ၶၢဝ်ႇမိူင်းတႆး
သတိပ်ႉၾ် ၸွပ်ႊ ဢွၵ်ႇၵၢၼ်ပဵၼ် ႁူဝ်ၼႃႈ CEO Apple ယဝ်ႉ!
- Details
- Published on Friday, 26 August 2011 19:47
- Written by ယွတ်ႈတႆး
တေလႆႈဝႃႈဝူင်းၵၢၼ် IT တုမ်ႉယွၼ်ႈတေႉတေႉ မိူဝ်ႈၽူႈဢွၼ်ႁူဝ် Apple ဢၼ်ထုၵ်ႇလၢတ်ႈထိုင် ၼမ်သုတ်း ၵေႃႉၼိုင်ႈ မိူၼ်ၼင်ႇ သတိပ်ႉၾ် ၸွပ်ႊ (Steve Jobs) ယွၼ်းထွၼ်တူဝ်ဢွၵ်ႇၵၢၼ်ပဵၼ်ၽူႈၼမ်းၼႂ်ၶၢဝ်းယၢမ်း ပၢႆးမၢၵ်ႈမီး Apple ၶိုၼ်ႈသင်ႉသုင်သုတ်း။
သတိပ်ႉၾ် ၸွပ်ႊ တႅမ်ႈလိၵ်ႈယွၼ်းဢွၵ်ႇၵၢၼ်ပဵၼ် CEO Apple မိူဝ်ႈဝၼ်းထိ 24/08/11 ပူၼ်ႉမႃး။ ၼႂ်းၽိၼ်လိၵ်ႈ ၼၼ်ႉတႅမ်ႈဝႆႉၶေႃႈၵႂၢမ်းတွၼ်ႈၼိုင်ႈဝႃႈ “ၶႃႈယၢမ်ႈလၢတ်ႈဝႃႈ ဝၼ်းဢၼ်ၶႃႈဢမ်ႇၸၢင်ႈ သိုပ်ႇပဵၼ် ၽူႈၼမ်းၶွင် Apple ၵႂႃႇထႅင်ႈၼၼ်ႉ ၶႃႈတေပဵၼ်ၵေႃႉဢွၼ်တၢင်းဢၼ်လၢတ်ႈၼႄသူ၊ လႄႈဝၼ်းၼၼ်ႉၵေႃႈမႃး ထိုင်ယဝ်ႉ။ ၵူၺ်းသင်တၢင်း ၸုမ်းႁၼ်လီ ၶႃႈတေသိုပ်ႇပဵၼ်ၽူႈၸွႆႈၵၢၼ် Apple ၵေႃႉၼိုင်ႈၵႂႃႇ” ဝႃႈၼႆ။
ၸိူင်ႉႁိုဝ်ၵေႃႈလီၵၢၼ်ဢွၵ်ႇၵၢၼ်ၶွင် သတိပ်ႉၾ် ႁဵတ်းႁႂ်ႈမီးလွင်ႈတုမ်ႉတိူဝ်ႉတေႃႇပၢႆးမၢၵ်ႈမီးၾႆႇ IT ၶွင်မိူင်းဢမေႊရိ ၵၢၼ်ႊ ၵမ်းလဵဝ်။ မိူၼ်ၼင်ႇ ၼႂ်းဝၼ်းထိ 26/08/11 ဝၼ်းလဵဝ်ၵူၺ်းၵၢၼ်သိုဝ်ႉၶၢႆႁုၼ်ႉၾႆႇ IT ၶွင်မိူင်းဢမေႊရိ ၵၢၼ်ႊ လူတ်းယွမ်းလူင်း 1.5% - 1.9 % ဝႃႈၼႆယဝ်ႉ။
ၽူႈဢွၼ်ႁူဝ်မႂ်ႇၵေႃႉတေမႃးတၢင်တူဝ် သတိပ်ႉၾ် ၸွပ်ႊ ၼၼ်ႉ တၢင်းၸုမ်း APPLE လႆႈမၵ်းမၼ်ႈပဵၼ် ထိမ်းၶုၵ်ႉ (Tim CooK) ၵေႃႉပဵၼ်ၵႅမ်ႁူဝ်ၼႃႈ လႄႈမၼ်းၸဝ်ႈလႆႈႁဵတ်းၵၢၼ်တႅၼ်း သတိပ်ႉၾ် ၸွပ်ႊ မႃးႁိုင်ၽွင်ႈယဝ်ႉ။ တူဝ်မၼ်းၸဝ်ႈ ၵူၺ်းၵေႃႈမီးၸိုဝ်ႈသဵင်လႄႈပဵၼ်ၵူၼ်းလမ်ႇလွင်ႈၵေႃႉၼိုင်ႈ ဢၼ်ၸွႆႈႁႂ်ႈၸုမ်း Apple ၶိုၼ်ႈသင်ႉ မႃးထိုင်ဝၼ်းမိူဝ်ႈၼႆႉၼႆ။
ၼႂ်းပီ 1997 ၵၢၼ်ပၢႆးမၢၵ်ႈမီးၶွင် Apple လူမ်ႉၸူမ် သေ သတိပ်ႉၾ် ၸွပ်ႊ ပဵၼ်ၽူႈဢွၼ်ႁူဝ်ဢၼ်ႁဵတ်းသၢင်ႈႁႂ်ႈ ၶိုၼ်းလီ ၶိုၼ်ႈမႃးယဝ်ႉ ဢွၼ်ၸုမ်းပႆထိုင်တီႈလမ်ႇလွင်ႈၶိုၼ်ႈသင်ႉသုင်သုတ်း ဝၢႆးၵၢၼ်ဝၢင်းၶၢႆ iPod, iPhone, iPad ၸဵမ်ၸိူဝ်းၼႆႉ။ ၼွၵ်ႈသေၼၼ်ႉမၼ်းၸဝ်ႈယင်းပၢႆပဵၼ်ၵူၼ်းၵိုၵ်းပိုၼ်းၶွင်ၼႂ်းဝူင်းၵၢၼ် IT လုမ်ႈၾႃႉၵႂႃႇ။ ၵူၺ်းမိူဝ်ႈပူၼ်ႉမႃးတၢင်းၸုမ်း APPLE ဢမ်ႇတွၼ်ႉပိုၼ်ၽၢဝ်ႇလွင်ႈပၢႆးယူႇလီမၼ်းၸဝ်ႈ မိူၼ်ၼင်ႇမိူဝ်ႈပီ 2009 ၼၼ်ႉမၼ်းၸဝ်ႈလႆႈၵႂႃႇၽႃႇတတ်းလၢႆႈ တပ်းဢွၼ်ႇ လႄႈလွင်ႈဢွၵ်ႇၵၢၼ်ပဵၼ်ႁူဝ်ၼႃႈပွၵ်ႈၼႆႉ လၢႆၽၢႆႇလၢမ်းၶၢတ်ႈ ဝႃႈ မၼ်းၸဝ်ႈၶႂ်ႈၸႂ်ႉၶၢဝ်းယၢမ်းယူတ်းယႃတူဝ် ဝႃႈၼႆယဝ်ႉ။
