈ သၢမ်ပုၼ်ႈၼႆႉ လူႉသုမ်းၵွႆသွင်ပုၼ်ႈ ယဝ်ႉၼႆ။
ၸဝ်ႈၸၢင်းၼႂ်းပိုၼ်ႉတီႈတူၼ်(ပႃး)ၼိုင်ႈလၢတ်ႈဝႃႈ “တေႃႇထိုင်မိူဝ်ႈလဵဝ်ၵေႃႈ ယင်းဢမ်ႇမီးၽႂ်ႁတ်းၼွၼ်း တီႈႁိူၼ်း။ ၶဝ်ၵူၺ်းၼွၼ်းၸွမ်းၽင်ႇတၢင်းလႄႈ ၼွၼ်းၸွမ်းႁူမ်ႈမႆႉၸိူဝ်းၼႆႉၵူၺ်း။ မၢင်ၸိူဝ်းၵေႃႈဢွၼ် ၵၼ်ပၢႆႈမႃးႁႃပီႈႁႃၼွင်ႉၶဝ် ပွတ်းၸိူဝ်းမႄႈသၢႆ၊ တႃႈၶီႈလဵၵ်းၸိူဝ်းၼႆႉ” ဝႃႈၼႆ။ ၵူၼ်းၵႃႉၵုၼ်ႇၶၢႆၶူဝ်း ၸိူဝ်းပဵၼ်ၶႄႇ၊ တႆး၊ ၵလႃး ၸိူဝ်းယူႇပွတ်းတႃႈၶီႈလဵၵ်း မႄႈသၢႆ ဢွၼ်ၵၼ်ၵႂႃႇၸွႆႈလိူဝ် ယူႇ ၼႆယဝ်ႉ။
မၢင်ၸိူဝ်းၶႂ်ႈၸွႆႈလိူဝ်လႄႈၵႂႃႇၽၢၵ်ႇဝႆႉတီႈ ၸဝ်ႈၼႃႈတီႈၽၢႆႇမၢၼ်ႈၶဝ်ၼၼ်ႉဢမ်ႇမိူၼ်ၵၢင်ၸႂ် ၶဝ်ၶႂ်ႈၸွႆႈလႄႈ ဝၢႆးမႃးဢွၼ်ၵၼ်တိတ်းတေႃႇ ၸွမ်းဝတ်ႉသေ သူင်ႇၽၢၼ်ႇၵႂႃႇတၢင်းဝတ်ႉမုၼ်ၸဝ်ႈ။ သင်ႇၶႃႇၶဝ်ၸဝ်ႈလႆႈ ၸွႆႈ ဢဝ်ၵႂႃႇၸႅၵ်ႇပၼ်ၼႂ်းမိုဝ်းၵူၼ်းထူပ်းၽေးၵမ်းသိုဝ်ႈ ၼႆ။
လွင်ႈ ၽေးသၽႃႇဝပွၵ်ႈၼႆႉ ၽၢႆႇၸဝ်ႈၼႃႈတီႈမၢၼ်ႈၵေႃႈ ၸွႆႈလိူဝ်ယူႇ၊ ၵူၺ်းၵႃႈပဵၼ်လွင်ႈယူတ်းယႃလႄႈ ယႃႈယႃၸိူဝ်းၼႆႉၵူၺ်း။ တၢင်ႇၸိူဝ်ႉတၢင်ႇလွင်ႈတႄႉ ဢမ်ႇၸွႆႈလိူဝ်သင်ထႅင်ႈ၊ တေႃႈၼင်ႇယႃႈယႃ ဢၼ်ၶဝ် ၸွႆႈယင်းဢမ်ႇၵုမ်ႇထူၼ်ႈတႃႇၵူၼ်းမၢတ်ႇၸဵပ်း ၸိူဝ်းတိုၵ်ႉလူဝ်ႇယူတ်းယႃ ၼႆယဝ်ႉ။
ၢင်ၸိူဝ်းမီးၼမ်ႉၸႂ် ၶႂ်ႈၸွႆႈသေတႃႉ ၵွပ်ႈလႆႈၽၢၼ်ႇတၢင်းၸဝ်ႈၼႃႈတီႈ သိုၵ်းမၢၼ်ႈၵွၼ်ႇလႄႈ လႆႈၶတ်းၸႂ် ႁႃတၢင်းတႃႇၸွႆႈလိူဝ်ၵူၼ်းထူပ်းၽေး ႁႂ်ႈပေႃးလႆႈ ၸွမ်းၼင်ႇလွၵ်းၽႂ် လၢႆးမၼ်းၵူၺ်း ၼႆယဝ်ႉ။လွမ်ငိၼ်း ၶၢဝ်ႇပႆႇယိုၼ်ယၼ်လႆႈဝႃႈ ထႅင်ႈသွင်သၢမ်ဝၼ်း ပီႈၼွင်ႉတႆး ပွတ်းၸိူဝ်းၵဵင်းမႆႇ၊ ၵဵင်းႁၢႆး လႄႈမႄႈသၢႆၸိူဝ်း ၼႆႉတေၵႂႃႇၸွႆႈလိူဝ်ထႅင်ႈတင်းၼမ် ဝႃႈၼႆယဝ်ႉ။
