ၶၢဝ်ႇမိူင်းတႆး
ပီမႂ်ႇတႆး 2105 မိူင်းၵွၵ်ႇ
- Details
- Published on Tuesday, 07 December 2010 12:35
- Written by မွၵ်ႇသဵဝ်ႈ
မိူဝ်ႈဝၼ်းထီႉ 5.12.2010 ၼႆႉၸုမ်းၵဝ်ႉငဝ်ႈၽြႃႉထမ်ႊသႅင် ဢွၼ်ႁူဝ်ၼမ်းၼႃႈပီႈၼွင်ႉတႆးၸိူဝ်းသဝ်းယူႇၼႂ်း မိူင်း ၵွၵ်ႇ ၸိုင်ႈထႆးသေၸတ်းပၢင်ပွႆး ပီမႂ်ႇတႆး 2105 ၼီႈတီႈ ဝတ်ႉမႂ်ႇမိူင်းၵွၵ်ႇ (ၵုင်းထဵပ်ႈ)။
ၼႂ်းပၢင်ပွႆးမီးပၢင်မူၼ်ႈသိူဝ်း ၶေႉၶဵင်ႉႁွင်ႉၵႂၢမ်း၊ ၼေၶူဝ်းၼုင်ႈတင်းမႆ ၸၢဝ်းၶိူဝ်းတႆး လႄႈၼေတၢင်းၵႃႈ ၼူၵ်ႉတူဝ်း၊ မီးၵူၼ်းၶဝ်ႈႁူမ်ႈႁူဝ်ပၢၵ်ႇ။ ပၢင်ပွႆးတေႇၸဵမ် ဝၢႆးဝၼ်း တေႃႇထိုင်ၵၢင်ၶိုၼ်းလိုၵ်းယူႇယဝ်ႉ။ယွၼ်ႉပဵၼ်ဝၼ်းၶုၵ်း ထူပ်း ဝၼ်းၵိူတ်ႇၸဝ်ႈမုၼ်ယႂ်ႇၶုၼ်ႁေႃၶမ်း (မိူင်းထႆး) လႄႈ ၸၢဝ်းၶိူဝ်းတႆးၸိူဝ်းၶဝ်ႈႁူမ်ႈပၢင်ပွႆးဢွၼ်ၵၼ်ၼပ်ႉ ယမ် ယွင်ႈယေႃးဢဝ်ၵုင်ႇမုၼ်ၸဝ်ႈႁေႃၶမ်း ၼႂ်းၶၢဝ်းယၢမ်းလဵဝ်ၵၼ်တင်းပီႈၼွင်ႉ ထႆးၶဝ်ၸတ်းႁဵတ်းၼၼ်ႉယူႇ ယဝ်ႉ။
ၼွၵ်ႈသေၼၼ်ႉ ၼၢင်းသႅင်ပိၼ်း လႆႈလူၼေ ၽိုၼ်လိၵ်ႈၾၢၵ်ႇတွၼ်ႈထိုင် ပီႈၼွင်ႉတႆးဢၼ် ၸဝ်ႈၶူးလူင် Professor Dr. ၶမ်းမၢႆ ထမ်မသႃမိ ၾၢၵ်ႇတွၼ်ႈယွၼ်းသူးပၼ်ပီႈၼွင်ႉတႆးတင်းသဵင်ႈ။
ၼႂ်းၽိုၼ်လိၵ်ႈမၼ်းၸဝ်ႈၵၢဝ်ႇလၢတ်ႈဝႆႉ - “ ပီမႂႂ်ႇတႆးၼႆႉ ပဵၼ်ၶၢဝ်းယၢမ်း ဢၼ်ႁဝ်းၶုၵ်းၸႂ်လႆႈၵၼ်ႁူမ်ႈၸႂ် လဵဝ် ၵၼ်ၼၼ်ႉယဝ်ႉ။ ႁႂ်ႈပီမႂ်ႇပီၼႆႉ ပဵၼ်ဢဵၼ်ႁႅင်း ၵုမ်းပၼ်လွင်ႈၵတ်းယဵၼ်ႁဝ်းသေၵမ်း၊ ႁႂ်ႈပီမႂ်ႇပီၼႆႉ ပၼ်ဢဵၼ် ႁႅင်းပၢႆးပၼ်ႇၺႃႇ ပၢႆးႁူႉပၢႆးႁၼ်ၼုမ်ႇႁၢႆးၸၢႆးယိင်း ၼေႃႇတႅၼ်းၶိူဝ်းႁဝ်းၶဝ် ၶိုၼ်ႈယႂ်ႇမႂ်ႇသုင် ၸွမ်းၼင်ႇႁဝ်းၾၼ်ဝႆႉ ၼၼ်ႉ သေၵမ်း၊ ယဝ်ႉၵေႃႈႁႂ်ႈပီမႂ်ႇပီၼႆႉႁဵတ်းႁႂ်ႈတႆးႁဝ်းတိူဝ်းမီးႁႅင်းတႃႇၸွႆႈထႅမ် လုမ်ႈၾႃႉႁႂ်ႈလီသေဢွၼ်တွၼ်း သေၵဝ်ႇသေၵမ်း” ၸဵမ်ၸိူဝ်းၼႆႉယဝ်ႉ။
ၼွၵ်ႈသေၼၼ်ႉပီမႂ်ႇတႆး ဢၼ်ၸတ်းတီႈဝတ်ႉၵူႇတဝ်ႈ ဢိူင်ႇသီၽုမ်ႊ ၸေႈဝဵင်းမိူင်း ၸေႈတွၼ်ႈၵဵင်းမႆႇၸိုင်ႈထႆး မိူဝ်ႈဝၼ်းထိ 6-8/12/2010 တင်ႈတႄႇမိူဝ်ႈဝႃးၼႆႉၵေႃႈ ပီႈၼွင်ႉတႆးၶဝ်ႈႁူမ်ႈၸမ်မွၵ်ႈ 6ႇ000။ မီး မႄႈၶူးၶိူဝ်း သႅၼ် မႃးမွၵ်ႇလၢတ်ႈၶေႃႈၵႂၢမ်းၵဵဝ်ႇလူၺ်ႈလွင်ႈပိုၼ်းပဵၼ်မႃးပီမႂ်ႇတႆးလႄႈ ၽူႈႁွင်ႉၵႂၢမ်းၸိုဝ်ႈလိုဝ်းၼၢင်းၼၢင်း လႄႈ ၼၢင်းလၢဝ်လၢဝ်ဢိၵ်ႇတင်း ၽူႈႁွင်ႉၵႂၢမ်းလၢႆလၢႆၵေႃႉ တင်းဝူင်းတွႆႇတိုင်ႈမႂ်ႇသုင်ၵဵင်းတုင်မႃးၶဝ်ႈႁူမ်ႈတူၼ်ႈ ၸႂ်ပၼ်ပီႈၼွင်ႉၸိူဝ်းတူၵ်းႁွတ်ႈၵဵင်းမႆႇ ၸိုင်ႈထႆးၵႂႃႇယူႇယဝ်ႉ။
