ၶၢဝ်ႇမိူင်းႁူမ်ႈတုမ်
ၽူႈၼမ်း KNU လၢတ်ႈ- တၵ်းလႆႈႁၢင်ႈႁႅၼ်းတႃႇငဝ်းလၢႆးႁၢႆႉၸႃႉသုတ်း
- Details
- Published on Wednesday, 01 February 2012 15:25
- Written by ၼဵတ်းသၢၼ်ႈ
ၽူႈယႂ်ႇၵူၼ်းလူင် ၽူႈၼမ်း KNU ၶဝ်လၢတ်ႈဝႃႈ ဢၼ်ႁဝ်းဢုပ်ႇဢူဝ်းၸွမ်းလူင်ပွင်ၸိုင်ႈမၢၼ်ႈ မုင်ႈ မွင်းလွင်ႈငမ်း ယဵၼ်ယူႇၼႆႉ ၽၢႆႇၼိုင်ႈႁဝ်းတၵ်းလႆႈမီးၵၢၼ်ႁၢင်ႈႁႅၼ်းတူဝ်ႈ တၼ်းတႃႇငဝ်း လၢႆး ႁၢႆႉ ၸႃႉသုတ်း ၼႆ။
ၶၢဝ်ႇ RFA ဢွၵ်ႇၶၢဝ်ႇဝႃႈ ႁူဝ်ပဝ်ႈႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ Karen National Union (KNU) ၸွမ်သိုၵ်းလူင် သေႃးတႃႊမလႃႊပေႃႊ မွၵ်ႇလၢတ်ႈၶေႃႈၵႂၢမ်း တိုၵ်းသူၼ်းၵူၼ်းသိုၵ်း ၵူၼ်းမိူင်းၼႂ်း ဝၼ်းၶွပ်ႈၶူပ်ႇယၢင်းလုၵ်ႉၽိုၼ်ႉ တေႃႇသူႈမၢၼ်ႈ 63 ပီ ဢၼ်ၸတ်း တီႈဝၢၼ်ႈ ဢူးၵရေႊၶီး မိူင်းယၢင်းၽိူၵ်ႇဝႃႈ ဢၼ်ႁဝ်းလႆႈဢုပ်ႇဢူဝ်း လွင်ႈ ငမ်း ယဵၼ်ၸွမ်းလူင်ပွင်ၸိုင်ႈမၢၼ်ႈၼႆႉ ယင်းပႆႇ မီးလွင်ႈၵႅၼ်ႇၶႅင် မၼ်ႈၵိုမ်း၊ သင်ဝႃႈလွင်ႈငမ်းယဵၼ်ဢမ်ႇပဵၼ်မႃးၸိုင် ႁူႉတၵ်းလႆႈသိုပ်ႇ ၶဝ်ႈပွႆး တိုၵ်းၶိုၼ်း ဝႃႈၼႆယဝ်ႉ။
ပူၼ်ႉမႃးမိူဝ်ႈဝၼ်းထိ 12.1.2012 ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ KNU လႆႈလူင်းလၢႆးမိုဝ်းၵိုတ်းသိုၵ်းၸွမ်းၸုမ်း ၶိုင် ပွင်လွင်ႈငမ်းယဵၼ် လူင် ပွင်ၸိုင်ႈမၢၼ်ႈ ဢၼ်ဢူးဢွင်ႇမျိၼ်း ၽွင်းလူင်ၽၢႆႇတေႃႉသူင်ႇသဵၼ်ႈတၢင်းလူတ်ႉ လဵၼ်း(ၾႆး) ဢွၼ်ႁူဝ်။ တင်းသွင်ၽၢႆႇလႆႈႁူပ်ႉ ထူပ်းဢုပ်ႇ ဢူဝ်းလူင်းလၢႆးမိုဝ်းၵၼ် ၼႂ်းဝဵင်းၽႃဢၢင်ႇ(ပႃးဢၢၼ်ႇ) ၸေႈမိူင်းယၢင်းၽိူၵ်ႇ။
ၸွမ်သိုၵ်းလူင် သေႃးတႃႊမလႃႊပေႃႊ လၢတ်ႈဝႃႈ“ ၶေႃႈတူၵ်းလူင်းလႆႈၸႂ်ၸိူဝ်းၼႆႉ တိုၵ်ႉပဵၼ်ပိုၼ်ႉထၢၼ်ယၢင်ႈၼိုင်ႈ ပိူဝ်ႈတႃႇၵိုတ်းသိုၵ်း၊ သၢင်ႈ လွင်ႈငမ်းယဵၼ်ၼႂ်းၸိုင်ႈမိူင်း၊ သၢင်ႈလွင်ႈၶိုၼ်းမႄးလီၵၼ်ၼႂ်း ၸိူဝ်ႉၸၢတ်ႈ၊မႄးၵႄႈၶႆပိူင် ငဝ်ႈပိုင်းမိူင်း 2008၊ ၵေႃႇတင်ႈမိူင်းႁူမ်ႈတုမ် ၸႅတ်ႈ ၸၢင်ႇ ၼၼ်ႉၵူၺ်း” ဝႃႈၼႆ။
ၸုမ်းႁူမ်ႈတုမ်ယၢင်းၽိူၵ်ႇ Karen National Union (KNU) ၼႆႉ လႆႈတႄႇယိပ်းၵွင်ႈၵၢင်ႇ လုၵ်ႉၽိုၼ်ႉ တေႃႇသူႈ လူင်ပွင်ၸိုင်ႈမၢၼ်ႈမိူဝ်ႈဝၼ်းထိ 31.1.1949 သေပဵၼ်ၸုမ်းတေႃႇသူႈဢၼ်ႁိုင်ၼၢၼ်းသုတ်း ၼႂ်းလုမ်ႈၾႃႉ။
