ၶၢဝ်ႇမိူင်းႁူမ်ႈတုမ်
ၽူႈတႅၼ်းလုမ်ႈၾႃႉ တုၵ်းယွၼ်းပွႆႇၵူၼ်း တူၵ်းၶွၵ်ႈၵၢၼ်မိူင်း
- Details
- Published on Friday, 26 August 2011 17:04
- Written by သိုဝ်ႇႁႅင်းၼုမ်ႇ
တေႃႊမတ်ႊၶိၼ်ႊတႃႊၼႃႊ ၽူႈတႅၼ်းၶိုၵ်ႉတွၼ်း ၽၢႆႇသုၼ်ႇလႆႈသုၼ်ႇပဵၼ်ၵူၼ်းလုမ်ႈၾႃႉ UN လၢတ်ႈမိူဝ်ႈဝၼ်းၽတ်း ၽွင်းသပ်းလႅင်းၸႅင်ႇၶၢဝ်ႇ ၼႃႈတေဢွၵ်ႇမိူင်းမၢၼ်ႈဝႃႈ လူင်ပွင်ၸိုင်ႈမႂ်ႇ မိူင်းမၢၼ်ႈ ထုၵ်ႇလႆႈပွႆႇၵူၼ်းတူၵ်းၶွၵ်ႈ 2000 ပၢႆၸိူဝ်းတိုၵ်ႉမီးၼႂ်းၶွၵ်ႈၼႆ။
ၶၢဝ်ႇဢီႊရႃႊဝတီႊ ဢၢင်ႈဢိင် AP သေ ဢွၵ်ႇၶၢဝ်ႇဝႃႈမၼ်းၸဝ်ႈသပ်းလႅင်းၸႅင်ႇၶၢဝ်ႇ ၽွင်းတေ ၶွတ်ႇယွတ်ႈၶၢဝ်းတၢင်း 5 ဝၼ်းဢၼ်လႆႈမိူဝ်းမီးၼႂ်းမိူင်း မၢၼ်ႈ ပိူဝ်ႈတႃႇလဵပ်ႈႁဵၼ်းထတ်းသၢင် ငဝ်းလၢႆးသုၼ်ႇလႆႈၵူၼ်း သေလၢတ်ႈဝႃႈ “ ပွႆႇတူၵ်းၶွၵ်ႈၵၢၼ်မိူင်း ၼႆႉတေပဵၼ်ၶၵ်ႉတွၼ်ႈလမ်ႇ လွင်ႈ တႃႇၶိုၼ်းမႄးသၢင်ႈလွင်ႈၶိုၼ်းလီ ၵၼ်ၼႂ်းၸိူဝ်ႉၸၢတ်ႈ” ဝႃႈၼႆ။
ၼွၵ်ႈသေၼၼ်ႉမၼ်းၸဝ်ႈလၢတ်ႈၼႄၽူႈသိုဝ်ႇၶၢဝ်ႇၶဝ်ဝႃႈမိူင်းမၢၼ်ႈလူဝ်ႇလုမ်းတႅပ်းတတ်း တြႃး ဢၼ်လွတ်ႈလႅဝ်းလႄႈထုၵ်ႇလႆႈၵူတ်ႇထတ်းသၢင်ႈလွင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ် ၵူၼ်း ဝႃႈၼႆယဝ်ႉ။
သိုပ်ႇလၢတ်ႈဝႃႈလူင်ပွင်ၸိုင်ႈမႂ်ႇၼႆႉႁၼ်ၽၢင်ႁၢင်ႈလီၶိုၼ်ႈမႃးၸွမ်းသုၼ်ႇလႆႈသုၼ်ႇပဵၼ်ၵူၼ်း ဢိတ်း ဢွတ်း မိူၼ်ၼင်ႇ(လူင်ပွင်ၸိုင်ႈ)လၢတ်ႈဝႃႈယွမ်းႁပ်ႉတႃႇၵိုတ်းသိုၵ်းဢုပ်ႇလွင်ႈငမ်း ယဵၼ် ၸွမ်းၸုမ်းၸၢဝ်းၶိူဝ်းၸိူဝ်းယိပ်းၵွင်ႈၵၢင်ႇသေၽိတ်ႈႁွင်ႉၵူၼ်းမိူင်းမၢၼ်ႈၸိူဝ်းယူႇၼွၵ်ႈ မိူင်းၶိုၼ်းပွၵ်ႈ ၸဵမ်ၸိူဝ်းၼႆႉ ၼႆ။
ၵူၺ်းၵႃႈၸိူင်ႉႁိုဝ်ၵေႃႈလီ ယင်းတိုၵ်ႉလီမႆႈဢူၵ်းမႆႈၸႂ်ယူႇ၊ ၵွပ်ႈဝႃႈၵူၼ်းတူၵ်းၶွၵ်ႈတိုၵ်ႉထုၵ်ႇ ပေႃႉထုပ်ႉ ၶႃႈႁႅမ် လႄႈတဵၵ်းၸႂ်ႉၵူၼ်းတူၵ်းၶွၵ်ႈႁၢပ်ႇၶျေႃးဢွၵ်ႇၼႃႈသိုၵ်းၸွမ်းတပ်ႉသိုၵ်း ၸိူဝ်းၼႆႉ ၼႆယဝ်ႉ။
ၼွၵ်ႈသေၼၼ်ႉတုၵ်းယွၼ်းထိုင်လူင်ပွင်ၸိုင်ႈမိူင်းမၢၼ်ႈ ႁႂ်ႈၶတ်းၸႂ်သႂ်ႇႁႅင်းႁဵတ်းၸွမ်းၼႃႈတီႈ ပုၼ်ႈၽွၼ်းပိူဝ်ႈတႃႇႁႂ်ႈသုၼ်ႇလႆႈ သုၼ်ႇပဵၼ်ၵူၼ်းမုၼ်းႁိူင်းမႃးၼင်ႇပိူင်သုၼ်ႇလႆႈသုၼ်ႇပဵၼ် ၵူၼ်း လုမ်ႈၾႃႉ ဝႃႈၼႆယဝ်ႉ။
သိုပ်ႇလၢတ်ႈဝႃႈ “ၼႂ်းၶၢဝ်းယၢမ်းၶိုၵ်ႉၶၢႆးၼႆႉလုမ်ႈၾႃႉတၵ်းလႆႈၶဝ်ႈႁႃဢုပ်ႇဢူဝ်းၸွမ်းမိူင်းမၢၼ်ႈ ပိူဝ်ႈတႃႇ တိတ်းတၢမ်း ၸွမ်းလွင်ႈမုၼ်းလႅင်းၶိုၼ်ႈယႂ်ႇ (Development) ၶိုတ်းၶိုတ်းၸမ်ၸမ်၊ ၵူၺ်းၵႃႈထုၵ်ႇလီ ၵမ်ႉထႅမ်လႄႈ ၸွႆႈလူင်ပွင်ၸိုင်ႈၸွမ်းယူႇ ဝႃႈၼႆယဝ်ႉ။
