ၶၢဝ်ႇမိူင်းတႆး

ၵူၼ်းမိူင်းပွတ်းႁွင်ႇ ပွတ်းၵၢင် 30,000 ပၢႆထူပ်းတၢင်း ၽိုတ်ႇလိူဝ်ႁႅင်း ယွၼ်ႉသိုၵ်းမၢၼ်ႈ သိုပ်ႇပိုတ်ႇ ပၢင်တိုၵ်း

မိူဝ်ႈဝႃးၸုမ်းၵပ်းသၢၼ်လွင်ႈၼၢင်းယိင်းတႆး  လႄႈ ၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး  ႁူမ်ႈၵၼ်ဢွၵ်ႇလိၵ်ႈပိုၼ် ၽၢဝ်ႇလွင်ႈၵူၼ်းမိူင်းတႆးပွတ်းႁွင်ႇပွတ်းၵၢင်ထူပ်း တၢင်းယၢပ်ႇၽိုတ်ႇ သၢမ်မိုၼ်ႇပၢႆ ယွၼ်ႉသိုၵ်းမၢၼ်ႈသိုပ်ႇပိုတ်ႇပၢင် တိုၵ်း။

ဝၼ်းထိ 10.8.2011 မိူဝ်ႈဝႃး ၸုမ်းၵပ်းသၢၼ်လွင်ႈၼၢင်းယိင်းတႆး SWAN လႄႈ ၸုမ်းၵဝ်ႉငဝ်ႈ သုၼ်ႇ လႆႈၵူၼ်း ၸိုင်ႈတႆး SHRF လႆႈႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇ လွင်ႈ ၵူၼ်းမိူင်းၸိုင်ႈတႆးပွတ်း ႁွင်ႇလႄႈပွတ်းၵၢင် ၵူၼ်းမိူင်းၸိူဝ်းယူႇၼႂ်း 9 ၸေႈဝဵင်း ႁူဝ်ၵူၼ်းမွၵ်ႈ 31,700 ထူပ်းတၢင်းယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ် တီႈယူႇ တၼ်းသဝ်းႁၢဝ်ႉႁႅင်းလိူဝ်ၸႂ် တင်ႈတႄႇၽွင်းသိုၵ်းမၢၼ်ႈပိုတ်ႇ ၼႃႈသိုၵ်းတေႃႇၸုမ်း တပ်ႉသိုၵ်းၸိုင်ႈတႆး SSPP/SSA မိူဝ်ႈလိူၼ်မျၢတ်ႉၶျ် 2011 မႃးထိုင် ယၢမ်းလဵဝ် ၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇတႅမ်ႈပႃးဝႃႈတင်ႈတႄႇပဵၼ်ပၢင်တိုၵ်းမႃးပီႈၼွင်ႉၵူၼ်းမိူင်းသၢမ် မိုၼ်ႇပၢႆၸိူဝ်းယူႇၼႂ်း 9 ၸေႈဝဵင်းၸိူဝ်း ၼႆႉ လႆႈပၢႆႈၶၢႆႉဝၢၼ်ႈ ပဵၼ်ၵူၼ်းပၢႆႈၽေး၊ ၵူၼ်းမိူင်းၵမ်ႈၽွင်ႈပၢႆႈၵႂႃႇယူႇၼႂ်းဝဵင်း၊ ၵမ်ႈၽွင်ႈပၢႆႈၵႂႃႇယူႇၼႂ်းၼႃႈတီႈ ဢုပ်ႉပိူင်ႇ “ဝ” ႁိမ်းႁွမ်းလႅၼ်လိၼ်မိူင်းၶႄႇ၊ ၵမ်ႈၽွင်ႈပၢႆႈမႃးတၢင်းလႅၼ် လိၼ်မိူင်းထႆးလႄႈမၢင် ၸိူဝ်းတိုၵ်ႉမူၵ်းသဝ်းယူႇဝႆႉၼႂ်း ထိူၼ်ႇ ၸွမ်းႁိမ်းႁွမ်းဝၢၼ်ႈၽႂ်မၼ်းသေ ထူပ်းတၢင်း ယၢပ်ႇၽိုတ်ႇ ၶဝ်ႈၼမ်ႉတၢင်းၵိၼ်တီႈယူႇတၼ်းသဝ်းၸိူဝ်းၼႆႉႁၢဝ်ႉ ႁႅင်းၼႆယဝ်ႉ။

ၼၢင်းသႅင်မူၼ်း ၽူႈၵွၼ်းၵၢၼ်မုၵ်ႉၸုမ်းၸုမ်းၵပ်းသၢၼ်လွင်ႈၼၢင်းယိင်းတႆးလၢတ်ႈ ဝႃႈ “ သင်တပ်ႉ သိုၵ်းမၢၼ်ႈတိုၵ်ႉ ၵုမ်းထိင်းယိပ်းၵမ်ၸုမ်းၸွႆႈထႅမ်ၼွၵ်ႈမိူင်းဢၼ်မီး ၼႂ်းမိူင်းမၢၼ်ႈၸိူဝ်းၼၼ်ႉယူႇၸိုင် မီးလွၵ်းလၢႆးၸွႆႈထႅမ်ဢၼ်လတ်း ၶၢမ်ႈတၢင်းလႅၼ် လိၼ်ၼႆႉၵူၺ်းယဝ်ႉ ဢၼ်တေၸၢင်ႈႁွတ်ႈထိုင်တီႈၵူၼ်းမိူင်းၸိူဝ်းထူပ်းတၢင်းယၢပ်ႇ ၽိုတ်ႇလႆႈ။ ႁဝ်းၶႃႈတုၵ်းယွၼ်းႁႂ်ႈၸဝ်ႈငိုၼ်းထုၼ်းၵူႈမိူင်းမိူင်းၶဝ်ၸွႆႈထႅမ်ပၼ်တၢင်း ယၢပ်ႇၽိုတ်ႇၵူၼ်းမိူင်းတႆးဝႆးဝႆးဢွၼ်တၢင်း သၢႆၸႂ်ၵူၼ်းမိူင်းတေလူႉသုမ်းၵႂႃႇၼမ်လိူဝ် ၼႆႉ” ၼႆယဝ်ႉ။

ၼွၵ်ႈသေၼၼ်ႉၼႂ်းလိၵ်ႈပိုၼ်ၽၢဝ်ႇတႅမ်ႈပႃးဝႃႈၵူၼ်းမိူင်းၸိူဝ်းမူၵ်းသဝ်းယူႇၼႂ်း ထိူၼ်ႇၸိူဝ်းၼၼ်ႉ ပီၼႆႉသမ်ႉပဵၼ် ၶၢဝ်းႁိုဝ်ႉ (ၶိင်ႇၽူၼ်)ႁၢဝ်ႉႁႅင်းလႄႈလႆႈထူပ်း တၢင်းယၢပ်ႇၽိုတ်ႇၵဵဝ်ႇလူၺ်ႈၶဝ်ႈၼမ်ႉ တၢင်းၵိၼ်၊ ဢမ်ႇမီးၼမ်ႉမူတ်း သႂ်တႃႇၵိၼ်၊ ဢမ်ႇမီးတီႈယူႇတၼ်းသဝ်းဢိၵ်ႇတင်းယႃႈယႃ ၸိူဝ်းၼႆႉလႄႈမိူဝ်ႈလိူၼ်ပူၼ်ႉမႃးၼႆႉ မီးၵူၼ်းမိူင်းၸိူဝ်း ယူႇသဝ်းႁိမ်းႁွမ်းဝၢၼ်ႈႁႆးမွၵ်ႈ 24 ၵေႃႉလႆႈတၢႆယွၼ်ႉတၢင်းပဵၼ် တွင်ႉၵႂႃႇ၊ တွင်ႉႁႄႈ၊ ၼၢဝ်ၼူၵ်ႉၸိူဝ်းၼႆႉ။ ၵမ်ႈၼမ်ပဵၼ် လုၵ်ႈဢွၼ်ႇ လႄႈၵူၼ်းထဝ်ႈ ဝႃႈၼႆယဝ်ႉ။

ၽွင်းလိူၼ်မၢတ်ႉၶျ်ပူၼ်ႉမႃးသိုၵ်းမၢၼ်ႈယႃႉလႅဝ်ပႅတ်ႈလွင်ႈၵိုတ်းသိုၵ်းငမ်းယဵၼ်တင်းၸုမ်းတပ်ႉသိုၵ်း ၸိုင်ႈတႆး SSPP/SSA သေပိုတ်ႇၼႃႈသိုၵ်းတေႃႇတပ်ႉသိုၵ်းၸိုင်ႈတႆး ၸုမ်းၵိုတ်းသိုၵ်းမႃးၶၢဝ်းတၢင်း 5 လိူၼ်ပၢႆ။ ၼင်ႇႁိုဝ်တေၶဝ်ႈတိုၵ်းယိုတ်း ဢဝ်ငဝ်ႈငုၼ်း တပ်ႉသိုၵ်းၸိုင်ႈတႆးပွတ်းႁွင်ႇ ဝၢၼ်ႈႁႆးလႆႈ ၼၼ်ႉ ၼႂ်းၶၢဝ်းတၢင်းလိူၼ်ၵျူႊလၢႆႊၼႆႉ သိုၵ်းမၢၼ်ႈလႆႈသူင်ႇ သိုၵ်းၶဝ် 4,000 ပၢႆဢၼ်လုၵ်ႉတီႈ 42 တပ်ႉၵွင် မႃးလႄႈႁိူဝ်း မိၼ်သိုၵ်းလၢႆလမ်းၶဝ်ႈပၵ်းသဝ်းလွမ်ႉႁွပ်ႈဝၢၼ်ႈႁႆးသေ ပၼ်လွင်ႈထၢင်ႇသိုၵ်းမၢၼ်ႈ ၶဝ်တဵၵ်းတဵင်လူလၢႆၵူၼ်းမိူင်း မိူၼ်ၼင်ႇၶႃႈႁႅမ်တႆ၊ ၵၼ်ႉၸၼ်လူလၢႆ၊ ပေႃႉထုပ်ႉၶႃႈႁႅမ်၊ ဢဝ်ၶူဝ်းၶွင် ၵူၼ်းမိူင်းၸိူဝ်းၼႆႉ ဝႃႈၼႆယဝ်ႉ။