ဝွၵ်းသွၼ်ႈၸႂ်

ၽူႈၸွမ်းသူင်ႇၶၢပ်ႈတူဝ် သၶႁၶဝ်ႈႁဵဝ်ႈ ၵိုၼ်းၶွၼ်ႈၼမ်

မိူဝ်ႈဝႃးယၢမ်း 1:00pm ၽူႈၸွမ်းသူင်ႇၶၢပ်ႈတူဝ်ၸၢႆးသႅင်ၸိုၼ်ႈႁိုဝ် သၶႁ ၶဝ်ႈပႃႇႁဵဝ်ႈၵိုၼ်းၶွၼ်ႈၼမ် ဢမ်ႇယွမ်း 2000 ပၢႆပဵၼ်လွင်ႈၶိုၵ်ႉၶၢႆးလူင်လၢင်။

မိူဝ်ႈဝၼ်းထိ 22.9.2011 မိူဝ်ႈဝႃးယၢမ်း 1:00 pm ၸၢႆးသႅင်ၸိုၼ်ႈ ႁိုဝ် သၶႁ (သူမ်ႈၶူမ်ႁိုၼ်း) ဢၼ်သဵင်ႈ ၵၢမ်ႇၵႂႃႇ မိူဝ်ႈဝၼ်းထိ 15.9.2011 လူၺ်ႈတၢင်းပဵၼ်ၵႅၼ်ႊသိူဝ်ႊ တပ်း တီႈႁူင်းယႃ သူၼ်တွၵ်ႇ ၵဵင်းမႆႇ ၸိုင်ႈထႆး ၼၼ်ႉ ပီႈ ၼွင်ႉၸိူဝ်ႉသၢႆၶိူဝ်း ဢိၵ်ႇတင်း သင်ႇၶ ၸဝ်ႈ၊ ၽူႈယႂ်ႇၵူၼ်းလူင်၊ ဢူၺ်းၵေႃႉ ဢူၺ်းသေႈ၊ ပီႈၼွင်ႉ ၽူႈသူင်ႁၵ်ႉၽဵင်း ၵႂၢမ်းမၼ်းၸဝ်ႈ ပႃးၸဵမ် ၸုမ်းတူင်ႉၼိုင် လၢႆၾၢႆႇလၢႆလၢႆၸုမ်း ႁူမ်ႈၵၼ်ႁၢမ်ႁူဝ် ၶၢပ်ႈတူဝ် ၸၢႆးသႅင်ၸိုၼ်ႈ သၶႁ ၶဝ်ႈပႃႇႁဵဝ်ႈ တီႈပႃႇၸႃႉ သၼ်ၵူႇလဵၵ်း ဢိူင်ႇဝတ်ႉၵဵတ်ႇ ၸေႈဝဵင်းမိူင်း ၸေႈတွၼ်ႈ ၵဵင်းမႆႇၸိုင်ႈထႆး၊ ၽူႈၸွမ်းသူင်ႇ တင်းမူတ်းဢမ်ႇယွမ်း 2000 ပၢႆ။

ၽွင်းႁွတ်ႈပႃႇႁဵဝ်ႈၼၼ်ႉ ပီႈၼွင်ႉၸိူဝ်ႉၶိူဝ်းလႄႈ လၢႆလၢႆၸုမ်းႁူမ်ႈၵၼ်ထၢႆႇႁၢင်ႈၵိုၵ်းပဵၼ်ၵမ်းလိုၼ်းသုတ်းသေ သိုပ်ႇလူဢၢၼ်ႇၼေ ၽိုၼ်လိၵ်ႈမွင်ၸႂ် 5 ၽိုၼ်ဢၼ်လၢႆလၢႆၸုမ်းသူင်ႇၸူး (ၽိုၼ်လိၵ်ႈမွင်ၸႂ်တင်းမူတ်းမီးပၢၵ်ႇပၢႆ ၊ ၵူၺ်းယွၼ်ႉဢမ်ႇမီးၶၢဝ်းယၢမ်းတႃႇလူဢၢၼ်ႇတင်းမူတ်းလႄႈ လႆႈလိူၵ်ႈဢဝ် 5 ၽိုၼ်သေဢၢၼ်ႇ) ယူႇယဝ်ႉ။

ဢႃးၸၢၼ် ၶိုၼ်းသႂ် ၸႂ်ယဵၼ် ႁူဝ်ၼႃႈၸုမ်းၶၢဝ်ႇၽူႈတွႆႇႁွၵ်ႈမိူင်းလွႆ မွၵ်ႇလၢတ်ႈၶေႃႈၵႂၢမ်းသူင်ႇသင်ႇ တူၵ်ႉတၵ်ႉၵမ်း လိုၼ်းသုတ်းထိုင် ၸၢႆးသႅင်ၸိုၼ်ႈ ႁိုဝ် သၶႁ ဝႃႈ “ ၸၢႆးသႅင်ၸိုၼ်ႈ သၶႁ ၼႆႉပဵၵ်ႉသမ်ႉပဵၼ်ၵူၼ်းပၢၵ်ႇၸႃႉသဵင် ၸၢင် ၵူၺ်းပဵၼ်ၵူၼ်းမီးၼမ်ႉၸႂ်လီ ၶဝ်ႈၵႄႈဢွၵ်ႇၵၢင်ၵူႈၽၢႆႇသေတူင်ႉၼိုင် ႁဵတ်းသၢင်ႈတႃႇပုၼ်ႈပၢင်ႈ ၸိူဝ်ႉၶိူဝ်း ဝၢၼ်ႈမိူင်း ၵူၼ်းတင်းၼမ်မႃးလႄႈ မီးၵူၼ်းႁၵ်ႉၵူၼ်းပႅင်းၼမ်သေ ပဵၼ်တူဝ်ယၢင်ႇလီ ပဵၼ်တီႈၵူၼ်းတင်းၼမ်လႆႈ သေလၢႆၸွမ်းတေႉတေႉၼၼ်ႉယဝ်ႉ၊ ၵူၺ်း ၵေႃႉတၢႆတႄႉတၢႆသေပူၼ်ႉၵႂႃႇယဝ်ႉ၊ တႃႇႁဝ်း ၵူၼ်း ၸိူဝ်းၵိုတ်းတင်းလင် သမ်ႉတေၵုမ်ႇၶီငဝ် သေလၢႆၸွမ်းသေဢမ်ႇပဵၼ်ႁဵတ်းသင်တႄႉ ပႆႇၸႂ်ႈ။ ၵွပ်ႈၼၼ် တၵ်းလႆႈ သိုပ်ႇႁဵတ်းသၢင်ႈၵႂႃႇ ၼင်ႇပုၼ်ႈၽွၼ်းၸိူဝ်ႉၸၢတ်ႈပၼ်မီးမႃး။ မၼ်းတႄႉလႆႈၶတ်းၸႂ်လုၺ်းၶၢမ်ႈ ပႆႇတၼ်းထိုင်ၽင်ႇ သေလႆႈလုတၢႆၵႂႃႇ ၵေႃႈ ၸိူဝ်းႁဝ်းၵူၼ်းၵိုတ်းတင်းလင်ထုၵ်ႇလႆႈ သိုပ်ႇလုၺ်းၶၢမ်ႈႁႂ်ႈၽႅဝ်ထိုင်ၽင်ႇ ၸွမ်းၼင်ႇယိူင်းဢၢၼ်းဢၼ်မီး ဝႆႉယူႇ” ဝႃႈၼႆယဝ်ႉ။

ၸၢႆးသႅင်ၸိုၼ်ႈ သၶႁ ၼႆႉၸိုဝ်ႈမိူဝ်ႈလဵၵ်ႉ ႁွင်ႉၸၢႆးၸၢမ်ႇၺူဝ်ႇ/ဢၢႆႈငဵဝ်ႇ။ ၸိုဝ်ႈတၢင်ႇဢၼ် သိူဝ်လႅင်ၶိူဝ်း ၵိူတ်ႇမိူဝ်ႈ ဝၼ်းထိ 07/11/1952 တီႈဝၢၼ်ႈမင်းသႅင်၊ ဢိူင်ႇမင်းသႅင်၊ မိူင်းမင်းလိူၼ်း မိူင်းဝႃႉ ဝၼ်းဢွၵ်ႇၶူင်း။ ပေႃႈပဵၼ် လုင်း မၼ်းမူးလိင်ႇ မႄႈၸိုဝ်ႈႁွင်ႉ ၼၢႆးလွႆၽွင်။ မီးပီႈၼွင်ႉ ႁူမ်ႈတွင်ႉၵၼ် 9 ၵေႃႉ။ 1 ၸၢႆးဢုင်း (1948-) တၢင်ႉယၢၼ်း၊ 2 ၼၢင်းၽူင်း (1950-) မိူင်းၵုတ်ႈ၊ 3 သၶႁ (1952-2011)၊ 4 ၸၢႆးယုင်း (1954-)၊ 5 ၸၢႆးၶမ်းယူၺ်ႉ (1956-) မိူင်းသူႈ၊ 6 ၸၢႆးၶမ်းၶျူင်ႇ (လုမိူဝ်ႈ 1995)၊ 7 ၸၢႆးလဵၵ်း (လုမိူဝ်ႈ 1994)၊ 8 ၼၢင်းၸၢမ်ၶဵဝ် (1960-) တၢင်ႉယၢၼ်း၊ 9 ၸၢႆးၺုၼ်ႉ (1971-) မိူင်းမၢဝ်း၊ ဢမ်ႇႁူမ်ႈပေႃႈ။

ၸၢႆးသႅင်ၸိုၼ်ႈ သၶႁ ၼႆႉလႆႈတႄႇၼႃႈႁိူၼ်း ၸွမ်းၼၢင်းလွၼ်ႉယိုၼ်း(ၼၢင်းလႃႉယဵၼ်ႇ) (1955-)၊ ပွၵ်ႉပေႃႈမိူင်း၊ ဝဵင်းမိူင်းၼၢႆး ၵူပ်ႉၵူႈၵၼ်မိူဝ်ႈ 1980။ မီးလုၵ်ႈလၢင်း ႁူမ်ႈၵၼ် 4 ၵေႃႉ။ 1 ၸၢႆးမင်းၸိုၼ်ႈ (1981-1983)၊ 2 ၸၢႆးမင်း ဝႃႉ (1982-)၊ 3 ၼၢင်းၽိဝ်ၽွင်းၽွင်ၽူင်း (1988-)၊ 4 ၸၢႆးမင်းမၼ်ႈမုၼ်းမၢၵ်ႈ (1990-)။

သၶႁ ပဵၼ်ၽူႈၵႂၢင်ႈၶႂၢင် ၽၢႆႇလိၵ်ႈလၢႆးပၢႆပေႇ၊ ၽၢႆႇၵၢၼ်မိူင်း ၵၢၼ်သိုၵ်း၊ ၽၢႆႇသိုဝ်ႇၵၢၼ်ၶၢဝ်ႇငၢဝ်းလႄႈ ၽၢႆႇပၢႆး မွၼ်း ၽဵင်းၵႂၢမ်း ဢၼ်ၶိုၵ်ႉၶမ်ႇ လမ်ႇလွင်ႈတႃႇၸိူဝ်ႉၶိူဝ်း ဝၢၼ်ႈမိူင်းၵေႃႉၼိုင်ႈ။ မၼ်းၸဝ်ႈတႅင်ႇတႅမ်ႈ ၽဵင်းၵႂၢမ်း 300 ပၢႆ၊ ၼႂ်းၼၼ်ႉမၼ်းၸဝ်ႈႁွင်ႉႁင်းၵူၺ်းမွၵ်ႈ 120 ပုၵ်ႈ ဝႃႈၼႆယဝ်ႉ။

ၶႅပ်းႁၢင်ႈ - SHAN