ၶၢဝ်ႇလုမ်ႈၾႃႉ

ငဝ်းလၢႆးပၢင်တိုၵ်းၼႂ်းၸိုင်ႈတႆး သိုၵ်းမၢၼ်ႈတၢႆမၢတ်ႇၼမ် တေႃႉၵၼ်သူင်ႇႁူင်းယႃ

ပဵၵ်ႉသမ်ႉလူင်ပွင်ၸိုင်ႈဢၼ်ဢူးတဵင်းသဵင်ႇဢွၼ်ႁူဝ် မီးသၢႆငၢႆၶႂ်ႈဢုပ်ႇဢူဝ်းလွင်ႈငမ်းယဵၼ် ၸွမ်းၸုမ်း ယိပ်းၵွင်ႈၵၢင်ႇ သေတႃႉပၢင်တိုၵ်းၼႂ်းၸိုင်ႈတႆးလႄႈလၢႆလၢႆၸေႈမိူင်းယင်းပႆႇၵိုတ်း ပႆႇယဵၼ် သိုပ်ႇပဵၼ်ပၢင်တိုၵ်းလႄႈ ၼႂ်းပၢင်တိုၵ်းၼၼ်ႉ သိုၵ်းမၢၼ်ႈမၢတ်ႇတၢႆၼမ်ၼႆ။

မိူဝ်ႈဝၼ်းထိ 4.9.2011 ယၢမ်း 10:00 ပူၼ်ႉမႃးတပ်ႉသိုၵ်းၸိုင်ႈတႆး၊ တပ်ႉငဝ်ႈၸုမ်း (74) ႁဵတ်းသိုၵ်း မူၵ်းပႂ်ႉတိုၵ်း တပ်ႉသိုၵ်းမၢၼ်ႈၸုမ်းၼိုင်ႈ ဢၼ်လုၵ်ႉတၢင်းတပ်ႉၼမ်ႉပုၵ်းတီႈ ၶူဝ်မူဝ်ႇ ၽၢႆႇၸၢၼ်းဝၢၼ်ႈ ၵွင်းလၢင်း ဢိူင်ႇဝၢၼ်ႈဝၢပ်ႈ ၸေႈဝဵင်းၵေးသီး ႁိုင်မွၵ်ႈ 10 ၼႃးထီး။ ၼႂ်းပၢင်တိုၵ်း သိုၵ်းမၢၼ်ႈတၢႆ ထင်တီႈ 6 ၵေႃႉမၢတ်ႇၸဵပ်းတင်းၼမ်၊ ၽၢႆႇတပ်ႉသိုၵ်းၸိုင်ႈ တႆးလွတ်ႈၽေး။ ဝၢႆးပၢင်တိုၵ်းယဝ်ႉသိုၵ်း မၢၼ်ႈဢဝ် ၵူၼ်းမၢတ်ႇၶဝ်မိူဝ်းတီႈၵျွင်းမုၼ်ၸဝ်ႈ ဝၢၼ်ႈဝၢပ်ႈသေဢဝ်ၵႃးဢွၼ်ႇမႃးႁပ်ႉမိူဝ်းတၢင်းဝၢၼ်ႈ ၽႅတ်ႈ 5 လမ်းၼႆယဝ်ႉ။

ဝၼ်းထိ 4.9.2011 ယၢမ်း 11:30 မူင်းတပ်ႉသိုၵ်းၸိုင်ႈတႆး တပ်ႉႁူမ်ႇလူမ်ႈၸေႈဝဵင်းမၢႆ (10) ႁဵတ်း သိုၵ်းမူၵ်း လွမ်တိုၵ်းတပ်ႉသိုၵ်းမၢၼ်ႈတပ်ႉၵွင် 522 ဢၼ်မီးဢဵၼ်ႁႅင်း 24 ၵေႃႉ၊ ၽွင်း တပ်ႉမၢၼ်ႈ လုၵ်ႉၼူၵ်ႉၵူတ်း ဢွၵ်ႇလႄႇၽႅဝ်တီႈတၢင်းၽႄၼႃးႁိပ်ႇၵႄႈၵၢင် ၼႃးႁိပ်ႇလႄႈမွၵ်ႇ တွင်း ဢိူင်ႇမွၵ်ႇတွင်း ၸေႈဝဵင်းလႃႈသဵဝ်ႈ။ ၽၢႆႇသိုၵ်းမၢၼ်ႈတၢႆ 3 ၵေႃႉမၢတ်ႇၸဵပ်း 2 ၵေႃႉ ဢၼ်မၢတ်ႇၼၼ်ႉပႃးတင်းၸၼ်ႉ ၶုၼ်သိုၵ်းလူင် 1 ၵေႃႉ၊ ပီႇတုၸိတ်ႉ ႁၢင်ၼႃး 1 ၵေႃႉ၊ ၸိူဝ်း မၢတ်ႇၸဵပ်းၼၼ်ႉသိုၵ်းမၢၼ်ႈၶဝ်ဢဝ်မိူဝ်း တီႈႁူင်းယႃလႃႈသဵဝ်ႈသေသိုပ်ႇဢဝ်ပူၼ်ႉလူင်းၵႂႃႇ ယႃတူဝ်တီႈႁူင်းယႃသိုၵ်း မိင်ႇၵလႃႇတူင်ႇ ဝဵင်းလူင် တႃႈၵုင်ႈ၊ ၽၢႆႇတပ်ႉသိုၵ်းၸိုင်ႈတႆးလွတ်ႈ ၽေး ၼႆ။

မိူဝ်ႈဝၼ်းထိ 4.9.2011 ၼင်ႇၵဝ်ႇယၢမ်း 12:10 ၼႃးထီး တပ်ႉသိုၵ်းၸိုင်ႈတႆး တပ်ႉၵွင် (801) လႆႈပဵၼ် ပၢင်တိုၵ်းၵၼ်တင်းတပ်ႉသိုၵ်းမၢၼ်ႈဢဵၼ်ႁႅင်းၵူၼ်း 88 ၵေႃႉ ဢၼ်လုၵ်ႉမိူင်းသူႈ ဢွၵ်ႇမႃးၼွၼ်းလွႆ တင်ႈ လွႆၶမ်း မိူဝ်ႈဝၼ်းထိ 2.9.2011 ၼၼ်ႉသေ ၼႂ်းဝၼ်းထိ 4.9.2011 ၼႆႉၶိုၼ်းလုၵ်ႉလွႆတင်ႈ လွႆၶမ်း ဢွၵ်ႇၵႂႃႇတၢင်းဝၢၼ်ႈၽၵ်းၵီးသေ လႆႈပဵၼ်ပၢင်တိုၵ်းၵၼ်ၼႂ်း ၵႄႈဝၢၼ်ႈၽၵ်းၵီးလႄႈႁၢႆးႁွမ်ႈ ႁိမ်းႁၢႆးပႃ ၸေႈဝဵင်းမိူင်းသူႈ ႁိုင်မွၵ်ႈ 15 ၼႃးထီး ၽၢႆႇတပ်ႉ သိုၵ်း မၢၼ်ႈတၢႆ3 ၵေႃႉမၢတ်ႇၸဵပ်း 2 ၵေႃႉ ၽၢႆႇတပ်ႉသိုၵ်းၸိုင်ႈတႆး လွတ်ႈၽေးဝႃႈၼႆယဝ်ႉ။