ၶၢဝ်ႇမိူင်းတႆး

ႁွင်ႈ​ၵၢၼ်​ပၢႆး​ပ​ၺႃႇ သိုဝ်ႇ​ႁႅင်း​ၼုမ်ႇ​လူင်း​ပၢင်​သွၼ် လုၵ်ႈ​ႁဵၼ်း ပွၵ်ႈ​ၵမ်း​သွင်

မိူဝ်ႈ​ဝၼ်း​ထီႉ 5 လိူၼ် March ပီ 2011 ၼႆႉ​ႁွင်ႈ​ၵၢၼ်​ပၢႆး​ပ​ၺႃႇ ၸုမ်း​သိုဝ်ႇ​ႁႅင်း​ၼုမ်ႇ​လႆႈ​ၸတ်း​ပၢင်​လူင်း​ပၢင် သွၼ်​ၵႂႃႇ ၼႂ်း​ၸေႈ​တွၼ်ႈ​ၵဵင်း​မႆႇ တီႈ​ၼိုင်ႈ မီး​ၽူႈ​ၶဝ်ႈ​ႁူမ်ႈ​တင်း​မူတ်း​ၸမ် 300 ။

ႁွင်ႈ​ၵၢၼ်​ပၢႆး​ပ​ၺႃႇ ၸုမ်း​သိုဝ်ႇ​ႁႅင်း​ၼုမ်ႇ လႆႈ​ဢဝ်​လုၵ်ႈ​ႁဵၼ်းၼႂ်း​ပိုၼ်ႉ​တီႈ တႃႇ 8 ပိုၼ်ႉ​တီႈ 11 ႁွင်ႈ​ႁဵၼ်း​မႃး​ႁူမ်ႈ တီႈ​လဵဝ်​သေ ၸတ်း​ပၢင်​လူင်း ပၢင်​သွၼ်​ၵႂႃႇ။ ၽႃႇ​သႃႇ​ၵၢၼ်​ႁဵၼ်းၼႂ်း​ပၢင်​သွၼ်​မီး လိၵ်ႈ​တႆး၊ ဢင်း ၵိတ်း​လႄႈ​ပၢႆး ၼပ်ႉ။ ၼွၵ်ႈ​သေ​ၼၼ်ႉ ယင်း​လႆႈ​သွၼ်​ပႃး​လၢႆး ႁွင်ႉ​ၵႂၢမ်း၊ ဢၢၼ်ႇ​ဝွၵ်း တႅမ်ႈ​ဝွၵ်း​ၽၢႆႇ​တႆး​လႄႈ​တၢင်း​ၵႃး ၸိူဝ်း ၼႆႉ။

တႃႇ​ၵူၼ်း​လူင်​ၸိူဝ်း​ၽူႈ​သူင်​လဵပ်ႈ​ႁဵၼ်း​လႄႈ ပေႃႈ​မႄႈ​လုၵ်ႈ​ဢွၼ်ႇ​ၶဝ်​သမ်ႉ လႆႈ​သွၼ်​ပၼ်​လိၵ်ႈ​ထႆး ၊လိၵ်ႈ တႆး လႄႈ ပိုၼ်ႉ​ထၢၼ်​ဢင်း​ၵိတ်ႉ။ လႆႈ​ပိုတ်ႇ​သွၼ်​ပၼ် ပီႈ​ၼွင်ႉ​တႆး ၸိူဝ်း​ပႆႇ​ယၢမ်ႈ​ႁဵၼ်း​မႃး လႄႈ​ဢမ်ႇ​မီး​တိုဝ်ႉ​တၢင်း တႃႇ​ႁဵၼ်း​ၸိူဝ်း​ၼၼ်ႉ။ ၵမ်ႉ​ၼမ်​ပိုတ်ႇ​သွၼ်​ပၼ်​ပီႈ​ၼွင်ႉ​ႁႅင်း​ၵၢၼ် ၸိူဝ်း​ႁဵတ်း​ၵၢၼ်ၼႂ်း​ၶႅမ်ႉ ၵေႃႇ သၢင်ႈ။

လုင်း​သႅင်​ၸိုၼ်ႈ ၽူႈ​ထတ်း​လိၵ်ႈ​ၾၢႆႇ​တႆး/မၢၼ်ႈ ၸုမ်း​ၽူႈ​တွႆႇ​ႁွၵ်ႈ​မွၵ်ႇ​လၢတ်ႈ​ၶေႃႈ​ၵႂၢမ်း​ပိုတ်ႇ​ပၢင်​ဝႃႈ “ ပၢႆး​ဝူၼ်ႉ ယူႇ​တီႈ​မိူင်း​ႁဝ်း ႁႂ်ႈ​လုၵ်ႈ​ႁဵၼ်း ႁူႉ​ၸၵ်း​တူဝ်​ၵဝ်ႇ ပေႃး​ဢမ်ႇ​မိူၼ်​ပိူၼ်ႈ ယႃႇ​ႁဵတ်း​ယိူင်ႈ​ပိူၼ်ႈ။လုၵ်ႈ​ဢွၼ်ႇ​ပဵၼ် ပုၼ်ႈ​တႃႇ​ဝၢၼ်ႈ​မိူင်း​ႁဝ်း လႄႈ​ပဵၼ်​ၵူၼ်း​ၼုမ်ႇ​မိူဝ်း​ၼႃႈ” ဝႃႈ​ၼႆ။

သိုပ်ႇ​ၽၢၵ်ႇ​ၶေႃႈ​ၵႂၢမ်း​ထိုင်​လုၵ်ႈ​ဢွၼ်ႇ လုၵ်ႈ​ႁဵၼ်း​ၶဝ်​ဝႃႈ ႁႂ်ႈ​ႁဵတ်း​ၸွမ်း​တၢင်း​ၶတ်းၸႂ်၊ ဢမ်ႇ​ႁဵတ်း​ၸွမ်းၸႂ် တေ ၶတ်းၸႂ်​ႁဵတ်း​လွင်ႈ​ထုၵ်ႇ​မႅၼ်ႈ ဢမ်ႇ​ႁဵတ်း​ၸွမ်း​ထုၵ်ႇၸႂ် ၼႆ​ယူႇ​ယဝ်ႉ။ တႃႇႁႂ်ႈ ပီႈ​ၼွင်ႉ​ႁႅင်း​ၵၢၼ်​ႁူႉ​ႁၼ်​ထိုင်​ၵႃႈ ၶၼ်​ပၢႆး​ပ​ၺႃႇ လႄႈ​လုၵ်ႈ​လၢင်း​မီး​တၢင်း​ယၢမ်ႈ​တူဝ်​ထူပ်း​လီ ၸိူဝ်း​ၼၼ်ႉ​ၵေႃႈ​လမ်ႇ​လွင်ႈ​တေႉ။

ၸၢႆး​မႅဝ်း​ဢွၼ်ႇ ၽူႈ​ၵွၼ်း​ႁွင်ႈ​ၵၢၼ် ပၢႆး​ပ​ၺႃႇ​လၢတ်ႈ​ဝႃႈ “ တၢင်း​ယိူင်း​ဢၢၼ်း​လွင်ႈ​လႆႈ​ၸတ်း​ပၢင်​လူင်း​ပၢင်​သွၼ် ပွၵ်ႈ​ၵမ်း​ၼႆႉ​တႄႉ​တွၼ်ႈ​တႃႇႁႂ်ႈ​တၢင်ႇ​မူႇ​တၢင်ႇ​ၸုမ်း​မႃး​ႁၼ် လွင်ႈ​တူင်ႉ​ၼိုင် သိုဝ်ႇ​ႁႅင်း​ၼုမ်ႇ၊တႃႇႁႂ်ႈ​လုၵ်ႈ​ဢွၼ်ႇ လႄႈ ၵူၼ်းၼႂ်း​ပိုၼ်ႉ​တီႈ မႃး​ႁၼ်​ထိုင်​တၢင်း​လမ်ႇ​လွင်ႈ​ပၢႆး​ပ​ၺႃႇ တွၼ်ႈ​တႃႇႁႂ်ႈ​လုၵ်ႈ​ဢွၼ်ႇ​မီး​တူဝ်​ထူပ်းၼႂ်း ၵၢၼ် ၸတ်း​ပၢင်​ပွႆး”  ဝႃႈ​ၼႆ ။

ႁွင်ႈ​ၵၢၼ်​ပၢႆး​ပိင်ႇ​ၺႃႇ​ၼႆႉ တေႇ​မႃး​မိူဝ်ႈ​ပီ 2003 သွၼ်​တီႈ​ဝတ်ႉ​ပႃႇ​ပဝ်ႉ​ၸေႈ​တွၼ်ႈ​ၵဵင်း​မႆႇ​ပွၵ်ႈ​ဢွၼ်​တၢင်း သုတ်း။ မိူဝ်ႈ​ၼၼ်ႉ​တေႉ တေႇ​သွၼ်​ပၼ်​ၵူၼ်း​ၼုမ်ႇ​ၵူၺ်း ပႆႇ​ပႃး​လုၵ်ႈ​ဢွၼ်ႇ​ဝၢႆး​မႃး​ၸင်ႇ​လႆႈ​လူင်း​ၵႂႃႇ​သွၼ်ၼႂ်း ပိုၼ်ႉ​တီႈ​ၵေႃႈ​သၢင်ႈ​ပိူဝ်ႈ​တႃႇ​သွၼ်​ပၼ်​လုၵ်ႈ​ဢွၼ်ႇ​တႆး​ၸိူဝ်း​ဢမ်ႇ​မီး​တိုဝ်ႉ​တၢင်း​လႆႈ​ႁဵၼ်း​လိၵ်ႈ​ၸဝ်ႈ​ၵဝ်ႇ လႄႈ ၾိင်ႈ​ထုင်း​တူဝ်​ၵဝ်ႇ ဝႃႈ​ၼႆ​ယဝ်ႉ။

ပၢင်​လူင်း​ပၢင်​သွၼ် လုၵ်ႈ​ႁဵၼ်း​သိုဝ်ႇ​ႁႅင်း​ၼုမ်ႇ ပွၵ်ႈ​ၼႆႉ ပဵၼ်​ပွၵ်ႈ​ထီႉ​သွင်။ ပွၵ်ႈ​ထီႉ ၼိုင်ႈ​တေႉ​လႆႈ​ၸတ်း​ႁဵတ်း ၵႂႃႇ​မိူဝ်ႈ​ပီ​ၵၢႆ​ပူၼ်ႉ​မႃး။