ၶၢဝ်ႇလုမ်ႈၾႃႉ

ၶိၼ်ႊတႃႊၼႃႊတုၵ်းယွၼ်းႁႂ်ႈထတ်းထွင် လွင်ႈပူၼ်ႉပႅၼ် သုၼ်ႇလႆႈၵူၼ်းထႅင်ႈ

ပၢင်ၵုမ်ၶွင်ႊသီႊ သုၼ်ႇလႆႈသုၼ်ႇပဵၼ်ၵူၼ်းၸၢတ်ႈၸိုင်ႈလုမ်ႈၾႃႉ ဢၼ်ၸတ်းတီႈၵျီႊၼီႊပႃႊၸိုင်ႈ မိူင်းသဝိတ်ႊၸလႅၼ်ႊ မိူဝ်ႈဝၼ်းထိ 14.03.2011 ပူၼ်ႉမႃး ၼႆႉမိတ်ႊသတိူဝ်ႊၶိၼ်ႊတႃႊၼႃႊၽူႈတႅၼ်ႊၶိုၵ်ႉ တွၼ်းၸၢတ်ႈၸိုင်ႈလုမ်ႈၾႃႉ ၾၢႆႇသုၼ်ႇလႆႈသုၼ်ႇပဵၼ်ၵူၼ်း ၵပ်းသၢၼ်မိူင်းမၢၼ်ႈတုၵ်းယွၼ်းႁႂ်ႈၶွတ်ႇၽွတ်ႈ ၸုမ်းထတ်းထွင် လွင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းၸၢတ်ႈၸိုင်ႈလုမ်ႈၾႃႉမိူဝ်းထတ်းထွင်လွင်ႈ ၸုမ်းသိုၵ်းမၢၼ်ႈပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်း ၼႆ။

မိတ်ႊသတိူဝ်ႊ ၶိၼ်ႊတႃႊၼႃႊ လၢတ်ႈဝႃႈ လွင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းၼၼ်ႉတိုၼ်း လူဝ်ႇလႆႈ ၸွပ်ႇသွၵ်ႈထတ်းထွင်ဢွၵ်ႇယဝ်ႉ။ ၸုမ်းထတ်းထွင် ၼႆႉတေလႆႈပဵၼ်ၸုမ်းဢၼ်လွတ်ႈလႅဝ်း၊ ၸႂ်ယႂ်ႇယုမ်ႇယမ်လႆႈ၊ ဢမ်ႇၸွမ်းၾၢႆႇလႂ် ၸိူဝ်းၼႆႉ ၼႂ်းၶၢဝ်းတၢင်းၽႂ်းၽႂ်းၼႆႉယဝ်ႉ ဝႃႈၼႆ။

ၼွၵ်ႈသေၼၼ်ႉမိတ်ႊသတိူဝ်ႊ ၶိၼ်ႊတႃႊၼႃႊ လၢတ်ႈဝႃႈ ငဝ်းလၢႆးသုၼ်ႇလႆႈသုၼ်ႇပဵၼ်ၵူၼ်းမိူင်း မၢၼ်ႈ ၼႆႉ တိုၵ်ႉသိုပ်ႇႁၢႆႉႁၢဝ်ႉႁႅင်းမိူၼ်ၵဝ်ႇ၊ သင်ဝႃႈ ၸုမ်း လူင်ပွင်ၸိုင်ႈ မိူင်းမၢၼ်ႈၶဝ်ဢမ်ႇတင်ႈၸုမ်းထတ်းထွင်ဢၼ်ယုမ်ႇ ယမ်လႆႈလႄႈႁဵတ်းၵၢၼ်ၵႂႃႇၸိုင်ပဵၼ်ၼႃႈတီႈလုမ်ႈၾႃႉတေလႆႈၶဝ်ႈထတ်းထွင်ယဝ်ႉ၊လူဝ်ႇပွႆႇပၼ်ၵူၼ်းတူၵ်းၶွၵ်ႈ ၵၢၼ် မိူင်းတင်းမူတ်းၽႂ်းၽႂ်း၊လူင်ပွင်ၸိုင်ႈမႂ်ႇၶဝ်လူဝ်ႇပဵၼ်ႇ ပႅင် ပၵ်းပိူင် ဢၼ်မိပ်ႇငႅၼ်းၸုမ်းၾၢႆႇသၢၼ်ၶတ်း လႄႈ တူင်ႉၼိုင်ႁဵတ်းသၢင်ႈႁႂ်ႈသုၼ်ႇလႆႈသုၼ်ႇ ပဵၼ် ၵူၼ်းမီးလွင်ႈၶိုပ်ႈၼႃႈ မႃးၸဵမ်ၸိူဝ်းၼႆႉ ၼႆယဝ်ႉ။

မိတ်ႊသတိူဝ်ႊ ၶိၼ်ႊတႃႊၼႃႊ ၼႆႉပဵၼ်ၽူႈဢၼ်ပိုတ်ႇလၢတ်ႈလွင်ႈငဝ်းလၢႆး သုၼ်ႇလႆႈသုၼ်ႇပဵၼ် ၵူၼ်း မိူင်းမၢၼ်ႈၸႅင်ႈၸႅင်ႈ လႅင်းလႅင်းလႄႈ လႆႈၶၢမ်ႇတၢင်း လူင်ပွင်ၸိုင်ႈသိုၵ်းမၢၼ်ႈပိၵ်ႉႁၢမ်ႈမၼ်း ၸဝ်ႈၶဝ်ႈမိူင်းမၢၼ်ႈ တင်ႈတႄႇ ပီ 2010 လိူၼ် February ပုၼ်ႉမႃးၼႆယဝ်ႉ။ၼႂ်းပၢင်ၵုမ်ၶွင်ႊသီႊ သုၼ်ႇ လႆႈသုၼ်ႇပဵၼ်ၵူၼ်းၼႆႉ တူဝ်တႅၼ်းမိူင်းထႆး လႆႈတုၵ်း ယွၼ်း တီႈလူင်ပွင်ၸိုင်ႈမိူင်းမၢၼ်ႈဝႃႈ ႁႂ်ႈပိုတ်ႇပၼ်ဝႂ်ၶဝ်ႈမိူင်း ( ဝီႊသႃႊ) မိတ်ႊသတိူဝ်ႊ ၶိၼ်ႊတႃႊၼႃႊၶဝ်ႈမိူဝ်းထတ်းထွင်လွင်ႈသုၼ်ႇလႆႈ သုၼ်ႇပဵၼ် ၵူၼ်းၼႂ်းမိူင်းမၢၼ်ႈ ဝႃႈၼႆယဝ်ႉ။မိတ်ႊသ် မႃႊၵႃႊရႅတ်ႊ  ဝႅင်ႊတူဝ်တႅၼ်းလူင်ပွင်ၸိုင်ႈ မိူင်း ႁူမ်ႈတုမ် ဢမေႊရိ ၵၢၼ်ႊ လၢတ်ႈဝႃႈလူင်ပွင်ၸိုင်ႈ ဢမေႊရိၵၢၼ်ႊ တႄႉၵမ်ႉထႅမ် ၼႃႈၵၢၼ် မိတ်ႊ သတိူဝ်ႊ ၶိၼ်ႊတႃႊၼႃႊ တဵမ်တဵမ်ထူၼ်ႈထူၼ်ႈ လႄႈ ယိၼ်းလီႁပ်ႉတွၼ်ႈႁႂ်ႈမၼ်းၸဝ်ႈသိုပ်ႇ ႁပ်ႉၼႃႈတီႈပုၼ်ႈၽွၼ်း ႁဵတ်းၵၢၼ်ၵႂႃႇထႅင်ႈ ဝႃႈၼႆယဝ်ႉ။

ဢူးတၢၼ်ႉၵျေႃႊ တူဝ်တႅၼ်းၽၢႆႇလူင်ပွင်ၸိုင်ႈသိုၵ်းမၢၼ်ႈလၢတ်ႈဝႃႈ ငဝ်းလၢႆးသုၼ်ႇလႆႈသုၼ်ႇပဵၼ်ၵူၼ်း မိူင်းမၢၼ်ႈၼႆႉ လူင်ပွင်ၸိုင်ႈမိူင်းမၢၼ်ႈ ထတ်းထွင် ဢဝ်လိူင်ႈပၼ်တဵမ်တဵမ်ထူၼ်ႈထူၼ်ႈယူႇ၊ ဢၼ်မိတ်ႊသတိူဝ်ႊ ၶိၼ်ႊတႃႊၼႃႊ တၢင်ႇလၢတ်ႈၼႄၸိူဝ်းၼၼ်ႉ ဢမ်ႇမီးငဝ်ႈမီးႁၢၵ်ႈသင် ဝႃႈၼႆ။
သိုပ်ႇလၢတ်ႈဝႃႈ ၽိုၼ်လၢႆးငၢၼ်းၶွင် မိတ်ႊသတိူဝ်ႊ ၶိၼ်ႊတႃႊၼႃႊပႅၵ်ႈ 13၊ 14၊ 17 လႄႈ ၽိုၼ် လၢႆး ငၢၼ်းတင်းၽိုၼ်ၼႆႉ လၢတ်ႈၼႄဝႆႉလွင်ႈဢမ်ႇမၢၼ်ႇမႅၼ်ႈ မၼ်းလႄႈ ယွမ်းႁပ်ႉဢမ်ႇလႆႈ၊ၼႂ်းမိူင်းမၢၼ်ႈၼႆႉ လႆႈၸတ်းပၢင်လိူၵ်ႈတင်ႈဢၼ် ၸွမ်းၶွပ်ႇပိူင် မၢႆမီႈမၼ်းယဝ်ႉ၊ ၼႂ်းၶၢဝ်းတၢင်း 50 ၼႆႉ မီးသၽႃႊ ၵူၼ်းမိူင်းမႃး ယဝ်ႉ၊ တႄႇဢဝ်ပၢႆးပိင်ႇၺႃႇ တင်းသုၼ်ႇလႆႈသုၼ်ႇပဵၼ်ၵူၼ်းၸိူဝ်းၼႆႉၵေႃႈ လီ တဵမ်ထူၼ်ႈယူႇယဝ်ႉ ဝႃႈၼႆယဝ်ႉ။

တူဝ်တႅၼ်း လူင်ပွင်ၸိုင်ႈ မိူင်းၶႄႇၵေႃႈလၢတ်ႈဝႃႈ လွင်ႈသၢၼ်ၶတ်း မိပ်ႇငႅၼ်းလူင်ပွင်ၸိုင်ႈသိုၵ်း မၢၼ်ႈ ၼၼ်ႉ ဢမ်ႇႁၼ်လီၸွမ်း၊ လုမ်ႈၾႃႉထုၵ်ႇလႆႈယွမ်းႁပ်ႉ ပၢင်လိူၵ်ႈတင်ႈမိူင်းမၢၼ်ႈလႄႈလူင်ပွင် ၸိုင်ႈမႂ်ႇမိူင်းမၢၼ်ႈယူႇ ဝႃႈၼႆယဝ်ႉ။