ဝွၵ်းသွၼ်ႈၸႂ်

ယိင်းဢွၵ်ႉသတေႊရီႊယႃႊ ၽၢႆႈႁိူဝ်းၸမ်ႁွပ်ႈၵမ်ႇၾႃႇ

ၸျဵတ်ႊသီႊၵႃႊ ဝတ်ႊသၼ်ႊ ၼိင်းယိင်းၼုမ်ႇၸၢဝ်းဢွတ်ႉသတေႊရီႊယႃႊ ဢႃႇယု 16 ပီၸမ်လႆႈၸိုဝ်ႈဝႃႈပဵၼ် ၵူၼ်းၽၢႆႈႁိူဝ်းႁွပ်ႈၵမ်ႇၾႃႇ ဢၼ်ဢႃႇယုလဵၵ်ႉသုတ်း ၼႂ်းဝၼ်းထိ 15-16 လိူၼ်မေႊၼႆႉ ၼႆ။

သိုဝ်ႇၶၢဝ်ႇၼွၵ်ႈမိူင်းလၢႆးငၢၼ်းမိူဝ်ႈဝၼ်းထိ 03/05/10 ပူၼ်ႉမႃးဝႃႈ ၸျဵတ်ႊသီႊၵႃႊ ဝတ်ႊသၼ်ႊ ယိင်းၸၢဝ်း ဢွတ်ႉသတေႊရီႊယႃႊ ဢႃႇယု 16 ပီ ၸမ်တေဢွင်ႇမႅင်ႇၼႂ်းၵၢၼ်ႁေႃႈႁိူဝ်းဝႂ် (sailboat) ႁွပ်ႈလုမ်ႈၾႃႉၵေႃႉ လဵဝ်လူၺ်ႈၵၢၼ်ဢမ်ႇၵိုတ်းယင်ႉတီႈလႂ် တႃႇတႅမ်ႈပိုၼ်းမႂ်ႇပဵၼ်ၽူႈၽၢႆႈႁိူဝ်းဝႂ်ဢႃႇယုလဵၵ်ႉသုတ်းၼႂ်းလုမ်ႈၾႃႉ ၼႆယူႇ။

မၼ်းၼၢင်းတႄႇၽၢႆႈႁိူဝ်းဝႂ်ၼႂ်းဝၼ်းထိ 10/10/2009၊ တေႃႇထိုင်ယၢမ်းလဵဝ် မၼ်းၼၢင်းလႆႈၽၢႆႈၵႂႃႇယဝ်ႉ ႁူမ်ႈ တၢင်းၵၢႆမွၵ်ႈ 20,000 မၢႆႊၶွင်ၼႂ်းၵႃႈတၢင်းသဵင်ႈ 23,000 မၢႆႊဢမ်ႇၼၼ် 38,000ၵီႊလူဝ်ႊ။ ထင်ႇထိူမ်ဝႃႈမၼ်း ၼၢင်းတေႁွတ်ႈၽႅဝ်တီႈယဵင်းမၢႆလႆႈၼႂ်းဝၼ်းထိ 15-16 လိူၼ်မေႊၼႆႉ လႄႈ တေလႆႈၸိုဝ်ႈဝႃႈပဵၼ်ၽူႈၽၢႆႈႁိူဝ်း ဝႂ်ႁွပ်ႈၵမ်ႇၽႃႇ ဢၼ်ဢႃႇယုလဵၵ်ႉသုတ်းၼႂ်းလုမ်ႈၾႃႉ တႅတ်းတီႈ မႃႊတိၼ်ႊ ၼုမ်ႇၸၢႆးၸၢဝ်းဢွတ်ႇသတေႊရီႊ ယႃႊ ဢႃႇယု 18 ပီ ၵေႃႉဢၼ်ယၢမ်ႈၽၢႆႈႁိူဝ်းႁွပ်ႈၵမ်ႇၾႃႇၼႂ်းပီ 2001 ၼၼ်ႉ ၼႆယူႇ။