ၶၢဝ်ႇလုမ်ႈၾႃႉ

ပႃႊၵိတ်ႊသ်တၢၼ်ႊတုၵ်းယွၼ်းတၢင်းၸွႆႈထႅမ် တီႈပၢင်ၵုမ်ၸၢတ်ႈၸိုင်ႈလုမ်ႈၾႃႉ

မိူင်းပႃႊၵိတ်ႊသ်တၢၼ်ႊ တုၵ်းယွၼ်းတၢင်းၸွႆႈထႅမ် တီႈပၢင်ၵုမ်ၸၢတ်ႈၸိုင်ႈလုမ်ႈၾႃႉဝႃႈ ႁႂ်ႈၸွႆႈထႅမ်ၽၢႆႇ ငိုၼ်းတွင်း ပၼ်ၵူၼ်းမိူင်းၸိူဝ်းထူပ်းၽေးသႃႇၽဝႃႉပွၵ်ႈယႂ်ႇၼႂ်းမိူင်းပႃႊၵိတ်ႊသ်တၢၼ်ႊ လႄႈ ၾၢင်ႉဝႃႈ သင်ဢမ်ႇ ပဵၼ်လႆႈၸိုင် တေၸၢင်ႈတုမ်ႉတိူဝ်ႉၸွမ်းလွင်ႈၽဵဝ်ႈသိမ်းၸုမ်းယိပ်းၵွင်ႈၵၢင်ႇၸွမ်း ဝႃႈၼႆ။

ၼႂ်းၽွင်းလဵဝ်ၵၼ် ဢင်းၵိတ်း လႄႈ ဢမေႊရိၵၢၼ်ႊ လႆႈႁူမ်ႈငိုၼ်းတႃႇၸွႆႈထႅမ် 250 လၢၼ်ႉဢမေႊရိ ၵၢၼ်ႊ တေႃႊလႃႊ။
ၶျႃႊႁ်မေႁ်မုတ်ႉ ၶူးရေသီႊ ၽွင်းလူင်ၽၢႆႇၼွၵ်ႈမိူင်း ပႃႊၵိတ်ႊသ်တၢၼ်ႊ လၢတ်ႈတီႈ ပၢင်ၵုမ်ၸၢတ်ႈၸိုင်ႈလုမ်ႈ ၾႃႉ တီႈဝဵင်းၼိဝ်ႊယွၵ်ႊ ဝႃႈ ၵူၼ်းမိူင်းပႃႊၵိတ်ႊသ်တၢၼ်ႊ လၢႆလၢၼ်ႉၵေႃႉတိုၵ်ႉထူပ်းၽေးၼမ်ႉ ထူမ်ႈ လႄႈ လွင်ႈလူႉသုမ်းပၢႆးမၢၵ်ႈမီးယႂ်ႇလူင်။ ယွၼ်ႉၼၼ် ထုၵ်ႇလီလႆႈႁပ်ႉၵၢၼ်ၸွႆႈလိူဝ်ဝႆးဝႆးလႄႈ ဢမ်ႇထုၵ်ႇႁႂ်ႈၽေး သႃႇၽဝႃႉပွၵ်ႈၼႆႉ ပဵၼ်တိုဝ်ႉတၢင်း ၶွင်ၽူႈၵေႃႇၵၢၼ်ႁၢႆႉမႃးသူၼ်းတုမ်လႆႈ ဝႃႈၼႆ။

ပဵၵ်ႉသမ်ႉဝႃႈ သုၼ်သၢႆငၢႆၾႃႉၾူၼ် (Weather Forecast Center) ဝူၼ်ႉဝႃႈ ၾူၼ်တေၸၢင်ႈႁိူတ်ႇလႄႈ ၼမ်ႉ တေယွမ်းလူင်းၵေႃႈယဝ်ႉ ၵူၼ်းၼႂ်းပိုၼ်ႉတီႈၸိူဝ်းထုၵ်ႇၼမ်ႉထူမ်ႈႁၢဝ်ႉႁႅင်း ၼႂ်းမိူင်းပႃႊၵိတ်ႊသ်တၢၼ်ႊၼႂ်း ၶၢဝ်းတၢင်း 3 ဝူင်ႈမႃးၼႆႉ ယင်းႁဵတ်းႁႂ်ႈမီးၵူၼ်းတၢႆထိုင် 1,500 ၵေႃႉ လႄႈ တေမီးလွင်ႈတုမ်ႉတိူဝ်ႉၵႂႃႇထႅင်ႈလၢႆ လၢႆပီဝႃႈၼႆ။

ပၼ်းၶီးမုၼ်း ၽူႈပွင်ၵၢၼ်ၵူႈလွင်ႈလွင်ႈ ၸၢတ်ႈၸိုင်ႈလုမ်ႈၾႃႉ (UN) လၢတ်ႈတီႈပၢင်ၵုမ်ၶိုၵ်ႉတွၼ်းဝႃႈ ၽႄး သႃႇၽဝႃႉတီႈမိူင်း ပႃႊၵိတ်ႊသ်တၢၼ်ႊ ၼႆႉ ပဵၼ်ၵၢၼ်ထတ်းသၢင် လွင်ႈၽွမ်ႉႁူမ်ႈပွၵ်ႈယႂ်ႇသုတ်းၼႂ်း လုမ်ႈၾႃႉ လႄႈ မိူၼ်ဝႃႈ ပႃႊၵိတ်ႊသ်တၢၼ်ႊ တိုၵ်ႉထူပ်းၽေး သိုဝ်ႊၼမိ ဢၼ်ၽတ်ႉၶဝ်ႈမႃးလွႆးလွႆးဝႃႈ ၼႆ။

ၽၢႆႇ ၼၢင်းႁိဝ်ႊလႃႊရီႊ ၶလိၼ်ႊတၼ်ႊ (Hillary Clinton) ၽွင်းလူင်ၽၢႆႇၼွၵ်ႈမိူင်းဢမေႊရိၵၢၼ်ႊ တုၵ်း ယွၼ်းႁႂ်ႈၵူၼ်းမိူင်းဢမေႊရိၵၢၼ်ႊ လႄႈ ၵူၼ်းမိူင်းလုမ်ႈၾႃႉ ႁူမ်ႈၵၼ်ၸွႆႈထႅမ် မိူင်းပႃႊၵိတ်ႊသ်တၢၼ်ႊ ၼႂ်းၶၢဝ်းယၢမ်းတုၵ်ႉၵိၼ်း ဝႃႈၼႆ။