ၶၢဝ်ႇလုမ်ႈၾႃႉ

ဢမေႊရိၵၢၼ်ႊ-တႃႊလီႊပၼ်ႊဢုပ်ႇဢူဝ်းလွင်ႈ ၵိုတ်းသိုၵ်းတီႈမိူင်းၵႃႊတႃႉ

မိူဝ်ႈဝၼ်းထိ 29.01.2012 ပူၼ်ႉမႃး ၸုမ်းၽွင်းတၢင်ဢုပ်ႇဢူဝ်းၶွင်လူင်ပွင်ၸိုင်ႈဢမေႊရိၵၢၼ်ႊ လႄႈ ၸုမ်း တႃႊ လီႊပၼ်ႊ တႄႇႁူပ်ႉထူပ်းဢုပ်ႇဢူဝ်းၵၼ်တီႈမိူင်းၵႃႊတႃႉ ပိူဝ်ႈတႃႇႁႃတိုဝ်ႉတၢင်း ၵိုတ်း သိုၵ်း လႄႈပၢင်တိုၵ်း ဢၼ်လႆႈတိုၵ်းတေႃးၵၼ်မႃးၶၢဝ်းႁိုင် ၼႂ်းမိူင်းဢၢပ်ႉၾ်ၵၢၼ်ႊၼိတ်ႉ သ်ထၢၼ်ႊ ၼႆ။

လိၵ်ႈပိုၼ်ၽၢဝ်ႇၼိဝ်ႊယွၵ်ႊထၢမ်းသ် (New York Times) ၶွင်ဢမေႊရိၵၢၼ်ႊလၢႆးငၢၼ်းဝႃႈၵၢၼ်ႁူပ်ႉထူပ်း ၵၼ်ၼႆႉ ပဵၼ်ၵၢၼ်တႄႇဢုပ်ႇဢူဝ်း ၶၵ်ႉတွၼ်ႈဢွၼ်တၢင်း ပိူဝ်ႈတႃႇသၢင်ႈလွင်ႈယုမ်ႇၸႂ် ၼိူဝ်ၵၼ် လႄႈပဵၼ် ၵၢၼ်သိူဝ်ႇတၢင်းတႃႇႁူပ်ႉထူပ်းၵၼ်ထႅင်ႈ ဝႃႈၼႆ။
ၽွင်းလဵဝ်ၵၼ်လူင်ပွင်ၸိုင်ႈ ဢၢပ်ႉၾ်ၵၢၼ်ႊၼိတ်ႉသ်ထၢၼ်ႊ မုင်ႈမွင်းဝႃႈ တူဝ်တႅၼ်းၶွင်လူင်ပွင်ၸို်င်ႈမိူင်းၵႃႊ တႃႉ ဢၼ်တေမႃးသူႇၸႂ်း ဝဵင်းၶႃးပူးလ် တႃႇတေသပ်းလႅင်း ပုၼ်ႈၽွၼ်းၶွင်တၢင်းသွင်ၽၢႆႇ ၼႂ်းၵၢၼ်ဢုပ်ႇဢူဝ်း။

လႅင်ႇၶၢဝ်ႇၼႂ်းလူင်ပွင်ၸိုင်ႈဢမေႊရိၵၢၼ်ႊလၢတ်ႈဝႃႈ ဢွၼ်တၢင်းၼႆႉ တူဝ်တႅၼ်းၸုမ်းတႃႊလီႊပၼ်ႊ မွၵ်ႈ 4-8 ၵေႃႉ လႆႈလုၵ်ႉတီႈမိူင်းပႃႊၵိတ်ႊသ်ထၢၼ်ႊမႃးတီႈမိူင်းၵႃႊတႃႉ ပိူဝ်ႈတႃႇတင်ႈလုမ်းၵၢၼ်မိူင်း တႃႇလီႊပၼ်ႊၸိူဝ်း ယူႇၼႂ်းမိူင်းဢၢပ်ႉၾ်ၵၢၼ်ႊၼိတ်ႊထၢၼ်ႊ လႄႈ ၵၢၼ်ဢုပ်ႇဢူဝ်းၵၼ်ပွၵ်ႈၼႆႉ လႆႈႁပ်ႉလွင်ႈႁၼ်လီလႆႈၸႂ်ၶွင် လူင်ပွင်ၸိုင်ႈပႃႊၵိတ်ႊသ်ထၢၼ်ႊ၊ မိူဝ်ႈဢွၼ်တၢင်းၼႆႉယၢမ်ႈၶၢတ်းၶႂၢင် ဢမ်ႇႁႂ်ႈၸုမ်းတႃႊလီႊပၼ်ႊ ၶဝ်ႈဢုပ်ႇဢူဝ်းဝႃႈၼႆ။