ၶၢဝ်ႇမိူင်းတႆး

ၶုၵ်းထူပ်းဝၼ်းၵိူတ်ႇ ပိုၼ်းတၢင်း ႁၵ်ႉ ၶုၼ်သၢမ်လေႃး ၼၢင်းဢူးပဵမ်ႇ

ပီႈၼွင်ႉတႆးၵဵင်းမႆႇ ၸတ်းပၢင်ပွႆး ဝၼ်းၵိူတ်ႇပိုၼ်းတၢင်းႁၵ်ႉ ၶုၼ်သၢမ်လေႃး လႄႈ ၼၢင်းဢူးပဵမ်ႇ ၼႂ်းၸိုင်ႈထႆး မီးပီႈၼွင်ႉၸၢဝ်းတႆးၸဵမ်ၵူၼ်းၼုမ်ႇ ၵူၼ်းထဝ်ႈ ၶဝ်ႈႁူမ်ႈမူၼ်ႈၸႂ်ၵိုၼ်းၶွၼ်ႈၼမ်။

မိူဝ်ႈဝၼ်းထိ 25-26 January, 2012 တူၵ်းမႅၼ်ႈလိူၼ်သၢမ်မႂ်ႇ 2-3 ၶမ်ႈ ပီတႆး 2106။ ၸုမ်းၶိူဝ်းႁိူၼ်းပီႈၼွင်ႉတႆး ၶုၼ်သၢမ်လေႃး ပီႈၼွင်ႉတႆးဝဵင်းၵဵင်းတွင်း ၸိူဝ်းတူၵ်းႁွတ်ႈယူႇသဝ်း ၼႂ်းမိူင်းထႆးလႆႈႁူမ်ႈၵၼ်ၸတ်းႁဵတ်း ပၢင်ပွႆး ၶုၵ်းထူပ်း ဝၼ်းၵိူတ်ႇပိုၼ်းတၢင်းႁၵ်ႉ ၶုၼ်သၢမ် လေႃး လႄႈ ၼၢင်းဢူးပဵမ်ႇ (ၼၢင်းဢူဝ်ႈပဵမ်ႇ) တီႈဝတ်ႉၵူႇတဝ်ႈ ဢိူင်ႇသီၽုမ်း ၸေႈဝဵင်းမိူင်း ၸေႈတွၼ်ႈၵဵင်းမႆႇ ၸိုင်ႈထႆး။ မီးပီႈၼွင်ႉတႆးၵဵင်းတွင်းလႄႈ လၢႆလၢႆၸေႈဝဵင်း ၼႂ်းၸိုင်ႈတႆးၸိူဝ်း ႁဵတ်းၵၢၼ်ယူႇၼႂ်းၵဵင်းမႆႇၶဝ်ႈႁူမ်ႈ တင်းၼမ်တေႉတေႉ။

ၼႂ်းဝၼ်းထိ 25.01.2012 ၵၢင်ၶမ်ႈ 08:00 မူင်း မေႃသွၼ်မွၼ်းယႃႇၸႃႇ တၢင်တူဝ်ပီႈၼွင်ႉ ၶိူဝ်းႁိူၼ်းၶုၼ်သၢမ်လေႃး သေပိုတ်ႇပၢင်ပွႆးလၢတ်ႈၵႂၢမ်းတူင်ႉတၵ်ႉ ၶွပ်ႈၸႂ်ထိုင်ပီႈၼွင်ႉမႃးပွႆး လႄႈၵၢဝ်ႇထိုင်ၶႂၼ်ငဝ်း ၶုၼ်သၢမ်လေႃး လႄႈ ၼၢင်းဢူးပဵမ်ႇ ႁႂ်ႈႁွတ်ႈထိုင်တီႈၵတ်းယဵၼ်။

ဝၢႆးၼၼ်ႉသိုပ်ႇမူၼ်ႈတူၼ်ႈၸႂ်ၸဵမ်တၢင်းၵႃႈ ႁွင်ႉၵႂၢမ်းတႆး ပၢၼ်ၵဝ်ႇ/ပၢၼ်မႂ်ႇ သေၽူႈယႂ်ႇၵူၼ်း လူင် မိူၼ် ၸရေးဢေႃႇတေႃႇ လႄႈ သြႃႇၸၢႆးသၢႆလိူၼ်ၶမ်းၶဝ်ဢုပ်ႇလၢတ်ႈမွၵ်ႇထိုင် လွင်ႈၶုၼ် သၢမ်လေႃးၼၢင်းဢူးပဵမ်ႇ ၼင်ႇႁိုဝ် ပီႈၼွင်ႉတႆးၸိူဝ်းမႃးယူႇမိူင်းထႆးႁိုင် ဢမ်ႇၼၼ် ၸိူဝ်းၵိူတ်ႇ ၼႂ်းမိူင်းထႆး ယႂ်ႇမိူင်းထႆး ပေႃးတေလႆႈႁူႉၸၵ်း မၵ်းမၼ်ႈပဵၼ်ဝၼ်းတၢင်းႁၵ်ႉတႆး ၸိူဝ်းၼႆႉ။

ယိူင်းဢၢၼ်းလွင်ႈလႆႈၸတ်းပၢင်ပွႆးပွၵ်ႈၵမ်းၼႆႉမီးသၢမ်ၶေႃႈ မိူၼ်ၼင်ႇ
1.    ယုၵ်ႉယွင်ႈပၼ်ဝၼ်းၵိူတ်ႇၶုၼ်သၢမ်လေႃး
2.    တႃႇလမ်းပိုၼ်းလဵပ်ႈႁဵၼ်း လႄႈပႅင်းသိမ်းပၼ်ၾိင်ႈထုင်းတႆးဢၼ်ၸမ်တေမွတ်ႇႁၢႆ
3.    တႃႇယုၵ်ႉယွင်ႈပၼ်တၢင်းႁၵ်ႉမၢဝ်ႇသၢဝ်တႆးလႄႈ ၼႃႈႁိူၼ်းတႆး ႁႂ်ႈပေႃးမေႃႁၵ်ႉၵၼ် မၼ်ႈၵိုမ်း ၵႂႃႇၶၢဝ်းယၢဝ်း ၼႆယဝ်ႉ။

ၼႂ်းပၢင်ပွႆးမီးပႃးသုမ်ႉလူႇၶၢမ်ႇ ငိုၼ်းၵွင်ၵၢင် ငိုၼ်းၸိူဝ်းလူႇၶၢမ်ႇလႆႈမႃးၸိူဝ်းၼၼ်ႉ တေဢဝ် သူင်ႇမိူဝ်းပၼ် ပီႈၼွင်ႉ ၵဵင်းတွင်းၶဝ် သၢင်ႈႁွင်ႈၼႄပိုၼ်းလႄႈငိုၼ်းၵမ်ႈၽွင်ႈတေသိုပ်ႇႁၢင်ႈ ႁႅၼ်း ႁွင်ႈၼေပိုၼ်းၶုၼ်သၢမ်လေႃး ၼၢင်းဢူး ပဵမ်ႇ ၼႂ်းၵဵင်းမႆႇ တႃႇပီၼႃႈႁႂ်ႈပေႃးၶိုၵ်ႉတွၼ်း လိူဝ်ၵဝ်ႇ။

ၸၢႆးသိူဝ်ၶမ်းၽူႈၼမ်းၼႂ်း ၶိူဝ်းႁိူၼ်းၶုၼ်သၢမ်လေႃးလၢတ်ႈဝႃႈ “ပေႃးတေလၢတ်ႈလွင်ႈၶုၼ် သၢမ်လေႃး ၼၢင်းဢူး ပဵမ်ႇၼႆ ၵူၼ်းတႆးၵေႃႉလႂ်ဢမ်ႇယၢမ်ႈလႆႈယိၼ်းတေဢမ်ႇမီး။ပေႃးတေ မႃးတူၺ်း သၢၵ်ႈသေႇမၼ်းၵေႃႈသမ်ႉမီးတေႉ လႄႈ ယုမ်ႇယမ်ဝႃႈမၼ်းတေမီးတေႉယူႇ။ မိူၼ်ၼင်ႇ ၶူးမေႃလိၵ်ႈတႆး ၼၢင်းၶမ်းၵူႇႁဝ်းၵေႃႈတႅမ်ႈၼေ ႁႂ်ႈႁဝ်းႁႃး ပေႃးလႆႈႁူႉၵူၺ်းဢၼ် မီးဝႆႉၼၼ်ႉပဵၼ်လိၵ်ႈၵဝ်ႇ ၵႂၢမ်းပၢၼ်ၵဝ်ႇလႄႈ  ၵူၼ်းပၢၼ်မႂ်ႇၵေႃႈတေဢမ်ႇသူင်လွင်ႈ ပၢၼ်ၵဝ်ႇ၊ လုၵ်ႈလၢၼ်တေဢမ်ႇပွင်ႇ ဢမ်ႇႁူႉ ၸင်ႇႁႃ ဢဝ်လၢႆးပၢၼ်မႂ်ႇသိုပ်ႇသွၼ်ပၼ်လုၵ်ႈလၢၼ်ႁဝ်း ႁႂ်ႈသိုပ်ႇထိင်း သိမ်းၵႂႃႇထႅင်ႈ။ လွင်ႈၶုၼ်သၢမ်လေႃးၼၢင်းဢူးပဵမ်ႇၼႆႉ ပေႃးဢမ်ႇႁူႉတေထၢင်ႇဝႃႈ ပဵၼ်ဢပုမ်ႇ၊ ၵူၺ်းပဵၼ် ဢပုမ်ႇယူႇ တေလႆႈလၢတ်ႈဝႃႈမိူၼ်ၸိူင်းတၢင်းႁၵ်ႉၼႆၶႃႈၼေႃႈ။ ႁၵ်ႉ ၵၼ်ႁႂ်ႈမီးသႅတ်ႉၸႃႇ ႁၵ်ႉၵၼ်ႁႂ်ႈယုမ်ႇယမ် ၼပ်ႉထိုဝ်ႁႂ်ႈ ပဵၼ်လွင်ႈမၢၼ်ႇမႅၼ်ႈမိူၼ်ၼင်ႇၶုၼ် သၢမ်လေႃးႁၵ်ႉၼၢင်းဢူးပဵမ်ႇတေႃႇထိုင်ဝၼ်းတၢႆၼႆၶႂ်ႈႁႂ်ႈၵူၼ်း တၢင်းလင် မေႃႁၵ်ႉၵၼ်မီးၵတိ သႅတ်ႉၸႃႇတေႃႇၵၼ်” ၼႆယဝ်ႉ။

လွင်ႈပိုၼ်းတၢင်းႁၵ်ႉၶုၼ်သၢမ်လေႃးၼၢင်းဢူးပဵမ်ႇ(ဢူဝ်ႈပဵမ်ႇ)ၼႆႉ ၸဝ်ႈပၢႆးပိုၼ်ၶဝ်ထတ်းသၢင် တူၺ်းယူႇ၊ ယင်းပႆႇမီးၽႂ် လၢတ်ႈလႆႈဝႃႈပဵၼ်ပိုၼ်းႁိုဝ် ဢပုမ်ႇ ၼႆတေႉတေႉ။ ပေႃးဝႃႈပဵၼ်ဢပုမ်ႇ သမ်ႉဝဵင်းၵဵင်းတွင်း ၸိုင်ႈတႆးပွတ်းၸၢၼ်း လႆႈႁၼ်လၵ်းထၢၼ်(သၢၵ်ႈသေႇ) မီးဝႆႉတင်းၼမ် မိူၼ်ၼင်ႇဝၢၼ်ႈပႃႇသႃ (ပီႈၼွင်ႉၵဵင်းတွင်းၶဝ်လၢတ်ႈဝႃႈ ပဵၼ်ဝၢၼ်ႈၵိူတ်ႇၶုၼ်သၢမ်လေႃး)လိူဝ် ၼၼ်ႉ မိူၼ်ၼင်ႇ ၶုမ်ပႃႇႁဵဝ်ႈၶဝ်၊ ၵွပ်းမႃႉၶုၼ်သၢမ်လေႃး၊ ၼူၵ်ႉတွင်ႉလေႃး လႄႈမီးထႅင်ႈလၢႆ လၢႆဢၼ် ၸိူဝ်းၵဵဝ်ႇၵပ်းၶုၼ်သၢမ်လေႃး ၵူၺ်းဢမ်ႇၵႃးဢၼ်ၵဵဝ်ႇၵပ်းၼၢင်းဢူးပဵမ်ႇၵေႃႈ မီးဝႆႉ သူၼ်ၽၵ်းၵၢတ်ႇမၼ်းၼၢင်းၸိူဝ်းၼႆႉ။ ၵူၺ်းၵႃႈပေႃးတေဝႃႈ ပဵၼ်ပိုၼ်းၼႆၵေႃႈပႆႇမီးၽႂ်လၢတ်ႈ လႆႈၶၢဝ်းယၢမ်း၊ ဝၼ်းထိမၼ်း ၸိူဝ်းၼႆႉလႆႈလီလီ လႄႈလွင်ႈၼႆႉတိုၵ်ႉပဵၼ်လွင်ႈဢၼ်လီလဵပ်ႈ ႁဵၼ်းၵႂႃႇထႅင်ႈတင်းၼမ်ယူႇ။

ၶေႃႈၾၢၵ်ႇတႃႇဝၼ်းတၢင်းႁၵ်ႉၼႂ်းပီ 2106
•    ယႃႇႁၵ်ႉငၢႆႈဢဝ်ငၢႆႈ၊ ႁၵ်ႉယဝ်ႉ-ယႃႇၸင်းငၢႆႈပႅတ်ႈငၢႆႈ၊ ႁၵ်ႉယၢဝ်းႁႂ်ႈမၼ်ႈၵိုမ်းႁႂ်ႈ ယိုၼ်းယၢဝ်းထိုင်ၸူဝ်ႈသုတ်းပၢၼ်။ (ယိူင်း-ပေႃႈႁၢင်ႉမႄႈႁၢင်ႉတႆး ႁႂ်ႈယွမ်းဝႆး)
•    တၢင်းႁၵ်ႉယိင်းႁႂ်ႈပဵၼ်တႃႇမၢဝ်ႇတႆး၊ တၢင်းႁၵ်ႉၸၢႆးႁႂ်ႈပဵၼ်တႃႇသၢဝ်တႆး၊ ၽႂ်ယႃႇၵူတ်ႉယႃႇၵဝ်းၽႂ် ႁႂ်ႈမေႃႁၵ်ႉၸိုၼ်ႈသႂ်။ (ယိူင်း -ယုၵ်ႉယွင်ႈပၼ်တၢင်းႁၵ်ႉမၢဝ်ႇသၢဝ်တႆး)
•    တၢင်းႁၵ်ႉယႃႇတႃမွတ်ႇ၊ ႁႂ်ႈပဵၼ်တၢင်းႁၵ်ႉဢၼ်တၵ်းလႆႈမီးမၢၵ်ႇတႃပိင်ႇၺႃႇ ထတ်းသၢင်လႆႈ လွတ်ႈလွတ်ႈလႅဝ်းလႅဝ်း။