ဝွၵ်းသွၼ်ႈၸႂ်
ၶိမ်းၸွင်းဢိဝ်းလ် လွမ်ၵူဝ်ထုၵ်ႇ ယိုဝ်းတူၵ်းဢမ်ႇႁတ်းၶီႇၶိူင်ႈမိၼ်
- Details
- Written by သႅင်ႁၢၼ်
ႁူမ်ႇလူမ်ႈၵဝ်ႇ ဢၼ်ယၢမ်ႈဢဝ်ႁူမ်ႇလူမ်ႈပၼ်ၶိမ်းၸွင်းဢိဝ်းလ် ၽူႈၼမ်းႁူဝ်ၵူဝ်ႊရီးယိူဝ်ႊႁွင်ႇ လၢတ်ႈဝႃႈ ၶိမ်းၸွင်းဢိဝ်းလ် ဢမ်ႇယၢမ်ႈၶီႇၶိူင်ႈမိၼ် ယွၼ်ႉၵူဝ်ၽူႈၶဵၼ်ယိုဝ်းတူၵ်း ၼႆ။
လီး-ယွင်းၵုၵ်ႉ ႁူမ်ႇလူမ်ႈၵဝ်ႇ ၵေႃႉၸမ်ၸႂ်ၶိမ်းၸွင်းဢိဝ်းလ်သုတ်း ၶျႃႉလႅင်းပၢႆႈၶဝ်ႈ မိူင်းၵူဝ်ႊရီးယိူဝ်ႊၸၢၼ်း မိူဝ်ႈပီ1980 (10 ပီပူၼ်ႉမႃး) လၢတ်ႈဝႃႈ ၶိမ်းၸွင်းဢိဝ်းလ်လိူၵ်ႈတီႈတေဢွၵ်ႇတၢင်းလူၺ်ႈလူတ်ႉၾႆး ဢၼ်တေ ၵႂႃႇသူႇၸႂ်းတၢင်ႇမိူင်း လႄႈ တေၸႂ်ႉလူတ်ႉ/ႁိူဝ်း ၼႂ်းၵၢၼ်တေႃႉသူင်ႇၼႂ်းၸိုင်ႈမိူင်း လႄႈ ဢမ်ႇယၢမ်ႈဝူၼ်ႉတေ လၢႆႈၸႂ်ၵႂႃႇၶီႇၶိူင်ႈမိၼ် ယွၼ်ႉမၼ်းၸဝ်ႈႁူႉလွင်ႈၽေးၶဵၼ်မၼ်းလီ ၼႆယဝ်ႉ။
ၵူၼ်းတင်းၼမ်ယုမ်ႇယမ်ဝႃႈ ၶိမ်းၸွင်းဢိဝ်းလ် ပဵၼ်ၽူႈပွင်ၵၢၼ်ၵၢၼ်လပ်ႉ လွင်ႈမၢၵ်ႇတႅၵ်ႇၼႂ်းႁိူဝ်းမိၼ်ဢၼ် တေႃႉသူင်ႇၵူၼ်းမိူင်းၵူဝ်ႊရီးယိူဝ်ႊၸၢၼ်း မိူဝ်ႈပီ 1993 သေႁဵတ်းႁႂ်ႈ ၵူၼ်းမိူင်းတၢႆ ထိုင် 115 ၵေႃႉၼႆလႄႈမၼ်း ၸင်ႇႁူႉထိုင် ၽေးၶဵၼ်ဢၼ်တေၸၢင်ႈပဵၼ်မႃး သင်ဝႃႈ ဢွၵ်ႇတၢင်းလူၺ်ႈၶိူင်ႈမိၼ် ၼႆယဝ်ႉ။
ၵူၺ်းၵႃႈ သင်ဝႃႈဢွၵ်ႇတၢင်းလူၺ်ႈ ၵၢၼ်တေႃႉသူင်ႇတၢင်းလိၼ် ဢမ်ႇၼၼ်တၢင်းၼမ်ႉၸိုင်တေ ၸၢင်ႈၸႂ်ႉ ၽႅၼ်လွၵ်ႇၸုမ်းၶၢဝ်ႇ ၵွင်းၼွၵ်ႈမိူင်းလႆႈ ဝႃႈၼႆ။
ႁူမ်ႇလူမ်ႈၵဝ်ႇၶွင် ၶိမ်းၸွင်းဢိဝ်းလ် သိုပ်ႇလၢတ်ႈဝႃႈ တီႈႁဵတ်းၵၢၼ်ၶိမ်းၸွင်းဢိဝ်းလ် မိူၼ်တပ်ႉၶၢမ်ႇ၊ မီးႁူဝ်ႉ ဢုတ်ႇၼႃ 80 သိၼ်ႊတီႊမီႊတူဝ်ႊ လႄႈမီးၽၵ်းတူ ဢၼ်ၸၢင်ႈၶၢမ်ႇႁႅင်း မၢၵ်ႇလူင်ၵႃးတႅင်ႉလႆႈ ဝႃႈၼႆယဝ်ႉ။
