ဝွၵ်းသွၼ်ႈၸႂ်

လိၵ်ႈယိုၼ်ႈၸူး ၸုမ်းၶၢဝ်ႇသိုဝ်ႇႁႅင်းၼုမ်ႇ

ထိုင်/
ၸုမ်းၶၢဝ်ႇသိုဝ်ႇႁႅင်းၼုမ်ႇ

မိူဝ်ႈၼႆႉ 25.4.2011 ၶၢဝ်းယၢမ်း 7:00 မူင်းၶမ်ႈၼႆႉ မီးသဵင်ၵူၼ်းၼႂ်း ပိုၼ်ႉတီႈ မိူင်းၵူၵ်း ဢွၵ်ႇမႃးဝႃႈ “ပီၼႆႉမိူင်း ၵူၵ်း ဝၢၼ်ႈႁူဝ်ၶင်ႉတင်းဝၢၼ်ႈ ၵူၵ်းတႂ်ႈ တေဢမ်ႇလႆႈႁဵတ်းၼႃးယဝ်ႉ” ၼႆသေပဵၼ်သဵင်မွင်ၸႂ်ဝႆႉယူႇ။

ၵွပ်ႈပိူဝ်ႈဝႃႈ ၽၢႆႇႁူင်းၵၢၼ်ၽႆးၽႃႉ မိူင်းထႆး လႆႈမိူဝ်းသိုဝ်ႉဢဝ်ပိုၼ်ႉ တီႈမိူင်းၵူၵ်းတင်းမူတ်း ၶၢဝ်းတၢင်း 30 ပီ တီႈ လူင်ပွင်ၸိုင်ႈ မိူင်းမၢၼ်ႈ မိူဝ်ႈပူၼ်ႉမႃး 3 ပီ ပိူဝ်ႈတႃႇၶုတ်းဢဝ်ထၢၼ်ႇႁိၼ်မႃးၸႂ်ႉႁႅင်းၽႆးၽႃႉ မိူင်းထႆးလႄႈ သူင်ႇၶၢႆဢွၵ်ႇၼွၵ်ႈမိူင်းထႅင်ႈ၊ “ဢွၼ်တၢင်းပီ 2009 ၼႆႉ တႄႉ ထႆးၶဝ်ၶဝ်ႈမႃးၵေႃႈ ဢမ်ႇပေႃးမီးလွင်ႈတုမ်ႉတိူဝ်ႉ ၵႃႈႁိုဝ်ၶဝ်မႃး ထတ်းတူၺ်းပိုၼ်ႉတီႈ၊ မႃးၶုတ်းၸၢမ်းတူၺ်းဢိတ်းဢိတ်း ၸိူင်ႉၼၼ် သေပွၵ်ႈမိူဝ်းၶိုၼ်းၸိူင်ႉ ၼၼ် ၵူၺ်း။ ၵူၺ်းၵႃႈတင်ႈဢဝ်ပီ 2009 မႃးၼႆႉ ပီၼႆႉ 2011 ပဵၼ်ဢၼ်ႁၢဝ်ႉ ႁႅင်းသုတ်း၊ ပီဢၼ်တေသိုပ်ႇ ၵႂႃႇၼႆႉတႄႉ ၵူၼ်းၵိုၵ်းဝၢၼ်ႈၵိုၵ်းမိူင်း ယင်းတေဢမ်ႇၶၢင်ႉမိူင်း (တေဢမ်ႇၵိုတ်း)သေၵေႃႉလူး ၵွၼ်ႇ” ၼႆၵူၼ်း လွမ်ၶၢင်းၵၼ်ၸိူင်ႉၼႆ။

ဝၢၼ်ႈႁူဝ်ၶင်ႉလႄႈ ဝၢၼ်ႈၵူၵ်းတႂ်ႈတႄႉ ပီၼႆႉတေဢမ်ႇလႆႈႁဵတ်းၼႃး ယဝ်ႉ။ ၼႃးၵူၼ်းဝၢၼ်ႈတႃႇသွင်ဝၢၼ်ႈၼႆႉ ထႆးၶဝ်ၸၢႆႇၵႃႈၶၼ်မၼ်းတီႈ သိုၵ်းမၢၼ်ႈၶဝ် ၼိုင်ႈတိုင်ႇ(ဢေႇၵ) လႂ် 20,000 ဝၢတ်ႇ ငိုၼ်းထႆး။ ၵူၺ်းၵႃႈမၢၼ်ႈ ၶဝ်သမ်ႉ ပၼ်ၵူၼ်းမိူင်း 20,000 ၵျၢပ်ႈ(ပႃး)ငိုၼ်းမၢၼ်ႈ သေ ၵူၼ်းထႆးၶဝ်ဢဝ်ၵႃးထုၺ်ႇၼႂ်းတူင်ႈၼႃး ၵူၼ်း မိူင်းယူႇၶိုၼ်းၶိုၼ်း ဝၼ်းဝၼ်း။

မိူဝ်ႈႁၢင်ပီ 2010 ၸမ်သဵင်ႈၼၼ်ႉ ၵူၼ်းမိူင်းထႆး ဝဵင်းၵဵင်းႁၢႆးဢွၼ်ၵၼ် ၼႄၵၢင်ၸႂ် ႁႂ်ႈၵိုတ်းပၼ်လွင်ႈႁဵတ်း သဵၼ်ႈ တၢင်းလတ်းဢဝ်မိူင်းၵူၵ်း မႃးပွင်ႇႁိၼ်တႅၵ်ႇ ဢၼ်တေပဵၼ်သဵၼ်ႈတၢင်း တၢင်ႇထၢၼ်ႇ ႁိၼ်ၶဝ်ႈ မိူင်း ထႆးၼၼ်ႉ ၵွပ်ႈမီးလွင်ႈတၢင်း ၸၢင်ႈႁဵတ်းႁႂ်ႈယႃႈမဝ်းၵမ် ၼႂ်းမိူင်းထႆး ၼမ်မႃးလိူဝ်ၵဝ်ႇၸွမ်းသၢႆတၢင်းသဵၼ်ႈ ၼႆႉ၊ ၸဝ်ႈၼႃႈတီႈၵေႃႈတွပ်ႇဝႃႈ တေၵိုတ်းပၼ်ယူႇၼႆသေ မိူဝ်ႈလဵဝ်တႄႉယင်းတိုၵ်ႉႁဵတ်းတၢင်းဢဝ်မိူင်း ၵူၵ်းမႃးပွင်ႇ မိူင်းၵၢၼ်းယူႇ ဝၼ်းဝၼ်းၶိုၼ်းၶိုၼ်းၼႆယဝ်ႉ။

မီးၵူၼ်းပိုၼ်ႉတီႈလၢတ်ႈမႃးဝႃႈ တီႈပုင်ႇတၢၵ်ႈပေႃးလၵ်ႉမိူင်းၵူၵ်းပႆလွင်ႈ ၸွမ်းၼမ်ႉၵူၵ်း ၶၢဝ်းတၢင်းပႆ မွၵ်ႈ 3 ၸူဝ်ႈမူင်းဢၼ်ထႆးၶဝ်ၸၢင်ႈၵူၼ်း မိူင်းၶုတ်းလိၼ် ႁဵတ်းတၢင်းယူႇၼၼ်ႉ ၶုတ်းၺႃးၽြႃးပဵၼ်သူႇ ပဵၼ်သူႇဝႆႉ တင်းၼမ် ၼႂ်းလိၼ်တီႈၼၼ်ႈၼႆ။

ၵူၺ်းၵႃႈၽိူဝ်ႇသိုၵ်းမၢၼ်ႈၶဝ်ႁူႉၶၢဝ်ႇလွင်ႈၼႆႉယဝ်ႉၼႅတ်ႈမႃးလွမ်ႉႁူဝ်ႉ သေ ဢဝ်သိုၵ်းမႃးပႂ်ႉဝႆႉတင်းၼမ်၊ဢမ်ႇ ပၼ်ၽႂ်မႃးၸမ်ထႆးၵေႃႈဢမ်ႇ ၸမ်လႆႈ ၵူၼ်းမိူင်းၵေႃႈဢမ်ႇၸမ်လႆႈၼႆယဝ်ႉ။

ၵူၼ်းၼႂ်းပိုၼ်ႉတီႈလၢတ်ႈထႅင်ႈဝႃႈ “ မိူင်းၵူၵ်းၼႆႉမီးသၢႆငၢႆပဵၼ်သိုၵ်းပၢင်တိုၵ်းယႂ်ႇလူင်တေႉတေႉဝႃႈဝႃႈလႆႈယူႇ ၸဵဝ်းလႄႈၼၢၼ်းၼၼ်ႉ ၵူၺ်း။ ၵွပ်ႈဝႃႈမိူင်းၵူၵ်းၼႆႉ ၵူၼ်းထဝ်ႈၶဝ်ယၢမ်ႈလၢတ်ႈဝႃႈ မီးမေႃႇသႅင်၊ၵူၺ်းဢမ်ႇ ႁူႉဝႃႈမီးတီႈလႂ် မေႃႇငိုၼ်းလႄႈမေႃႇၶမ်းတႄႉႁူႉမၼ်းတိုၼ်း မီးတႄႉယူႇယဝ်ႉ” ၼႆယူႇ။

မိူဝ်ႈလဵဝ်ထႆးၶဝ်သိုဝ်ႉဢဝ်သေယဝ်ႉတုၵ်းယွၼ်းႁႂ်ႈမၢၼ်ႈထွၼ်ဢွၵ်ႇ ပၼ်ၼႂ်းမိူင်းၵူၵ်းတင်းမူတ်းဝႃႈၼႆသေ တႃႉ ၵူၺ်းမၢၼ်ႈၶဝ်ဢမ်ႇထွၼ် ဢွၵ်ႇပၼ်သေ တွပ်ႇၵႄႈဝႃႈႁဝ်းတေဢဝ်ႁူမ်ႇလူမ်ႈပၼ်သူၼႆ သေၶႅၼ်းၽိူမ်ႉၵူၼ်း သိုၵ်းၼမ်လိူဝ်မႃးသေၵဝ်ႇၵူၺ်းဢမ်ႇၵႃးဢဝ်ၵႃးသိပ်း လေႃႉတၢင်ႇၵူၼ်းမိူင်းမၢၼ်ႈၶဝ်ၸိူဝ်းပဵၼ်ၸၼ်ႉႁႃဝၼ်း လႂ်ၵိၼ်ဝၼ်း ၼၼ်ႉၸိူဝ်းၼၼ်ႉ မႃးထွၵ်ႇဝႆႉၼႂ်းမိူင်းၵူၵ်း တင်းၼမ်တင်းလၢႆ ၼႆယူႇ။

ၵူၼ်းမၢၼ်ႈၶဝ်ၸိူဝ်းၼၼ်ႉလၢတ်ႈဝႃႈ “သိုၵ်းမၢၼ်ႈၶဝ်လၢတ်ႈႁဝ်းဝႃႈ တေဢဝ်သူၵႂႃႇသိူဝ်ႇတၢင်း တေလႆႈငိုၼ်း လိူၼ်လီႁဝ်းတေဢွၵ်ႇပၼ် ၶဝ်ႈသၢၼ်သူ ပေႃးယဝ်ႉၵေႃႈ ႁဝ်းတေၶိုၼ်းမႃးသူင်ႇသူၶိုၼ်းထိုင်မိူင်း မၢၼ်ႈ” ဝႃႈၼႆ။

ၵူၺ်းၵႃႈမိူဝ်ႈလဵဝ်ၼႆႉ ဢဝ်ႁဝ်းမႃးထွၵ်ႇဝႆႉတီႈၼွၵ်ႈဝၢၼ်ႈသေၵၢၼ်ႁဵတ်း ၵေႃႈ ဢမ်ႇမီး၊မၢင်ဝၼ်းၵေႃႈဢမ်ႇလႆႈ ၵိၼ်ၶဝ်ႈငိုၼ်းတႃႇႁဝ်းတေပွၵ်ႈ မိူဝ်းၵေႃႈဢမ်ႇမီး” ဝႃႈၼႆယဝ်ႉ။

ၵွပ်ႈလွင်ႈတၢင်းၸိူဝ်းၼႆႉသေလႄႈၵူၼ်းလၵ်ႉၵေႃႈၼမ်မႃးၵူၼ်းဝၢၼ်ႈ ၵူၼ်းမိူင်းၵႂႃႇလႂ်ပႆလႂ်ၵေႃႈဢမ်ႇႁတ်းၵႂႃႇ ၵေႃႉလဵဝ် ၵူၼ်းမိူင်းသိုပ်ႇလၢတ်ႈ ၼင်ႇၼႆ။

ၵူၼ်းမိူင်းထႅင်ႈၵေႃႉၼိုင်ႈသိုပ်ႇလၢတ်ႈဝႃႈထႅင်ႈဝႃႈ “ထႆးၶဝ်တႄႉလႅပ်ႈ တေဢမ်ႇယွမ်းငၢႆႈငၢႆႈတူၺ်းၶဝ်လႆႈလူင်း တိုၼ်းလၢင်းဝႆႉဢမ်ႇဢေႇ ယဝ်ႉ။ ထႅင်ႈလွင်ႈၼိုင်ႈ တူၺ်းထႆးၶဝ်လူင်းတိုၼ်းလၢင်းၼႆႉဢမ်ႇၵႃး လွင်ႈၶဝ်တေ ဢၢၼ်းဢဝ်ထၢၼ်ႇႁိၼ်ပိူင်လဵဝ်ၵူၺ်း၊ လႅပ်ႈတေမီးတၢင်ႇ လွင်ႈထႅင်ႈယူႇ။ မိူင်းၵူၵ်းၼႆႉမီးထၢၼ်ႇႁိၼ်ပတ်း ပိုၼ်ႉ မိူင်းၼႂ်းတူင်ႈၼႃး ၵေႃႈမီးသဵင်ႈ။ ၼႂ်းထၢၼ်ႇႁိၼ်ၼႆႉသမ်ႉမီးပႃးသဵၼ်ႈသၢႆၼမ်ႉမၼ်းပႃး၊ႁိၼ်ႁႄႈၵေႃႈ ၼမ်၊ ၶမ်းတႄႉၵူၼ်းမိူင်းယုမ်ႇယမ်ဝႃႈ မီးတႂ်ႈလိၼ်တီႈ တပ်ႉမၢၼ်ႈ 580 ဝၢၼ်ႈဝဵင်း၊ တပ်ႉဢၼ်ၼႆႉပေႃးတူၺ်းတီႈ မၼ်းၼႆ ဢမ်ႇၸႂ်ႈဢွင်ႈတီႈတင်ႈတပ်ႉသေဢိတ်း ၸုမ်းဝႃႉ ၸုမ်းလႃးႁူႇ (မူးသိူဝ်း) ၸုမ်းသိုၵ်းတႆး ၸုမ်းလႂ် မႃးယိုဝ်းၵေႃႈတိုၼ်းပႄႉတႃႇသေႇၵူၺ်းၵႃႈမၢၼ်ႈ ၶဝ်တိုၼ်းဢမ်ႇ ယွမ်းၶၢႆႉဢွင်ႈတီႈၼႆႉ ပဵၼ်ၵွပ်ႈၶဝ်ႁူႉဝႆႉႁႃႉ ဢမ်ႇႁူႉ” ၼႆၵူၼ်းမိူင်းၶဝ်ထၢင်ႇထိူမ်ယူႇ။

“ၵွပ်ႈႁဝ်းၶႃႈ ဢမ်ႇမီးတူဝ်ထူပ်းၼမ် တၢင်းႁူႉၵေႃႈဢမ်ႇယႂ်ႇလႄႈပဵၼ်ႁိုဝ် ၵေႃႈလီ ၶႂ်ႈႁႂ်ႈ ၸုမ်းသုၼ်ႇလႆႈသုၼ်ႇ ပဵၼ်ၵူၼ်းမိူင်းတႆး၊ ၸုမ်းမီးပုၼ်ႈ ၽွၼ်းၼိူဝ်မိူင်းတႆး၊ ၸုမ်းၵႅတ်ႇၶႄၵူၼ်းမိူင်း၊ ၸုမ်းထိင်းၶိူဝ်းတႆးႁဝ်းၶဝ်ၶဝ်ႈ ၸႂ်လႄႈ တူၺ်းထိုင်မိူင်းၵူၵ်း ႁူမ်ႈပႃးတင်းၵူၼ်းမိူင်းဢိတ်းၼိုင်ႈ ဢေႃႈ” ၼႆၵူၼ်းမိူင်းၶဝ်သင်ႇသဵင်ၵႂႃႇၼိူဝ် ၵူၼ်းတႆးလႄႈၽူႈႁၵ်ႉၽႅၼ်ႇ လိၼ်မိူင်းတႆးၵႂႃႇၼင်ႇၼႆ။

Mongtai Watches
25.4.2011