ဝွၵ်းသွၼ်ႈၸႂ်

ႁႅင်းၸႂ်ၵူၼ်းမိူင်းတင်းပိုၵ်း ယူႇတီႈႁႅင်းသိုၵ်း ၸိူဝ်ႉၸၢတ်ႈ

ႁႅင်းႁူဝ်ၸႂ်ၵူၼ်းမိူင်းတင်းပိုၵ်းၼႆႉ တိုၵ်ႉမုင်ႈမွင်းဝႆႉတီႈ ၵူၼ်းသိုၵ်းၸိူဝ်းၵိၼ်ၶဝ်ႈၵူၼ်းမိူင်း သေႁဵတ်း ၵၢၼ်ၵႅတ်ႇၶႄဝၢၼ်ႈ မိူင်း လႄႈၸိူဝ်ႉၶိူဝ်းၸဝ်ႈၵဝ်ႇၼၼ်ႉယူႇ။

သိူဝ်လႄႈမႃၼႆး ငၢႆးမိူၼ်ပဵၼ်ၵေႃႉၵၼ်၊ သင်ဢမ်ႇသင်ၵေႃႈ ႁူႉတေႃႈပဵၼ်သတ်း ၵိၼ်ၼိူဝ်ႉၼင်ႇၵၼ် ၵူၺ်း။ တူၺ်းမႃ ၼႆးမေႃယဵဝ်ႈၵႅတ်ႇ သိူဝ်သႅတ်ႇလႅတ်ႇၶမ်ၶိုမ်းယဵဝ်ႈ မႃၽဵဝ်ႈၵိၼ်ၼိူဝ်ႉ သိူဝ်ၶူၼ်မၢၵ်ႇမိူဝ် ၸွမ်းယုမ်း သိူဝ်သုမ်းမႃၼႆးယွၼ်ႉ ၵွင်ႉယဵဝ်ႈၶဝ်ႈတႃမွတ်ႇမႃဝႅၼ် ထွတ်ႇၸူၵ်းသႆႈသိူဝ်ႁွင်ႉႁႆႈၼႄ သတ်း တင်းပႃႇယဝ်ႉ------ငႃး----ငႃး------ ငႃး----- လီဢၢႆပိူၼ်ႈၼႃႇသိူဝ်သုမ်းမႃၼႆး။

ဢမ်ႇႁိုင်ဢမ်ႇ ၼၢၼ်း ယိူင်းဢၢၼ်းလႄႈတၢင်းမုင်ႈမွင်းၵူၼ်းမိူင်းၼၼ်ႉ ၸိုင်သမ်ႉမိူၼ်မႃ ၵိၼ် ပႅတ်ႈဢထၢင်ႇၶဝ်၊ မိူၼ် ၼင်ႇ မႃၼႆးၸူၵ်းၵိၼ် သႆႈသိူဝ်လၢႆးၼၼ်ႉယဝ်ႉ။ ဝၢႆးသေလႆႈ ငိၼ်းႁူႉဝႃႈၸုမ်းတႆးၵိုတ်းသိုၵ်းၸိူဝ်း ဢၼ်ယင်ႉလိုဝ်ႈၵၢၼ် တိုၵ်းမႃး ပီယၢဝ်းၶၢဝ်းႁိုင်ၶဝ် ၵမ်ႈၽွင်ႈ ၼၼ်ႉသမ်ႉလႅၵ်ႈလၢႆႈယွမ်းႁဵတ်းၸုမ်း သိုၵ်းတပ်ႉပႂ်ႉလႅၼ်လိၼ်ၼႆလႄႈ ႁူဝ်ၸႂ် ၵူၼ်းမိူင်း လႄႈၵူၼ်းသိုၵ်းၸိူဝ်းမီးၼမ်ႉၸႂ်ႁၵ်ႉၶိူဝ်းၸိူဝ်း ၼၼ်ႉ သမ်ႉပေႃးတၢၼ်ႇၸပ်း တၢင်းပဵၼ်ဢၼ်တေယႃဢမ်ႇ ၸၢင်ႈ ႁၢႆလႆႈၼၼ်ႉယဝ်ႉ။ ယွၼ်ႉပိူဝ်ႈၽူႈ ၼမ်းၶိုၵ်ႉတွၼ်း ဢွၼ်ႈဝွၼ်းၵူၼ်ႈမၢၼ်ႈ ႁဵတ်းႁႂ်ႈၵူၼ်းမိူင်းမိူဝ်ႇၸၢၼ်ႈၵၢၼ် သိုၵ်း၊ ၵၢၼ်မိူင်းလႄႈ ၵၢၼ် ၸိူဝ်ႉၵၢၼ်ၶိူဝ်း ၼၼ်ႉယဝ်ႉ။ မၢင်ၽဝ်ႇၵေႃႈ ၽူႈၼမ်းၶိုၵ်ႉ တွၼ်းၸိူဝ်းဢွၼ်ႈဝွၼ်းၵူၼ်ႈ မၢၼ်ႈၸိူဝ်းၼၼ်ႉ ၶဝ်လိုမ်းဝူၼ်ႉဝႃႈ “ၽွင်းမိူဝ်ႈၵတ်းယဵၼ် ပဵၼ်တိုဝ်ႉတၢင်း ႁၢင်ႈႁႅၼ်းတႃႇတိုၵ်းသိုၵ်း၊ ၽွင်း မိူဝ်ႈတိုၵ်း သိုၵ်းပဵၼ်တိုဝ်ႉတၢင်းတႃႇႁၢင်ႈ ႁႅၼ်း လွင်ႈၵတ်းယဵၼ်” ၼႆၼၼ်ႉယဝ်ႉႁိုဝ်?။

တႃႉသေဝႃႈ ၵူၼ်း ၵၢပ်ႈပၢၼ်မိူဝ်ႈလဵဝ်ၼႆႉ ၵူၼ်းႁူႉၼမ် ၵူၼ်းၵမ်ဢေႇ လႄႈႁူႉယူႇၵေႃႈႁဵတ်း ၵႅင်ႈဢမ်ႇႁူႉႁိုဝ်ၵေႃႈဢမ်ႇ ႁူႉ၊ ဢမ်ႇၼၼ်ၵေႃႈတိုၼ်းတင်ႈၸႂ်ဢမ်ႇဝူၼ်ႉ ဢမ်ႇမိုင်ႉမၼ်း ပႅတ်ႈ။ တၢင်းႁူႉၽူႈၼမ်းၼိုင်ႈ ၵေႃႉ တေပၼ်ဢဝ်ငိုၼ်း ပေႃႉႁူဝ်လႄႈငိူဝ်ႈၵႂႃႇၸိူင်ႉၼႆ ၵူၺ်း ယဝ်ႉႁိုဝ်၊ ဢမ်ႇဝူၼ်ႉၶိုၼ်းမိူဝ်ႈၽွင်းတိုၵ်း သိုၵ်းသေလုၵ်ႉၽိုၼ်ႉမႃးတေႃႇထိုင်ပေႃး ပဵၼ် ၸဝ်ႈပဵၼ်ၶုၼ်မႃးႁၢၼ်ႉတေႃႇထိုင်မိူဝ်ႈလဵဝ်ၼႆႉသင်တၢႆ ၵေႃႈပေႃးတၢႆယဝ်ႉ၊ ဢၼ်လႆႈ ၶတ်းႁႅင်းသေ လတ်းၽႃႇ မၢၵ်ႇၵွင်ႈၼႂ်းပၢင်တိုၵ်းမႃးၼၼ်ႉ။ မိူၼ်မိူဝ်ႈလဵဝ် ဢမ်ႇတၢႆၵေႃႈ ဢမ်ႇမီးၵႃႈမီး ၶၼ်သင် တွၼ်ႈတႃႇၸိူဝ်ႉၶိူဝ်းလႄႈဝၢၼ်ႈ မိူင်းသေဢိတ်းယဝ်ႉ ဢမ်ႇမီးလွင်ႈသင်ယဝ်ႉ။ မိူၼ်တၢင်းဝႃႈ “ၵူၼ်းဢမ်ႇမီးယိူင်းမၢႆ တင်းၵူၼ်းတၢႆဢမ်ႇပိူင်ႈ” ၼႆၼၼ်ႉ ယဝ်ႉ။ သိုၵ်းတႆး ၸိူဝ်းၼႆႉ မိူၼ်တင်း ၵိၼ်ၶဝ်ႈပႂ်ႉဝၼ်းတၢႆ သၢႆၸႂ်ပႂ်ႉဝၼ်းၶၢတ်ႇၵူၺ်းယဝ်ႉ။

ပေႃးဢဝ်ႁူဝ်ၸႂ်ၵူၼ်းမိူင်းလႄႈ ႁူဝ်ၸႂ်ၵူၼ်းသိုၵ်းၸိူဝ်းပဵၼ်ၽူႈႁၵ်ႉၸိူဝ်ႉၸၢတ်ႈ ဝၢၼ်ႈမိူင်းတေႉတေႉ ၼၼ်ႉဝႃႈၸိုင်ၶႂ်ႈ တေႃႇသူႈလႄႈ ၸင်ႇမႃးႁဵတ်းသိုၵ်း ၶႂ်ႈႁႂ်ႈတိုၵ်းဢဝ်မိူင်းလႄႈၸင်ႇလဵင်ႉၶဝ်ႈၵၼ် ယဝ်ႉ။

ယၢမ်းလဵဝ် ၵူၼ်းႁၵ်ႉၸိူဝ်ႉၸၢတ်ႈၵူႈၵေႃႉၼႆႉ မိူၼ်ၵူၼ်းၼွၼ်းၾၼ်ၵူၺ်းယဝ်ႉ။ ဝၢႆးသေသိုၵ်းငမ်း ယဵၼ် လၢႆတပ်ႉၸုမ်း ယွမ်းႁပ်ႉႁဵတ်းပဵၼ်တပ်ႉပႂ်ႉလႅၼ်လိၼ်သေယဝ်ႉၵူၼ်းသိုၵ်းၵမ်ႈၽွင်ႈၵေႃႈဢွၼ် မိူဝ်ႇၸၢၼ်ႈၵၢၼ်သိုၵ်းလႄႈ လၵ်ႉပၢႆႈ ၵေႃႈမီး ၸိူဝ်းၶိုၼ်းၶႃႈတူဝ်တၢႆၵေႃႈ မီး၊ ၶဝ်ၸိူဝ်းၼႆႉႁႅင်းထၢတ်ႈၸႂ် ၶဝ် ယူႇတီႈၽူႈဢွၼ်ႁူဝ်သေ ဢွၼ်ႁဵတ်းပဵၼ်မႃးလွၼ်ႉ လွၼ်ႉယဝ်ႉ။ လွင်ႈလီဢိၵ်ႇလွင်ႈၸႃႉၸိူဝ်း ၼႆႉ။ ၵေႃႉတူၵ်းလူင်း ႁဵတ်းႁႂ်ႈမၢၼ်ႈၸူမ်းၵေႃႈယူႇတီႈ ၽူႈၼမ်းၸိူဝ်းဢမ်ႇ တမ်းၸႂ်ၸိူဝ်းၼၼ်ႉသေ ထိုင်တေႃႈလဵဝ် သိုၵ်းမၢၼ်ႈၵေႃႈ တေမႃးတင်ႈ တပ်ႉၶိုၵ်ႉယႂ်ႇလူင်ၼႂ်းထုင်ႉၵုၼ်ပၢင်ၵုၼ်ၶူင်း ၼႆႉလၢႆ လၢႆ တီႈယူႇ။ ဢၼ်ပဵၼ်မႃးၸိူဝ်းၼႆႉ ၽႂ်ၵေႃႉႁဵတ်းပဵၼ်ၼႆဢမ်ႇလၢတ်ႈၵေႃႈတႆးႁူႉယဝ်ႉ။

ဝၢႆးသေၸုမ်း သိုၵ်းငမ်းယဵၼ် ယွမ်းပဵၼ်တပ်ႉပႂ်ႉလႅၼ်လိၼ်ယဝ်ႉ သိုၵ်းမၢၼ်ႈၶဝ်ၵေႃႈ ဝၢင်းၽႅၼ်တႃႇယႃႉၸုမ်းတႆးၵိုတ်း သိုၵ်း မိူၼ်ၼင်ႇ တပ်ႉၸုမ်း 7  တပ်ႉလွႆၽႃၵႃလီႉ ဢၼ်ၸဝ်ႈ လၢဝ်ၵွၼ်းဢွၼ်ႁူဝ်ၼင်ႇႁိုဝ်ပေႃး တေၶၢတ်ႇၵၢၼ်တိတ်း တေႃႇၵၼ်တင်း တပ်ႉၸုမ်း 1 ဝၢၼ်ႈႁႆး ဢၼ်ၸဝ်ႈပၢင်ႇၾႃႉဢွၼ်ႁူဝ်ၼၼ်ႉ ၸုမ်းသိုၵ်းမၢၼ်ႈၵေႃႈ ဝၢင်းၽႅၼ်သေၽွၵ်ႈ တၢင်းၵႃး တႄႇဢဝ်ၵႃလီႉတေႃႇထိုင်မိူင်းသူႈၸိူဝ်းၼႆႉ။ ၽွၵ်ႈတၢင်းလတ်းၽၢၼ်ႇ ၶဝ်ႈၼႂ်းဝၢၼ်ႈႁူဝ်ပၢင်ႇၵႃလီႉသေဢွၵ်ႇ ၵႂႃႇဝၢၼ်ႈႁွင်ႈလိုၵ်ႉမိူင်းၸၢင်ၸိူဝ်း ၼႆႉ။ သိုၵ်းမၢၼ်ႈ  ၵေႃႈလတ်းၽၢၼ်ႇၵႂႃႇမႃးၸွမ်း သဵၼ်ႈတႃႈသၢႆတၢင်းဢၼ်သိုၵ်းတႆး ၵႆႉပႂ်ႉလၢၼ်ႇလၢႆ လၢႆတီႈ ၸိူဝ်းၼႆႉယဝ်ႉ။


သိုၵ်းတႆးၵေႃႉၼိုင်ႈ မၼ်းႁၼ်မိူဝ်ႈသိုၵ်းမၢၼ်ႈလတ်းၽၢၼ်ႇၵႂႃႇမႃးပွတ်းႁွင်ႈလိုၵ်ႉၼၼ်ႉ ၵူႈဝၼ်း မၢင်ဝၼ်းသိုၵ်းမၢၼ်ႈ ၶဝ်မႅပ်ႈလိၼ်ႉတေႃႇၵူၼ်းသိုၵ်းဢွၼ်ႇၸိူဝ်းၼၼ်ႉလႄႈလႅပ်ႈမိူၼ်ဢမ်ႇၵူဝ်ၵိၼ် ၵၼ် သေ ၵႂႃႇမႃးငၢႆႈလူမ်ၸႂ်ၵူႈၶၢဝ်းယၢမ်း၊ ၶႂ်ႈမႃးၵၢင်ၶမ်ႈၵၢင်ၶိုၼ်း ၵေႃႈလီ ၵၢင်ၼႂ်ၵၢင်ဝၼ်းၵေႃႈလီ ဢမ်ႇ မီးၽႂ်ဝႃႈသင်လႄႈ သိုၵ်းတႆးၵေႃႉၼၼ်ႉၵေႃႈဝူၼ်ႉဝႃႈ ပဵၼ်သိုၵ်းတႆးႁၵ်ႉၸိူဝ်ႉၸၢတ်ႈဝၢၼ်ႈမိူင်း ၸိူဝ်ႉၶိူဝ်းၼိုင်ႈၵေႃႉသေ မႃးႁဵတ်းသိုၵ်းၵေႃႈ ပေႃးမိူၼ်တေႃႈလဵဝ်ၼႆႉ ဢမ်ႇမီးၵႃႈ ၶၼ်ဢမ်ႇမီးလွင်ႈသင် ယဝ်ႉၼႆသေ ၶိုၼ်းယိုဝ်းတူဝ်တၢႆ ၶိုၼ်း ၼႆယဝ်ႉ။

ဝၢႆးသေသိုၵ်းတႆးတီႈႁွင်ႈလိုၵ်ႉၼၼ်ႉ ၶႃႈတူဝ်တၢႆၶိုၼ်းယဝ်ႉ သိုၵ်းၼႂ်းတပ်ႉၸုမ်း 7 ၵမ်ႈၽွင်ႈၵေႃႈ လၵ်ႉ ပၢႆႈၶဝ်ႈႁႃတပ်ႉ ၸုမ်း 1 ၵေႃႈမီး ဢၼ်ပၢႆႈၶဝ်ႈၼႂ်းၸုမ်းသိုၵ်း လွႆတႆးလႅင်း ၵေႃႈမီးတင်းၼမ်ဢၼ် ၶိုၼ်းယိုဝ်းတူဝ်တၢႆၶိုၼ်းၵေႃႈမီးထႅင်ႈ လၢႆလၢႆၵေႃႉယူႇ၊ ၵူၼ်းသိုၵ်း ၸိူဝ်းလၵ်ႉပၢႆႈၵေႃႉႁူးၵေႃႉတၢင်းၼႆႉ ဢမ်ႇယွမ်း 50 ပၢႆယဝ်ႉဝႃႈၼႆ။


လိူဝ်သေၼၼ်ႉဢမ်ႇၵႃး ၵူၼ်းသိုၵ်းလႄႈၵူၼ်းမိူင်းပွတ်းၵႃလီႉၼၼ်ႉ သမ်ႉႁၼ်သိုၵ်းမၢၼ်ႈ ၶဝ်မႃး သိမ်းဢဝ်ႁႆႈၼႃး သူၼ်ၵူၼ်းမိူင်းပွတ်းၵႃလီႉၼၼ်ႉ တၢင်းၼမ်ၵူၺ်းဢမ်ႇၵႃး ပၢႆသိမ်း ပႃးသူၼ်ႁႆႈ ၸဝ်ႈ ႁၢၼ်ၶမ်းၶွင်ႇလႄႈၼႃးၸဝ်ႈႁၢၼ် သၢႆၶဵဝ် ၶဝ်ၸိူဝ်းၼႆႉၵေႃႈသိုၵ်းတႆးၶဝ်ယင်းဢမ်ႇႁတ်းတၵ်း သဵင် သင် ပေႃးပဵၼ်သူၼ်ႁႆႈၼႃးၵူၼ်းမိူင်းၶႅၼ်းဢမ်ႇၸၢင်ႈဝႃႈ သင်ၸွမ်းယဝ်ႉ။

မိူဝ်ႈလဵဝ်သိုၵ်းမၢၼ်ႈၶဝ် ၽွၵ်ႈတၢင်း တႄႇဢဝ်ၵႃလီႉတေႃႇထိုင်မိူင်းသူႈၸိူဝ်းၼႆႉသေသမ်ႉပၢႆႁဵတ်းႁူင်း ႁဵၼ်းၸၼ်ႉသုင် ပၼ်ၵူၼ်းမိူင်း တီႈမိူင်းၸၢင်ၼၼ်ႉလင်ၼိုင်ႈ။ ၵူၺ်းၵႃႈ တေႃႇထိုင်မိူဝ်ႈလဵဝ်ယင်း ဢမ်ႇ မီးၵူၼ်းၶိုၼ်ႈႁဵၼ်းမၼ်းဝႃႈၼႆ။

ၼႂ်းသၢႆတႃၵူၼ်းမိူင်းတူၺ်းတႄႉ ဝႃႈသိုၵ်းမၢၼ်ႈလီၼႆယူႇယဝ်ႉ။ ယွၼ်ႉပိူဝ်ႈသင်ၼႆ ၶဝ်ႁၼ်သိုၵ်း မၢၼ်ႈ တိုၵ်ႉမႃးႁဵတ်း ၵေႃႉၸုမ်းၵိုတ်းသိုၵ်းၼႂ်းပီၼႆႉၵူၺ်း ပေႃးႁဵတ်းပၼ် သဵၼ်ႈတၢင်းၵႂႃႇမႃးတွၼ်ႈ တႃႇၵူၼ်းဝၢၼ်ႈၵူၼ်းမိူင်းလႄႈပေႃးမႃး ႁဵတ်းႁူင်းႁဵၼ်းပၼ်ၵူၼ်းမိူင်းယဝ်ႉ ဝႃႈၼႆ။ ထႅင်ႈလွင်ႈ ၼိုင်ႈ ၵူၼ်းမိူင်းလၢတ်ႈဝႃႈ “ၶွၼ်ႇယႃႈလႄႈၶွၼ်ႇၵူႈၸိူဝ်ႉၵူႈလွင်ႈ ၵေႃႈႁဝ်းသႂ်ႇ (ထၢမ်း) မႃးတီႈၸုမ်းတႆးၵိုတ်း သိုၵ်းၼႆႉၸဵမ်မိူဝ်ႈလႂ်မႃးလႂ်ယဝ်ႉ တေႃႇထိုင်မိူဝ်ႈလဵဝ်ၵေႃႈသိုၵ်းတႆးႁဵတ်းပၼ် ၵူၼ်းမိူင်းတႆးၼႆႉယင်း ဢမ်ႇ မီးသင်သေလွင်ႈ သိုၵ်းတႆးၼႆႉ ဢမ်ႇမီး ၽွၼ်းလီသင်တွၼ်ႈတႃႇ ၵူၼ်းမိူင်းတႆး မီးသိုၵ်း မၢၼ်ႈ ၵူၺ်းယဝ်ႉ ဢၼ်တေႁဵတ်းပၼ်တွၼ်ႈ တႃႇၵူၼ်းမိူင်းတႆးလႆႈၶိုၼ်ႈယႂ်ႇၼႆ ၼႂ်းသၢႆတႃ ၵူၼ်းမိူင်းတႆး” ၼႆ ၵူၼ်းမိူင်း တႆးပွတ်းထုင်ႉ ၵုၼ်ပၢင် ၵုၼ်ၶူင်းတႄႉ ႁၼ်ပႅၵ်ႇပိူင်ႈၸိူင်ႉၼႆယဝ်ႉယၢမ်းလဵဝ်။ သိုၵ်းတႆး ၵမ်ႈၽွင်ႈၼႆႉ မီးၵွင်ႈယဝ်ႉယႃႇဝႃႈ တေၵႅတ်ႇၶႄဝၢၼ်ႈမိူင်းတႆး တေႃႈၼင်ႇၵႅတ်ႇၶႄၶိုၼ်းတူဝ်ၵဝ်ႇၵူၺ်း ၵေႃႈယင်းဢမ်ႇပဵၼ်လႆႈ တေႁဵတ်းၸိူင်ႉႁိုဝ်ဢဝ်မိူင်း တႆးလႆႈၶိုၼ်းၼႆ။ သိုၵ်းတႆးႁဝ်းယၢမ်းလဵဝ်ၼႆႉမီး ၵူၼ်းသိုၵ်းၼမ်ၼမ်သေ မီးၵွင်ႈၸေႉမိုဝ်းၼႆႉ ဢမ်ႇၸႂ်ႈတႃႇၵႅတ်ႇၶႄ ဝၢၼ်ႈ မိူင်းပဵၼ်တႃႇၵႅတ်ႇၶႄ သဵၼ်ႈ တၢင်းပၢႆးမၢၵ်ႈမီး သုၼ်ႇတူဝ်ၽူႈယႂ်ႇ ၵူၼ်းလူင်ၶဝ်ၵူၺ်းယဝ်ႉ။ ၵူႈပွၵ်ႈတႄႉဝႃႈႁင်း ၵၼ်ဝႃႈသိုၵ်း တႆးၼႆႉပဵၼ်ၶိူင်ႈမိုဝ်းၶုၼ်သႃႇ ပဵၼ်ၶိူင်ႈမိုဝ်းတၢင်ႇၸၢဝ်းၶိူဝ်းၵူၺ်းၼႆ မိူဝ်ႈလဵဝ်တႄႉသိုၵ်းတႆးၶိုၼ်းပဵၼ်ၶိူင်ႈ မိုဝ်းသိုၵ်းတႆး ၵူၺ်းယဝ်ႉ။


ၽူႈယႂ်ႇၵူၼ်းလူင်တႆးၸိူဝ်းပဵၼ်သိုၵ်းၵမ်ႈၼမ်ၼႆႉၶဝ်ႁဵတ်းၵၢၼ်မိူင်းဢမ်ႇၸႂ်ႈ၊ၶဝ်ႁဵတ်းၵိၼ်ၵၢၼ်မိူင်း ဢိူဝ်ႈ။ၶဝ်ႁဵတ်းၵၢၼ် ၸိူဝ်ႉၵၢၼ်ၶိူဝ်းဢမ်ႇၸႂ်ႈ၊ ၶဝ်ႁဵတ်းၵိၼ်ၵၢၼ် ၸိူဝ်ႉၵၢၼ်ၶိူဝ်းဢိူဝ်ႈ။ဢဝ်ၸိုဝ်ႈဢဝ် သဵင်ဝႃႈ ႁဵတ်းသိုၵ်း ၵၢၼ်မိူင်းၵၢၼ်ၶိူဝ်း လႄႈ ၵၢၼ်ၸိူဝ်ႉၸၢတ်ႈၼႆ မႅၵ်ႇၶႃဢဝ်ၸိုဝ်ႈသဵင်ၸိူဝ်းၼႆႉသေ ႁႃ လၢႆးလႆႈသႂ်ႇပုၼ်ႈသုၼ်ႇ တူဝ်ၵူၺ်းႁိုဝ်။ဢမ်ႇလီဝူၼ်ႉ ၵေႃႈလီသွၼ်ႇယူႇပဵၼ်ၵူၼ်းမႃးသင်တၢႆၵေႃႈ ပေႃးတၢႆယဝ်ႉ ယင်းဢမ်ႇႁၼ် သိုၵ်းတႆးႁဝ်းသိမ်းဢဝ်လႆႈ ဝဵင်းဢၼ်မီးမိူင်း တႆးႁဝ်းၼႆႉသေဝဵင်းတေႃႇ ထိုင်မိူဝ်ႈလဵဝ်ၵေႃႈ ႁၼ်သိုၵ်းတႆးပၢႆႈၵူၺ်းႁိုဝ်။


ၶၢဝ်းတၢင်းသူႇၸႂ်းလဵပ်ႈႁဵၼ်းၼႂ်းမိူင်းတႆးလၢႆတီႈ မိူၼ်ၼင်ႇ ၼႃႈလိၼ်သိုၵ်းၵူဝ်းၵၢင်ႉၵေႃႈႁၼ်ၵူၼ်း မိူင်းမီးတၢင်းသိူဝ်း လႄႈမီးလွင်ႈၶိုၼ်ႈယႂ်ႇတေႉတေႉ။ ၼႂ်းၼႃႈလိၼ်သိုၵ်း မိူင်းလႃး ၵေႃႈၵူၼ်းမိူင်းမီး လွင်ႈၶိုၼ်ႈယႂ်ႇလႄႈမီးတၢင်းသိူဝ်းတေႉ တေႉ။ ၼႂ်းၼႃႈလိၼ်သိုၵ်းဝႃႉ ပၢင်သၢင်းၵေႃႈၵူၼ်းမိူင်းမီး တၢင်း ၶိုၼ်ႈယႂ်ႇၵတ်းယဵၼ်မီးတၢင်းသိူဝ်းတေႉတေႉ။

ၵမ်းၼႆႉၶိုၼ်းမႃးတူၺ်းၶိုၼ်းၼႂ်းၼႃႈလိၼ်သိုၵ်း တႆးၵုမ်းထိင်းၵူႈတီႈတီႈလူး ၵူၼ်းမိူင်း ပဵၼ်ၸိူင်ႉႁိုဝ်ဝႆႉယႃႇဝႃႈတေသၢၵ်ႈ သႃႇလူမ်ၸႂ်လႄႈမီးတၢင်း ၶိုၼ်ႈ ယႂ်ႇလႃႈ ယိုင်ႈၶႅၼ်းၽၢၼ် ၼႃႇလိူဝ်ၵဝ်ႇတုၵ်ႉၶႃႉၼႃႇလိူဝ်ၵဝ်ႇ တူၵ်းတႅမ်ႇၼႃႇလိူဝ်ၵဝ်ႇ ယဝ်ႉ။

လွင်ႈ ၸိူင်ႉၼႆၼႆႉ တေလႆႈဝႃႈၵူၼ်းမိူင်းႁၵ်ႉၶုၼ်ႁႃႉၶုၼ်ႁၵ်ႉၵူၼ်းမိူင်းၼႆၵေႃႈ  ႁူႉၸႅင်ႈၸႅင်ႈလႅင်း လႅင်းယဝ်ႉပေႃး မိူၼ်ၸိူင်ႉၼႆ။ မိူဝ်ႈလဵဝ် ၵူၼ်းမိူင်းၵိၼ်ၶဝ်ႈၶုၼ်လႄႈငိူဝ်ႈဢမ်ႇၸႂ်ႈၶုၼ်ၵိၼ်ၶဝ်ႈၵူၼ်း မိူင်းလႄႈငိူဝ်ႈဢိူဝ်ႈၵမ်ႉပႃႈၼမ်။ တႆးဢမ်ႇငိူဝ်ႈယဝ်ႉ ဢၼ်ဝႃႈၼၼ်ႉ ယႃႇပေဝႆႉၵူၼ်းမိူင်းၵူၺ်းလႄႈ ၵူၼ်း သိုၵ်းၽူႈႁၵ်ႉၸိူဝ်ႉၸၢတ်ႈၶဝ်ၵူႈၵေႃႉၵေႃႈ ႁႂ်ႈလၵ်းလႅမ် သေၵမ်း။

ဝၼ်းမိူဝ်းၼႃႈ ပေႃးၶႂ်ႈႁႂ်ႈၼႂ်းမၢၵ်ႇတႃၵူၼ်းမိူင်းတႆးဝႃႈ သိုၵ်းတႆးလီ သုၵ်ႈသီႁႂ်ႈႁူဝ်ၸႂ်ၸႅတ်ႈ ၸၢင်ႇလႄႈ ႁႂ်ႈမီးၵႂၢမ်းမၼ်ႈ ၼိူဝ်ၸိူဝ်ႉၶိူဝ်းၸဝ်ႈၵဝ်ႇသေ လႅၵ်ႈလၢႆႈၾိင်ႈယၢမ်ႈတၢင်းၵျၢင်ႉၸဝ်ႈၵဝ်ႇဢၼ်ၺၢမ်ႉၶုၺ်ႈ ၼၼ်ႉလႄႈ ပေႃးႁူႉဝႃႈမၼ်း ဢမ်ႇလီတွၼ်ႈတႃႇၸိူဝ်ႉၶိူဝ်းၼႆ။ ႁူႉယဝ်ႉမူၼ်ႉမႄးၶိုၼ်းမိူဝ်ႈလဵဝ်ဢမ်ႇတူၵ်းလိုၼ်း သင်ၶိုၼ်းဝူၼ်ႉဝႃႈပုၼ်ႈသုၼ်ႇတူဝ် ပဵၼ်ယႂ်ႇ ၼႆၵေႃႈ တႆးတေႃႈဢမ်ႇဝႃႈသင် ပၢၼ်သိုပ်ႇလုၵ်ႈသိုပ်ႇလၢၼ်ၵေႃႈ ႁႂ်ႈတႆးယဵၼ်းပဵၼ်ပိူၼ်ႈသေ ဢမ်ႇလီယဝ်ႉႁိုဝ် တေဢမ်ႇလႆႈဝူၼ်ႉၼမ်ယဝ်ႉ ပေႃးဝႃႈလွင်ႈမိူင်းတႆးလႄႈလွင်ႈၶိူဝ်းတႆး။