ဝွၵ်းသွၼ်ႈၸႂ်

မၢၵ်ႇတႅၵ်ႇၵႂၢင်းႁိူဝ်းမိၼ် ၼႂ်းဝဵင်းလူင်မွတ်ႊသ်ၵူဝ်ႊ ရတ်ႊသျႍိဝ်ႊ မီးၵူၼ်းတၢႆ/ မၢတ်ႇၼမ်

သၢႆမၢႆၵူၼ်းတၢႆယွၼ်ႉမၢၵ်ႇတႅၵ်ႇၶႃႈတူဝ်တၢႆၼႂ်းၵႂၢင်းႁိူဝ်းမိၼ် တူဝ်ႊမူဝ်ႊတေႊတူဝ်ႊဝူဝ်ႊ ၼႂ်းဝဵင်းလူင် မွတ်ႊသ် ၵူဝ်ႊ ၸိုင်ႈမိူင်းရတ်ႊသျႍိဝ်ႊ မီးၵူၼ်းတၢႆတီႈဢေႇသုတ်းမွၵ်ႈ 35 ၵေႃႉ မၢတ်ႇၸဵပ်း 150 ပၢႆၼႆ။

ၸုမ်းၶၢဝ်ႇၼွၵ်ႈမိူင်းလၢႆးငၢၼ်းမိူဝ်ႈဝၼ်းထိ 25.01.2011 ၼႆႉဝႃႈ သၢႆမၢႆၵူၼ်းတၢႆယွၼ်ႉမၢၵ်ႇတႅၵ်ႇ ၶႃႈတူဝ်တၢႆ ၼႂ်းၵႂၢင်းႁိူဝ်းမိၼ် တူဝ်ႊမူဝ်ႊတေႊတူဝ်ႊဝူဝ်ႊ ၼႂ်းဝဵင်းလူင်မွတ်ႊသ်ၵူဝ်ႊ ၸိုင်ႈမိူင်း ရတ်ႊသျႍိဝ်ႊ တီႈဢေႇသုတ်း မီးမွၵ်ႈ 35 ၵေႃႉ ၼႂ်းၼၼ်ႉမီးၸၢဝ်းဢင်းၵိတ်း 2 ၵေႃႉ လႄႈ ၵူၼ်းၸိူဝ်းမၢတ်ႇၸဵပ်းၼႂ်း ပွၵ်ႈၼႆႉမီးၸၢဝ်းရတ်ႊ သျႍိဝ်ႊ၊ ၾရင်ႇသဵတ်ႊ၊ ဢီႊတႃႊလီႊ လႄႈ ၵျႃႊမၼီႊ တင်း မူတ်းမွၵ်ႈ 150 ပၢႆဝႃႈၼႆ။

တမိတရီႊ မဵတ်ႉဝေႊတဵပ်ႉၾ် (Dmitry Medvedev) ၸွမ်ၸိုင်ႈမိူင်းရတ်ႊသျႍိဝ်ႊ ပိုၼ်ၽၢဝ်ႇတီႈ မွတ်ႊသ်ၵူဝ်ႊ ဝႃႈ တေသွၵ်ႈႁႃ ၵူၼ်းတီႈယူႇပႃႈလင်သေၵမ်ႉထႅမ်လွင်ႈ မၢၵ်ႇတႅၵ်ႇပွၵ်ႈၼႆႉ မႃးပၼ်တၢမ်ႇႁႂ်ႈလႆႈ ဝႃႈၼႆ။

ၼႂ်းၽွင်းလဵဝ်ၵၼ်လႅင်ႇၶဝ်ႇၽၢႆႇႁူမ်ႇလူမ်ႈရတ်ႊသျႍိဝ်ႊယုမ်ႇယမ်ဝႃႈ မၢၵ်ႇတႅၵ်ႇတီႈၵႂၢင်းႁိူဝ်းမိၼ် တူဝ်ႊမူဝ်ႊ တေႊတူဝ်ႊဝူဝ်ႊ ၼႆႉၸၢင်ႈပဵၼ်ၼမ်ႉမိုဝ်းၸုမ်းယိပ်းၵွင်ႈၵၢင်ႇ မူႊသလိမ်ႊၸိူဝ်းယူႇ တီႈလွႆ ၶေႃးၶေႊသတ်ႉသ် ပွတ်းၸၢၼ်း ဢၼ်ယၢမ်ႈဢွၵ်ႇမႃးပၼ်ၶေႃႈၾၢင်ႉဝႃႈ တေပိုတ်ႇယိုဝ်းသႂ်ႇ ဢွင်ႈတီႈ လမ်ႇလွင်ႈၼႂ်းမိူင််းလူင် ရတ်ႊသျႍိဝ်ႊ ဢိၵ်ႇပႃးတင်းၽၢႆႇတေႃႉသူင်ႇ လႄႈ ပဝ်ႉမၢႆတီႈလမ်ႇလွင်ႈ ပၢႆးမၢၵ်ႈမီး။ တေပိုတ်ႇယိုဝ်းယႃႉၵဝ်း ၽွင်းရတ်ႊသျႍိဝ်ႊ ပဵၼ်ၸဝ်ႈႁိူၼ်းၸတ်းပၢင်ၶေႉၶဵင်ႇ ဢူဝ်ႊလမ်ႊ ပိၵ်ႊ ၶၢဝ်းၵၢတ်း တီႈမိူင်းသူဝ်းသိႁိမ်းၽင်ႇ ပၢင်ႇလၢႆႇလမ်ၼႂ်းပီ 2014 ၼႆႉ ဝႃႈၼႆ။