ဝွၵ်းသွၼ်ႈၸႂ်

သိုၵ်းမၢၼ်ႈၸပ်းယိၼ်ႉယႃႈမႃႉ တဵၵ်းယွၼ်း ငိုၼ်းၶွၼ်ႇလူတ်ႉၵူၼ်းမိူင်းၵႂႃႇမႃး

မိူဝ်ႈဝူင်ႈပူၼ်ႉမႃးသိုၵ်းမၢၼ်ႈပႂ်ႉ ႁႄႉ လူတ်ႉၶိူင်ႈၵႃးပိူၼ်ႈ တီႈၼႂ်းၵႄႈၵၢင်ဝၢၼ်ႈထမ်ႈ လႄႈ ၼွင်တဝ်ႇ ဝဵင်းမိူင်းပၼ်ႇ ၸွမ်းသၢႆသဵၼ်ႈတၢင်း ၶူဝ်တႃႈသၢင်း ၵူတ်ႇသွၵ်ႈထူၵ်းၶူဝ်းလဵင်းၵူၼ်းၸိူဝ်းၶီႇၵႃးၵူႈၵေႃႉ ယဝ်ႉတဵင်းယွၼ်းငိုၼ်းၼႆ။

မိူဝ်ႈဝၼ်းထိ 20/9/ 2011 ပူၼ်ႉမႃး ပႃးၼၢင်းလိုၼ်း(ၸိုဝ်ႈပွမ်)ၵေႃႉၼိုင်ႈ ၵူၼ်းမိူင်းၵဵင်းတွင်း ဢၼ်လႆႈထုၵ်ႇ သိုၵ်းမၢၼ်ႈ (ဢမ်ႇတွင်းမၢႆတပ်ႉ) ၽူႈမီးၸၼ်ႉ သၢမ်မၢႆ( ဢမ်ႇႁူႉၸၵ်းၸိုဝ်ႈ) ပႂ်ႉႁႄႉ လူတ်ႉၶိူင်ႈပိူၼ်ႈၵႃးပိူၼ်ႈ တီႈၼႂ်းၵႄႈၵၢင်ဝၢၼ်ႈထမ်ႈ လႄႈ ၼွင်တဝ်ႇၾၢႆႇဢွၵ်ႇဝဵင်းမိူင်းပၼ်ႇ ၸွမ်းသၢႆသဵၼ်ႈတၢင်းၶူဝ်တႃႈသၢင်း။ ၵူတ်ႇ သွၵ်ႈထူၵ်း ၶူဝ်းလဵင်းၵူၼ်းၸိူဝ်းၶီႇၵႃးၵူႈၵေႃႉယဝ်ႉတဵၵ်း ယွၼ်းငိုၼ်းသေလၢတ်ႈဝႃႈ ၵူၼ်းၸိူဝ်းၼႆႉပဵၼ်ၵူၼ်းၵႂႃႇ မိူင်းထႆးမႃး တေလႆႈပၼ်ငိုၼ်းၼိုင်ႈၵေႃႉ 5 မိူၼ်ႇပျူး၊ သင်ဢမ်ႇပၼ်တေဢမ်ႇပၼ်မိူဝ်း၊ ပေႃးၵႂႃႇတီႈၵူၼ်းလူင် ပႃႈၼိူဝ်တေသဵင်ႈၼမ်လိူဝ်ၼႆႉ ၼႆလႄႈၵူၼ်းဢွၵ်ႇတၢင်းဢွၼ်ၵၼ်တွင်းပၢၼ်ႇဝွၼ်း ၼွမ်းၸိူင်ႉႁိုဝ်ၵေႃႈဢမ်ႇလႆႈ ၵႃႈလႆႈပၼ် ၼိုင်ႈၵေႃႉ 5 မိူၼ်ႇပျုး ၼႆ။

ၼၢင်းလိုၼ်းလၢတ်ႈဝႃႈ “မိူဝ်ႈမိူဝ်းၵိုတ်းၵိၼ်ၶဝ်ႈတီႈဝၢၼ်ႈၼွင်တဝ်ႇၼၼ်ႉလႆႈႁၼ်ၶိင်းမၢၼ်ႈဢၼ် ယွၼ်းငိုၼ်း ၶဝ်ႈမႃးၼႂ်းသႅင်ႇသွင်ၵေႃႉ၊ ၶဝ်ႈၵႂႃႇၼႂ်းႁွင်ႈၾၢႆႇတၢင်းလင်သေ ယူႇၼႂ်းၼၼ်ႉတင်းႁိုင်။ ယူႇယူႇၵႆႉလႆႈႁၼ်ၵူၼ်း ၶဝ်ႈၵူၼ်းဢွၵ်ႇၼႂ်းႁွင်ႈၼၼ်ႉတင်းၼမ်။ သဵင်ၵူၼ်းၵေႃႈဢူၼ်မေႃးဝႆႉ ၶႃႈၸင်ႇႁဵတ်းၵႅင်ႈၵႂႃႇလၢင်ႉမိုဝ်းတၢင်းလင် ၼၼ်ႉသေ လွမ်ငွၵ်ႈတူၺ်းလႆႈႁၼ်ၵူၼ်းသူႇယႃႈမႃႉ ပေႃးတဵမ်ဝႆႉၼႂ်းႁွင်ႈၼၼ်ႉ။ သိုၵ်းမၢၼ်ႈသွင်ၵေႃႉၼၼ်ႉ ၵေႃႈတိုၵ်ႉဢွၼ်ၵၼ်သူႇယႃႈမႃႉယူႇ၊ မိူဝ်ႈပႆႇႁူႉဝႃႈၶဝ်သူႇယႃႈမႃႉၼၼ်ႉ ထၢင်ႇဝႃႈၶဝ်တေလမ်းမႃးယွၼ်းငိုၼ်းထႅင်ႈ ၸႂ်ပေႃးဢမ်ႇလီ” ဝႃႈၼႆ ။

ယႃႈမႃႉၸွမ်းၼႃႈလိၼ်သၢႆၸိူဝ်းႁိမ်းႁွမ်းၼွင်တဝ်ႇၸိူဝ်းၼၼ်ႉၵိုၼ်းၼမ် ၵူၼ်းၵိၼ်ပေႃးမီး ငိုၼ်းသေႁႃသိုဝ်ႉၵိၼ်၊ ၶႂ်ႈၵိၼ်ၸိူင်ႉႁိုဝ်ၵိၼ်ဢမ်ႇမီးၽႂ်ဝႃႈသင်၊ ပေႃးပဵၼ်ၵူၼ်းၶၢႆလႆႈသႂၢင်းၶွၼ်ႇပၼ် သိုၵ်းမၢၼ်ႈလႄႈ ၸဝ်ႈၼႃႈတီႈ(ယႄး) ၶႂ်ႈၶၢႆၸိူင်ႉႁိုဝ်ၶၢႆ၊ ၵူၺ်းပေႃးဢမ်ႇပၼ်ၶွၼ်ႇလႄႈၶၢႆတႄႉ ဢမ်ႇ ၸၢင်ႈလၢတ်ႈ ဝႃႈၼႆယဝ်ႉ။

သိုၵ်းမၢၼ်ႈၸိူဝ်းၼႆႉ တိတ်းၸပ်းယိၼ်ႉ ယႃႈမႃႉလိူဝ်ႁႅင်းပူၼ်ႉလႄႈပေႃးဢမ်ႇလႆႈၵိၼ် ဢမ်ႇၶႂ်ႈယူႇ လႆႈ။ ပေႃးႁၼ် လူတ်ႉႁၼ်ၵႃးပိူၼ်ႈမႃးတၢင်းၼႆႉ လမ်းႁႄႉၵိုတ်းယွၼ်းငိုၼ်းပိူၼ်ႈၵႃႈပွင်ႇၵႃႈပဵၼ် ဝႃႈၼႆယဝ်ႉ။