- Details
- Published on Tuesday, 06 September 2011 11:50
Wikileaks ဢွၵ်ႇၼႄဝႃႈ သိုၵ်းမၢၼ်ႈသူင်ႇၶဝ်ႈသၢၼ်ၸူးမိူင်း ၵူဝ်ႊရီႊယိူဝ်ႊႁွင်ႇ ၼိုင်ႈပီ ဢမ်ႇယွမ်း 20,000 တၼ်ႊ တႃႇလႅၵ်ႈမၢၵ်ႇၵွင်ႈၸိုၼ်းယၢမ်း ႁူမ်ႈထိုင်ၶိူင်ႈမိုဝ်းတႃႇ သၢင်ႈႁူင်း ၼိူဝ်ႊၶရီႊယႃႊ ၼႆ။
မိူဝ်ႈဝၼ်းထိ 5/09/11 တၢင်းဝႅပ်ႉ Wikileaks (ဢၼ်ပဵၼ်ဝႅပ်ႉပိုၼ်ၽႄႈၶေႃႈမုၼ်း လပ်ႉလူင် ပွင်ၸိုင်ႈၵူႈမိူင်းမိူင်း) ၼၼ်ႉ ဢဝ်ၶေႃႈမုၼ်းဢၼ်လႆႈမႃးတီႈ ၽွင်းလူင်ၽၢႆႇၼွင်ႈမိူင်း မိူင်းမၢၼ်ႈ သေ ပိုၼ်ၶၢဝ်ႇဝႃႈ မိူဝ်ႈပူၼ်ႉမႃးၼၼ်ႉ လူင်ပွင်ၸိုင်ႈမၢၼ်ႈလႄႈလူင်ပွင်ၸိုင်ႈမိူင်း ၵူဝ်ႊရီႊယိူဝ်ႊ ႁွင်ႇ လႆႈၸႂ်ၵၼ်လႅၵ်ႈလၢႆႈတၢင်းၵိၼ်လႄႈမၢၵ်ႇၵွင်ႈၸိုၼ်းယၢမ်း၊ မိူင်းမၢၼ်ႈ လႆႈၸႂ်တေႃႉသူင်ႇ ၶဝ်ႈသၢၼ်ၼိုင်ႈပီဢမ်ႇယွမ်း 20,000 တၢၼ်ႊ တႃႇလႅၵ်ႈဢဝ်မၢၵ်ႇၵွင်ႈၸိုၼ်းယၢမ်း လႄႈ ၸၢင်ႈႁူမ်ႈ ပႃးၶိူင်ႈၵမ်ႉၵႅမ်တႃႇသၢင်ႈႁူင်းၼိဝ်ႊၶရီႊယႃႊ ၼႆယဝ်ႉ။
ၶေႃႈမုၼ်းဢၼ်လႆႈမႃးၼႆႉ ပဵၼ်ၶေႃႈလႆႈၸႂ်ဢၼ်လႆႈႁဵတ်းဝႆႉၼႂ်းပီ 2009 လႄႈ ၶေႃႈမုၼ်းၼႆႉ ယင်းမႅၼ်ႈၸွမ်း ၽိုၼ်လၢႆးငၢၼ်း ၶွင် UN ၼႂ်းပီ 2010 ဢၼ်ပိုၼ်ၽၢဝ်ႇဝႃႈ သိုၵ်းမၢၼ်ႈလႆႈႁပ်ႉ တၢင်းၸွႆႈလိူဝ် တႃႇသၢင်ႈႁူင်း ၼိဝ်ႊၶရီႊယႃႊ ဢၼ်ဢဝ်ၶိူင်ႈၵမ်ႉၵႅမ်တီႈမိူင်း ၵူဝ်ႊရီႊယိူဝ်ႊႁွင်ႇ ၊ ဢီႊရၢၼ်ႊ လႄႈသီႊလီႊယႃႊ။ ၵူၺ်းၽၢႆႇသိုၵ်းမၢၼ်ႈ ပိုၼ်ၽၢဝ်ႇဢမ်ႇယွမ်းႁပ်ႉ မႃးတႃႇသေႇ ဝႃႈၼႆ။
ဝႅပ်ႉ wikileak ၼႆႉပဵၼ်ဝႅပ်ႉၸိုဝ်ႈလင် ဢၼ်ဢဝ်ၶေႃႈမုၼ်းလပ်ႉ ဢမ်ႇၼၼ် ၽိုၼ်လိၵ်ႈလပ်ႉ ဢၼ်လႆႈမႃးတီႈ လူင်ပွင်ၸိုင်ႈၵူႈမိူင်းမိူင်းသေ ဢွၵ်ႇပိုၼ်ၽႄႈ ယိူင်းဢၢၼ်းတႃႇႁႂ်ႈလူင်ပွင်ႈၸိုင်ႈ ဢမ်ႇမီးသင်လပ်ႉတေႃႇၵူၼ်းမိူင်း ဝႃႈၼႆယဝ်ႉ။
