ၶၢဝ်ႇလုမ်ႈၾႃႉ

ၵူဝ်ႊရီႊယိူဝ်ႊႁွင်ႇ-ၸၢၼ်း ၽွမ်ႉတႃႇတိုၵ်းၵၼ်ၵူႈမိူဝ်ႈ

သိုဝ်ႇ ယွၼ်ႊႁပ်ႊ လၢႆးငၢၼ်းဝႃႈ ၵူဝ်ႊရီႊယိူဝ်ႊႁွင်ႇ ၽွမ်ႉတႃႇၶဝ်ႈပၢင်တိုၵ်းၵူႈမိူဝ်ႈ တၢင်းၽၢႆႇၵူဝ်ႊရီႊယိူဝ်ႊ ၸၢၼ်းၵေႃႈ ပိုၼ်ၽၢဝ်ႇဝႃႈ တေႁေႉၵင်ႈတူဝ်ၵဝ်ႇၵမ်းလဵဝ် သင်ၵူဝ်ႊရီႊယိူဝ်ႊႁွင်ႇ ယိုဝ်းလႄႈတေဢဝ်လိူင်ႈ တၢင်ႇထိုင် UN ၼႆ။

သိုဝ်ႇၶၢဝ်ႇ ယွၼ်ႊႁပ်ႊ ၶွင်မိူင်းၵူဝ်ႊရီႊယႃႊၸၢၼ်း ဢၢင်ႈဢိင်ဢဝ်ၶေႃႈၵၢဝ်ႇလၢတ်ႈ ၽူႈမီးၸၼ်ႉၼႂ်းတပ်ႉ သိုၵ်းသေ ပိုၼ်ၽၢဝ်ႇမိူဝ်ႈဝၼ်းထိ 25/05/10 ဝႃႈ ၶိမ်ႊၸွင်ႊဢိဝ်ႊ ၸွမ်ၽွင်းလူင်မိူင်းၵူဝ်ႊရီႊယိူဝ်ႊႁွင်ႇႁၢင်ႈ ႁႅင်းတပ်ႉသိုၵ်း တေၶဝ်ႈပၢင်တိုၵ်းလႆႈၵူႈမိူဝ်ႈ ဝၢႆးသေငဝ်းလၢႆးၼႂ်းၵေႈၵၢင်ႈမိူင်းၵူဝ်ႊရီႊယိူဝ်ႊႁွင်ႇလႄႈၸၢၼ်း ႁၢႆႉၸႃႉ ယွၼ်ႉႁိူဝ်းသိုၵ်းၶွင်ၵူဝ်ႊရီႊယိူဝ်ႊၸၢၼ်းထုၵ်ႇယိုဝ်းၸူမ် မိူဝ်ႈလိူၼ်ဢေႊၽိူဝ်ႊ ဢၼ်ႁဵတ်းႁႂ်ႈၵူၼ်း တၢႆ 46 ၵေႃႉ ဝႃႈၼႆ။

ထႅင်ႈၽၢႆႇၼိုင်ႈ မဵင်ႊပၢၵ်ႊ ၽွင်းလူင်မိူင်းၵူဝ်ႊရီႊယိူဝ်ႊၸၢၼ်းၵေႃႈ ပိုၼ်ၽၢဝ်ႇတေၸႂ်ႉႁႅင်းသိုၵ်း ႁေႉၵင်ႈ တူဝ်ၵဝ်ႇၵမ်းလဵဝ် သင်ထိုၵ်ႇတိုၵ်းယိုဝ်း လႄႈ တေဢဝ်လိူင်ႈတၢင်ႇထိုင်လုမ်းၽၢႆႇလွင်ႈႁူမ်ႇလူမ်ႈၶွင် UN ၼႆယဝ်ႉ။

ၼႂ်းဝၼ်းလဵဝ်ၵၼ် ၽွင်းလူင်ၽၢႆႇၼွၵ်ႈမိူင်းၶွင်ၵူဝ်ႊရီႊယိူဝ်ႊႁွင်ႇ ပၼ်ၾၢင်ႉသတိဝႃႈတေယိုဝ်းႁူင်းပွႆႇသဵင်ၶွင် ၵူဝ်ႊရီႊယိူဝ်ႊၸၢၼ်း ဢၼ်ပိုၼ်ၽၢဝ်ႇသူၼ်းႁူၺ်းႁႂ်ႈ ၵူၼ်းမိူင်းၸိူဝ်းယူႇၸွမ်းလႅၼ်လိၼ် မီးလွင်ႈၶဝ်ႈၸႂ် ၽိတ်းၼိူဝ်ငဝ်းလၢႆး ဝႃႈၼႆ။

ၵွၼ်ႇၼႃႈၼႆႉ လူင်ပွင်ၸိုင်ႈမိူင်းၵူဝ်ႊရီႊယိူဝ်ႊႁွင်ႇ ဢွၵ်ႇၶေႃႈပိုၼ်ၽၢဝ်ႇဝႃႈ ဢမ်ႇၵဵဝ်ႇၶွင်ႈတင်းလွင်ႈႁိူဝ်း တိုၵ်း“သူဝ်ႊၼၼ်ႊ”ၶွင်မိူင်းၵူဝ်ႊရီႊယိူဝ်ႊၸၢၼ်း ဢၼ်ထုၵ်ႇယိုဝ်းၸူမ် လႄႈ ၾၢင်ႉဝႃႈသင်တိုၵ်ႉမီးလွင်ႈဢီး တၢင်းၽိတ်းပၼ်ၵူဝ်ႊရီႊယိူဝ်ႊၸၢၼ်းၸိုင် ၸၢင်ႈႁဵတ်းႁႂ်ႈမီးပၢင်တိုၵ်းႁၢဝ်ႈႁႅင်းၼႂ်းၵႄႈၵၢင်သွင်မိူင်း ၼႆယဝ်ႉ။

ၸိူင်ႉႁိုဝ်ၵေႃႈလီ ၽူႈထတ်းသၢင်လၢႆၵေႃႉပၼ်တၢင်းႁၼ်ထိုင်ဝႃႈ တၢင်းသွင်မိူင်းတေဢမ်ႇႁတ်းယိုဝ်းၵၼ် ႁွပ်ႈမႂ်ႇ ယွၼ်ႉဝႃႈပၢင်တိုၵ်းဢမ်ႇမီးၽွၼ်းလီသင်တေႃႇ တၢင်းသွင်မိူင်း ဝႃႈၼႆယဝ်ႉ။