ၶၢဝ်ႇမိူင်းႁူမ်ႈတုမ်
ၽွင်းလူင်သူႊတၼ်ႊၸၢၼ်းထုၵ်ႇ ယိုဝ်းတၢႆလူၺ်ႈၵူၼ်းႁေႃႈၵႃး
- Details
- Published on Friday, 11 February 2011 12:13
- Written by သႅင်ႁၢၼ်
ဝၢႆးသေပိုၼ်ၽၢဝ်ႇပၢင်ပေႉယင်ႇၵၢင်ၸႂ် ပိူဝ်ႈတႃႇၽၢတ်ႇဢွၵ်ႇပဵၼ်မိူင်းလွတ်ႈလႅဝ်းသဝ်းၶေႃလႆႈ 2 ဝၼ်း ယဝ်ႉ ၽွင်းလူင်သူႊတၼ်ႊၸၢၼ်းထုၵ်ႇယိုဝ်းတၢႆ။
ၸုမ်းၶၢဝ်ႇၼွၵ်ႈမိူင်းလႆးငၢၼ်းမိူဝ်ႈဝၼ်းထိ 9.02.2011 ဝႃႈၽူႈၶၢၼ်ပၢၵ်ႇတပ်ႉသိုၵ်းသူႊတၼ်ႊ ပွတ်း ၸၢၼ်း ပိုတ်ႇလၢတ်ႈဝႃႈ ၸိမ်ႊမိလေးမိမိဝ်းလ်လႃႊ ၽွင်းလူင် တင်းၵူၼ်းဢဝ်ႁူမ်ႇလူမ်ႈမၼ်းၸဝ်ႈထုၵ်ႇယိုဝ်းတၢႆ ၼႂ်းႁေႃပွင်ၵၢၼ်ၽွင်းလူင် တီႈမိူင်း ၵျူးပႃး မိူင်းလူင်သူႊတၼ်ႊၸၢၼ်း မိူဝ်ႈဝၼ်းထိ 9.02.2011 ၼႆယဝ်ႉ။
လွင်ႈၼႆႉယုမ်ႇယမ်ဝႃႈ ၵူၼ်းယိုဝ်းၸၢင်ႈပဵၼ်ၵူၼ်းႁေႃႈၵႃးၽွင်းလူင်ၵေႃႉၼႆႉ ယွၼ်ႉဝႃႈဝၢႆးသေလႆႈလူင်းမိုဝ်းယဝ်ႉ လႆႈယိုဝ်းတူဝ်မၼ်းတၢႆၸွမ်း ဝႃႈၼႆ။
လွင်ႈဢၼ်လႆႈၶႃႈၽွင်းလူင်ပွၵ်ႈၼႆႉၼၼ်ႉယင်းပႆႇႁူႉလွင်ႈတၢင်းမၼ်းတႅတ်ႈတေႃး ၵူၺ်းၵႃႈၸဝ်ႈၼႃႈ တီႈ ၶဝ်လၢတ်ႈဝႃႈ ၸၢင်ႈပဵၼ်ယွၼ်ႉပၼ်ႁႃသူၼ်ႇတူဝ်ဝႃႈၼႆ။
မိူင်းသူႊတၼ်ႊၸၢၼ်း လႆႈပိုၼ်ၽၢဝ်ႇ သၢႆမၢႆၵမ်ႉ ထႅမ်ပၢင်ယင်ႇၵၢင်ၸႂ်တႃႇၽၢတ်ႇဢွၵ်ႇတင်ႈပဵၼ် မိူင်းလွတ်ႈလႅဝ်း ၵွၼ်းၶေႃ မိူဝ်ႈဝၼ်းထိ 07.02.2011 ပူၼ်ႉမႃး။ ၵူၼ်းမိူင်းပၼ်ၶႅပ်းၵၢင်ၸႂ် ၵမ်ႉထႅမ်တႃႇ ၽၢတ်ႇဢွၵ်ႇသုင်သုတ်းထိုင် 99 %။
ဢူဝ်းမႃးလ် ဢပ်ႉတဵဝ်ႊလ် ပႃႊၶျိဝ်ႊ ၸွမ်ၸိုင်ႈၶွင်မိူင်းသူႊတၼ်ႊၸၢၼ်း ပိုၼ်ၽၢဝ်ႇယွမ်းႁပ်ႉပၢင်ယင်ႇ ၵၢင်ၸႂ် ဢၼ်တေႁဵတ်းႁႂ်ႈမိူင်းဢၼ်ယႂ်ႇသုတ်းၼႂ်းၵုၼ်ဢႃႊၾိၵ ၽၢတ်ႇဢွၵ်ႇပဵၼ်သွင်မိူင်း ၼႂ်းလိူၼ် ၵျုၼ်ႊလၢႆႊ 2011 ၼႆႉ ၼႆယဝ်ႉ။
ၽွင်းပႆႇမီးပၢင်ပိုၼ်ၽၢဝ်ႇဝႃႈသူႊတၼ်ႊၸၢၼ်းတေတင်ႈၸိုဝ်ႈၸိုင်ႈမိူင်းၸိူင်ႉႁိုဝ်ၼႆၼၼ်ႉ မီးၶၢဝ်ႇလိုဝ်း ၵၼ်ဝႃႈ ၸုမ်းဢုပ်ႉပိူင်ႇသူႊတၼ်ႊၸၢၼ်း တေလိူၵ်ႈၸႂ်ႉၸိုဝ်ႈပဵၼ် ၸိုင်ႈမိူင်း ၵူၼ်းမိူင်းသူႊတၼ်ႊ ၸၢၼ်း ဝႃႈၼႆယဝ်ႉ။
