ၶၢဝ်ႇမိူင်းႁူမ်ႈတုမ်

သိုၵ်းမၢၼ်ႈယင်းပႆႇထွၼ်တပ်ႉ ၼ်ႂ်းမိူင်းၶၢင်

ၸုမ်းၶၢင်လွတ်ႈလႅဝ်းလၢတ်ႈဝႃႈ ပဵၵ်ႉသမ်ႉမီးၶၢဝ်ႇဢွၵ်ႇဝႃႈ သိုၵ်းမၢၼ်ႈထွၼ်တပ်ႉၶဝ် ၸိူဝ်းဢွၵ်ႇ ၼႃႈသိုၵ်းၼႂ်း မိူင်းၶၢင်ယဝ်ႉ ၼႆသေတႃႉ ထိုင်ယၢမ်းလဵဝ်ယင်းပႆႇႁၼ်ထွၼ် ၼႆ။

ၶၢဝ်ႇ DVB ဢွၵ်ႇဝႃႈ ၵႅမ်ၸွမ်ႁၢၼ် ၵွမ်ႊမေႃႊ ၵႅမ်ၽူႈပွင်ၵၢၼ်သိုၵ်း သိုၵ်းၶၢင်လွတ်ႈလႅဝ်း KIA လၢတ်ႈဝႃႈသိုၵ်းမၢၼ်ႈၸိူဝ်းထူဝ်းၼႃႈသိုၵ်း ၼႂ်းမိူင်းၶၢင် ယင်းပႆႇထွၼ်တပ်ႉၶဝ်ၸိူဝ်းမႃးပၵ်းဝႆႉ ၸိူဝ်း ၼၼ်ႉ ၼႆ။

“သိုၵ်းမၢၼ်ႈယင်းပႆႇမီးလွင်ႈထွၼ်တပ်ႉၶဝ်ဢွၵ်ႇၼႂ်းမိူင်းၶၢင်တိူဝ်ႈ။ လွင်ႈမီးၶၢဝ်ႇဢွၵ်ႇဝႃႈ သိုၵ်းမၢၼ်ႈထွၼ် တပ်ႉ ၶဝ်ဢွၵ်ႇယဝ်ႉၼႆၼၼ်ႉပဵၼ်ၶၢဝ်ႇၽၢင်းၵူၺ်း။ သိုၵ်းမၢၼ်ႈၸိူဝ်းထူဝ်းၼႃႈသိုၵ်းၸိူဝ်းၼၼ်ႉတိုၵ်ႉမီးယူႇ ၼ်ႂ်းပိုၼ်ႉတီႈၶဝ်ၸိူဝ်းၼၼ်ႉၵူၺ်း။ ထွၼ်သိုၵ်းၼႆတႄႉပႆႇႁၼ်” ဝႃႈၼႆ။

ၸုမ်းၶိုင်ပွင်လွင်ႈငမ်းယဵၼ်လူင်ပွင်ၸိုင်ႈမၢၼ်ႈတင်း KIA တေထူပ်းၵၼ်ထႅင်ႈၼႂ်းဝၼ်းထိ 10.02.2012 လိူၼ်ၼႆႉ၊ ၵူၺ်းတေႁူပ်ႉထူပ်းၵၼ်တီႈလႂ်ၼႆၼၼ်ႉတႄႉ တိုၵ်ႉဢုပ်ႇၵုမ်ငူပ်ႉငိ ၵၼ်ယူႇ ဝႃႈၼႆယဝ်ႉ။

“တေႁူပ်ႉထူပ်းၵၼ်ထႅင်ႈ ၼႂ်းဝၼ်းထိ 10 တိုၵ်ႉဢုပ်ႇၵုမ်ငူပ်ႉငိၵၼ်ယူႇ။  ပွၵ်ႈၼႆႉတႄႉတေပဵၼ်ၼႂ်းမိူင်း ၵူၺ်းယဝ်ႉ။ ဢွင်ႈတီႈမၼ်းၵေႃႈတိုၵ်ႉ ဢုပ်ႇဢူဝ်းငူပ်ႉငိၵၼ်ယူႇ။ တၢင်းၽၢႆႇႁဝ်းၶႃႈလႆႈတၢင်ႇလိၵ်ႈထိုင် ဢူး ဢွင်ႇတွင်းသေ တွင်ႈထၢမ်ထိုင်ဝႃႈ ၶႂ်ႈႁူပ်ႉထူပ်းၵၼ်ၵႃႈလႂ်ၼႆၸိူဝ်းၼၼ်ႉယူႇ” ဝႃႈၼႆယဝ်ႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ ပဵၵ်ႉသမ်ႉပၢင်တိုၵ်းၼႂ်းမိူင်းၶၢင် လူတ်းယွမ်းလူင်းၽွင်ႈသေတႃႉတပ်ႉ သိုၵ်းမၢၼ်ႈတႄႉတူင်ႉၼိုင် မိူၼ်ပၵ်းၵဝ်ႇပိူင်လဵဝ်။ ၼွၵ်ႈသေၼၼ်ႉ လွင်ႈၽိူမ်ႉထႅမ်ၶဝ်ႈၼမ်ႉ တၢင်းၵိၼ်ၶဝ်၊ ၸဵမ်လူတ်ႉၸဵမ်ၵႃးၶဝ်ၸိူဝ်းၼႆႉၵေႃႈ တိုၵ်ႉတူင်ႉၼိုင်မိူၼ်ၵဝ်ႇ ဝႃႈၼႆယဝ်ႉ။

ၸုမ်းၽၢႆႇလူလွမ်ၸွႆႈထႅမ်ၵူၼ်းပၢႆႈၽေးၶဝ်လၢတ်ႈဝႃႈ ၵူၼ်းပၢႆႈၽေးသိုၵ်းတင်ႈတႄႇလိူၼ် ၵျုၼ်ႊ 2011 မႃး ထိုင်ယၢမ်းလဵဝ်မီး မွၵ်ႈၸဵတ်းမိုၼ်ႇယဝ်ႉ ဝႃႈၼႆယဝ်ႉ။