ဝွၵ်းသွၼ်ႈၸႂ်

ၸုမ်း​ယၢင်း​ၸတ်း​ပၢင်​သပ်း​လႅင်း လွင်ႈ​ၽၢႆၼႂ်း​မိူင်း​ယၢင်း​လႅင်

ၸုမ်း​ယၢင်း​လႅင်​ၽၢႆႇ​ပူၵ်း​ပွင်​ၶူၼ်ႉ​ႁႃ (Karenni Development Research Group- KDRG)ၸတ်း​ပၢင်​သပ်း လႅင်းၼႂ်း​လိၼ်​ထႆး​တီႈ​ၼိုင်ႈ ပိူဝ်ႈ​တႃႇႁႂ်ႈ​ၵိုတ်း​ယိုတ်း​ၽၢႆ ဢၼ်​မီး​ၽေး​ၶဵၼ်​တေႃႇ​ၵူၼ်း​ၸၢဝ်း ၶိူဝ်းၼႂ်း​မိူင်း​ယၢင်း လႅင် ။

မိူဝ်ႈ​ဝၼ်း​ထီႉ 10 လိူၼ်​မၢတ်ႉၶျ် ပီ 2011 ၶၢဝ်း​ယၢမ်း 10:30 ထိုင် 12:00 မူင်း​ၼၼ်ႉ KDRG ၸတ်း​ပၢင်​သပ်း လႅင်း​ၵဵဝ်ႇ​လူၺ်ႈ​ၽၢႆၼႂ်း​မိူင်း​ယၢင်း​လႅင် ၵူၼ်း​ၶဝ်ႈ​ႁူမ်ႈ​မီး 30 ပၢႆ။

ၵူၼ်း​ဝၢၼ်ႈ​ၸိူဝ်း​လဵပ်ႈ​ႁဵၼ်း​လၢတ်ႈ​ၼႄ​ဝႃႈ ၼႂ်း​မိူင်း​ယၢင်း​လႅင်​ၼႆႉ သိုၵ်း​မၢၼ်ႈ​ဝၢင်း​ၽႅၼ်​တႃႇ​ႁဵတ်း ၽၢႆ​ၼိူဝ်​မႄႈ ၼမ်ႉ​ၶူင်း။ မီး​ၶွမ်ႊ​ပ​ၼီႊ တႃး​တၢၼ်ႊ ႁႅင်း​ၼမ်ႉ​မိူင်း​ၶႄႇ (China hydropower Datang) ႁူမ်ႈ​တင်း​သိုၵ်း မၢၼ်ႈ လႄႈ ၵူၼ်း​တႃႇ​ဢဝ်​ႁူမ်ႇ လူမ်ႈ မႃး​တႅၵ်ႈ​တႃႇ​လူင်း​မိုဝ်း​ႁဵတ်း​ၽၢႆ​ယူႇ​ၼႆ ။

ၸၢႆး​ၸၢႆး ၸုမ်း​သိင်ႇ​ဝႅတ်ႉ​လွမ်ႉ​ၸိုင်ႈ​တႆး​လၢတ်ႈ​ဝႃႈ “ၽၢႆ​ဢၼ်​မီး​ၼိူဝ်​သၢႆ​မႄႈ​ၼမ်ႉ​ၶူင်း​ၼႆႉ တင်း​သဵင်ႈ​တင်း မူတ်း မီး 7 ဢၼ်။ ၽၢႆ​ထီႉ​ၼိုင်ႈ ပဵၼ် ၵုၼ်​လူင် မီး​တီႈ​လႅၼ်​လိၼ်​မိူင်း​ၶႄႇ၊ ၼွင်​ၽႃ၊တႃႈ​သၢင်း၊ ယႂႃႇ တိတ်ႉ၊ ဝႅတ်ႉ​ၵျီး၊ တႃႇ​ၶုၺ်ႇ လႄႈ​ႁၢတ်ႉ​ၵျီး ၸိူဝ်း​ၼႆႉ” ဝႃႈ​ၼႆ။

ၽၢႆ​ဢၼ်​တေ​ႁဵတ်း​ၼၼ်ႉ​ၵႆ​ၵၼ်​တင်း​မႄႈ​ႁွင်ႈ​သွၼ် 60 ၵီႊ​လူဝ်ႊ တီႈ​ဝၢၼ်ႈမႂ်ႇ ၼိူဝ်​မႄႈ​ၼမ်ႉ​ၶူင်း။တေ​ႁဵတ်း ၽၢႆ​ႁႅင်း​ၾႆး​ၾႃႉ 600 MW မီႊ​ၵႃႊ​ဝႅတ်ႉ။ ႁႅင်း​ၼမ်ႉ​ပႃႈ​ၼိူဝ်​ၽၢႆ​ၼၼ်ႉ ၸၢင်ႈ​ထူမ်ႈ​ပႃး ၵူၼ်း မိူင်း​တႆး​ပႃး။ၸိူဝ်း​ႁိမ်း ႁွမ်း​ၼၼ်ႉ​ၵေႃႈ သိုၵ်း​မၢၼ်ႈပႂ်ႉ​ဝႆႉ​တႃႇ​သေႇ​သေ ၵႆႉ​ပဵၼ်​ပၢင်​တိုၵ်း​ၵၼ်​ၸိူဝ်း​ၼႆႉ လႄႈ​ၵူၼ်း​ဝၢၼ်ႈ​လႆႈ​ပၢႆႈ​တင်း ၼမ်​ဝႃႈ​ၼမ် ၼႆ။

သၢႆ​ၼမ်ႉ မႄႈ​ၼမ်ႉ​ပုၼ်​ဢၼ်​ၵူၼ်း​တင်း​ၼမ်ၸႂ်ႉ​တိုဝ်း​ယူႇ​ၼၼ်ႉ ၵေႃႈ​တေ​ႁဵတ်း​ၽၢႆ​ထႅင်ႈ ႁႅင်း​မွၵ်ႈ 130 မီႊ​ၵႃႊ ဝႅတ်ႉ။ ၸၢဝ်း​ၶိူဝ်း​ၵူၼ်း ယိၼ်း​တ​လႄး ၸိူဝ်း​ယူႇ​ႁိမ်း​ၽင်ႇ​ၼမ်ႉ ၸွမ်း​ႁိမ်း​ႁွမ်း​ၼၼ်ႉ​မီး​ႁူဝ် ၵူၼ်း​မွၵ်ႈ 1000 ။ ၸၢဝ်း​ၶိူဝ်း​ယိၼ်း​တ​လႄး ၸိူဝ်း​ၼၼ်ႉ​ႁူႉ​ၵႃႈ​တၵ်း လႆႈ​ၶၢမ်ႇ ၽွၼ်း​ႁၢႆႉ​မၼ်း​ဝႃႈ​ၼႆ။

ၶူး​တေႃး​ရႄႇ ၽူႈ​ဢဝ်​ပုၼ်ႈ​ၽွၼ်း KDRG လၢတ်ႈ​ဝႃႈ​ၵူၼ်း​ဝၢၼ်ႈ​ၸိူဝ်း​ယူႇ​ၸွမ်း​ႁိမ်း​ႁွမ်း​မႄႈ​ၼမ်ႉ ၼၼ်ႉ​တႃႇ​တေ ႁႃ​ပႃ၊ ႁဵတ်း​ႁႆႈ​ႁဵတ်း​သူၼ်၊ ၽုၵ်ႇ​သွမ်ႈ၊ၶဝ်ႈ​ထိူၼ်ႇ​ႁႃ​လဵင်ႉ​တွင်ႉ​ၸိူဝ်း​ၼႆႉ​ၵေႃႈ​ဢမ်ႇ​လႆႈ ယဝ်ႉ သိုၵ်း​မၢၼ်ႈ​ၶဝ်​ႁၢမ်ႈ ပိၵ်ႉ​ပႅတ်ႈ​မူတ်း ၵႂႃႇ​မႃး​ၵေႃႈ ဢမ်ႇ​လႆႈ” ဝႃႈ​ၼႆ။

တေႃး​ရႄႇ​သိုပ်ႇ​လၢတ်ႈ​ဝႃႈ ၸၢဝ်း​ၶိူဝ်း​ယိၼ်း​တ​လႄး​ႁူမ်ႈ​ၵၼ်​ယူႇ​ၸွမ်း​ၼမ်ႉ​ပုၼ်​ၼႆႉ​လႄႈ​လိူၵ်ႈ⁠လိူၵ်ႈ​ၶဝ်​မႃး​ႁဵတ်း ၽၢႆသႂ်ႇ​တီႈ​ၼၼ်ႈ ဢမ်ႇ​ႁိုင်​သင်​ၵူၼ်း​ၶိူဝ်း​ၼၼ်ႉ တေ​ႁၢႆ​ၵႂႃႇ​ပႅတ်ႈ​မူတ်း​ယဝ်ႉ။ယွၼ်ႉ​သိုၵ်း​မၢၼ်ႈၶႂ်ႈႁႂ်ႈ​ၵူၼ်း​ၶိူဝ်း ၸိူဝ်း​ယူႇ​ၸွမ်း​ၼၼ်ႉ​ႁၢႆ​လႄႈ​ၸင်ႇ မႃး​သၢင်ႈ​ၽၢႆ​တီႈ​ၼၼ်ႈ​ၵေႃႈ ပဵၼ်​လႆႈ ဝႃႈ​ၼႆ။

လိူဝ်​သေ​ၼၼ်ႉ တီႈ​မိူင်း​ယၢင်း​လႅင် တင်း​ႁွင်ႇ ဝဵင်း​လွႆ​ၵေႃႇ တီႈ​မႄႈ​ၼမ်ႉ​တ​ၽႅတ်ႉ​ၼၼ်ႉ ၵေႃႈ​သိုၵ်း​မၢၼ်ႈ​ၶဝ် ႁၢင်ႈ ႁႅၼ်း တေ​ႁဵတ်း ႁႅင်း​ၾႆး​ၼမ်ႉ 110 မီႊ​ၵႃႊ​ဝႅတ်ႉ​ထႅင်ႈ​ဝႃႈ​ၼႆ။ ၶွမ်ႊ​ပ​ၼီႊ​မိူင်း​ၶႄႇ​လႄႈ မိူင်း​ထႆး​ႁူမ်ႈ​ၵၼ် သေ​တေ​သၢင်ႈ​ၽၢႆ တႃႇ7 ဢၼ်​ၼိူဝ်​သၢႆ​မႄႈ​ၼမ်ႉ​ၶူင်း ၽၢႆ​ယႂႃႇ​တိတ်ႉ​ၼႆႉ​ပႃးၼႂ်း​ၼၼ်ႉ​ဢၼ် ၼိုင်ႈ​ဝႃႈ​ၼႆ။

တီႈ​တေ​သၢင်ႈ​ၽၢႆ​ၼၼ်ႉ တိုၵ်ႉ​ပဵၼ်​ပၢင်​တိုၵ်း​ၵၼ်​ယူႇ​သေ​ၵူၼ်း​ဝၢၼ်ႈ​တင်း​ၼမ်​ၵေႃႈ​ဢမ်ႇ​လႆႈၸႂ်​ၸွမ်း၊ ၼႂ်း​ပိုၼ်ႉ တီႈ​ၸိူဝ်း​ၼၼ်ႉ​ၵေႃႈ​ၸၢင်ႈ​မီး​လွင်ႈ​ဢမ်ႇ​ၼိမ်​သဝ်း​လႆႈ​ဝႃႈ​ၼႆ။

ၵဵဝ်ႇ​လူၺ်ႈ​လွင်ႈ​ၼႆႉ​သေ KDRG ၸင်ႇ​ၸတ်း​ပၢင်​သပ်း​လႅင်း​ၶၢဝ်ႇ ႁႂ်ႈ​သိုၵ်း​မၢၼ်ႈ​ၵိုတ်း​ယိုတ်း​လွင်ႈ​ႁဵတ်း သၢင်ႈ​ၽၢႆ ဢၼ်​တုမ်ႉ​တိူဝ်ႉ​ၵူၼ်း​မိူင်း​ဝႃႈ​ၼႆ။