- Details
- Published on Wednesday, 25 August 2010 17:34
ၽွင်းမိူဝ်ႈလဵဝ်ၼႆႉ ဢမ်ႇဝႃႈၶၢဝ်ႇပၢင်မၢၵ်ႇၼင်လႄႈသင် ၶၢဝ်ႇပၢင်သိုဝ်ႉတူဝ်ၽူႈလဵၼ်ႈလႄႈသင်ၸုမ်းဢၼ်ထုၵ်ႇ လၢတ်ႈထိုင်တၢင်းၼမ်ၼၼ်ႉ ဢမ်ႇလွတ်ႈၸုမ်းႁိူဝ်းဝႂ်သီၾႃႉ Manchester City ၼၼ်ႉယဝ်ႉ။
ဢိင်ၼိူဝ်ယွၼ်ႉလူၺ်ႈလွင်ႈဢၼ်ပဵၼ်ၸုမ်းဢၼ်မၢၵ်ႈမီးၼမ်လိူဝ်သေပိူၼ်ႈၼႂ်းမိူင်း England လႄႈ ၶၢဝ်ႇငၢဝ်း ဢၼ်လၢတ်ႈထိုင်ၼမ်ၶွင် မႅၼ်ႊၶျဵတ်ႊတိူဝ်ႊ သိတိ ၼၼ်ႉ ပဵၼ်ၵၢၼ်ၸႂ်ႉငိုၼ်းသေသိုဝ်ႉတူဝ်ၽူႈလဵၼ်ႈ မႃးႁူမ်ႈ ၸုမ်းၼၼ်ႉယဝ်ႉ။ ၼႂ်းၽွင်းယၢမ်းလဵဝ်ၸုမ်း မႅၼ်ႇသိတိၵေႃႈလႆႈၸႂ်ႉငိုၼ်းၼမ်သေ 100 လၢၼ်ႉပွၼ်ႊၶိုၼ်ႈၼိူဝ် တွၼ်ႈတႃႇၸုင်ၸၼ်ဢဝ်ၽူႈလဵၼ်ႈၸိုဝ်ႈလင် မႃးႁူမ်ႈၸုမ်းၼၼ်ႉ ၼႆယဝ်ႉ။
ၼႂ်းၽူႈလဵၼ်ႈၸိူဝ်းဢၼ်လႆႈသိုဝ်ႉမႃးမႂ်ႇၼၼ်ႉၵေႃႈ ပဵၼ် Aleksandar Kolarov, Jerome Boateng, Yaya
Toure, David Silva, Mario Baloteli လႄႈ James Milner ၼႆယူႇ။ ဢိင်ၼိူဝ် ၼႂ်းၶၢဝ်းတၢင်းသွင်ပီပူၼ်ႉမႃး
ၼႆႉ မႅၼ်ႊၶျဵတ်ႊတိူဝ်ႊ သိတိ ၸႂ်ႉငိုၼ်းလူင်းတိုၼ်းဢမ်ႇယွမ်း 320 လၢၼ်ႉပွၼ်ႊ ၼႂ်းၵၢၼ်သိုဝ်ႉတူဝ် ၽူႈလဵၼ်ႈ မၢၵ်ႇၼၢင်ၸိုဝ်ႈလင် မႃးႁူမ်ႈၸုမ်းလႄႈ ၸင်ႇႁဵတ်းႁႂ်ႈလၢႆၽၢႆႇႁၼ်ထိုင်ဝႃႈ ၸုမ်းမႅၼ်ႊၶျဵတ်ႊတိူဝ်ႊ သိတိ ပဵၼ်ၸုမ်း ၼိုင်ႈဢၼ် ယိူင်းဢၢၼ်းႁႂ်ႈလႆႈသျႅမ်ႇလူၺ်ႈၵၢၼ်ၸႂ်ႉမဵတ်ႉငိုၼ်းတၢင်းၼမ် ၼႆယူႇ။
ဢိင်ၼိူဝ်လွင်ႈၸိူဝ်းၼႆႉသေ ၽူႈၸတ်းၵၢၼ်လၢႆလၢႆၸုမ်းဢိၵ်ႇပႃး ၽူႈလဵၼ်ႈလၢႆၵေႃႉဢၼ်ၶိုၵ်ႉၶႅမ်ႉမၼ်းၵေႃႈလႆႈ ၶၢမ်ႇပၼ်တၢင်းႁၼ်ထိုင်ဝႃႈ မိူၼ်ၸႂ်ႉငိုၼ်းသိုဝ်ႉဢဝ်ယိူင်းမၢႆဝႆႉ။ ၵူၺ်းပုၼ်ႈတႃႇၶေႃႈတွပ်ႇၼိူဝ်လွၵ်းပိူင်ဢၼ် မႅၼ်ႊ ၶျဵတ်ႊတိူဝ်ႊ သိတိ လႆႈႁဵတ်းသၢင်ႈလႄႈယဵၼ်းဢၢၼ်းဝႆႉၼၼ်ႉ တေဢွၵ်ႇမႃးၸိူင်ႉႁိုဝ်ၼႆၸိုင် ပၢင်မၢၵ်ႇၼင် Premier League 2010 - 2011 ၼႆႉတေတွပ်ႇပၼ်လႆႈယူႇ။
