ၶၢဝ်ႇလုမ်ႈၾႃႉ
ဢမေႊရိၵၢၼ်ႊ လႄႈ ၵူဝ်ႊရီႊယိူဝ်ႊၸၢၼ်း ဢမ်ႇယွမ်းႁပ်ႉ ၵူဝ်ႊရီႊယိူဝ်ႊႁွင်ႇ
- Details
- Published on Friday, 07 January 2011 12:17
- Written by ႁဵဝ်းႁွမ်
ၵွပ်ႈလူင်ပွင်ၸိုင်ႈၵူဝ်ႊရီႊယိူဝ်ႊႁွင်ႇ ဢမ်ႇလႆႈႁၢင်ႈႁႅၼ်းဝႆႉတႅတ်ႈတႅတ်ႈတေႃးတေႃးသေတေၸတ်းပၢင်ၵုမ်လူင် ယဝ်ႉယိုၼ်ႈႁွင်ႉ မႃးလႄႈ ၾၢႆႇၵူဝ်ႊရီႊယိူဝ်ႊၸၢၼ်း ဢမ်ႇလႆႈၸႂ်ၸွမ်းဝႃႈၼႆ။
ၶိမ်ႊယၢင်ႊသၢၼ်ႊ (Kim Young-sun) ၽူႈၶၢၼ်ပၢၵ်ႇ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းၵူဝ်ႊရီႊယိူဝ်ႊ ၸၢၼ်း လၢတ်ႈဝႃႈ သင်ၵူဝ်ႊရီႊယိူဝ်ႊႁွင်ႇ မီးၼမ်ႉၸႂ်ၽိူၵ်ႇၸိုၼ်ႈယူႇတေႉၸိုင်ထုၵ်ႇလီႁဵတ်းၼႄၼမ်ႉၼႄတူဝ် လိူဝ်သေလၢတ်ႈဢွၵ်ႇသူပ်းယူႇ ပၢပ်ႈပၢပ်ႈ ၼႆ။
Kim Young- sun သိုပ်ႇလၢတ်ႈဝႃႈ ၵူဝ်ႊရီႊယိူဝ်ႊႁွင်ႇၼႆႉမိူဝ်ႈဢွၼ်တၢင်း ၶဝ်တွပ်ႇထဵင်ဝႃႈၶဝ်ဢမ်ႇမီးႁူင်းၸၢၵ်ႈ တႃႇၵူတ်ႇၸႅတ်ႈ ယူႊရေႊၼီႊယမ်ႊ။ ၵူၺ်းမိူဝ်ႈလဵဝ်သမ်ႉၶိုၼ်းပိုၼ်ၽၢဝ်ႇဝႃႈၶဝ်မီးယူႇ ၼႆ။ ဢၼ်ၶဝ်ႁဵတ်းယူႇ ယၢမ်းလဵဝ်ၼႆႉ မၼ်းၵႂႃႇသၢၼ်ၶတ်း ၵၼ်တင်းၵူႈမိူင်းမိူင်းတေႉ ယုမ်ႇယမ်ၼင်ႇၼႆ။
ၽူႈၶၢၼ်ပၢၵ်ႇႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းဢမေႊရိၵၢၼ်ႊ ၵေႃႉၼိုင်ႈလၢတ်ႈဝႃႈ တႃႇတေႁဵတ်းပၢင် ၵုမ်ဢုပ်ႇဢူဝ်းၵၼ်ၼၼ်ႉ လူဝ်ႇလႆႈမီးလွင်ႈတၢင်းမၼ်း။ မိူဝ်ႈဢွၼ်တၢင်းလူင်ပွင်ၸိုင်ႈၵူဝ်ႊရီႊယိူဝ်ႊႁွင်ႇယၢမ်ႈ လၢတ်ႈဝႃႈ ႁွင်ႈၵၢၼ်ၼိဝ်ႊၵလီႊယိူဝ်ႊၶဝ်ၼၼ်ႉတေ ယႃႉပႅတ်ႈၼႆ ၶဝ်ပၼ်ၵႂၢမ်းမၼ်းၵႅၼ်ႇဝႆႉလႄႈလွင်ႈၼႆႉ ၽွင်းလူင်ၾၢႆႇၼွၵ်ႈမိူင်း မိူင်းဢမေႊရိၵၢၼ်ႊၵေႃႈလႆႈၸႂ်ၸွမ်းယူႇ ဝႃႈၼႆ။
