ၶိုတ်းတၼ်း IT

ဝႅပ်ႉၸိုဝ်ႈလင် ဢွၼ်ၵၼ်ပိၵ်ႉဝႅပ်ႉ သၢၼ်ၶတ်းမၢႆမီႈ SOPA

သင်ၽူႈဢၢၼ်ႇၶဝ်ၶဝ်ႈတူၺ်း ဝႅပ်ႉၸိုဝ်ႈလိုဝ်းလင်မိူၼ် Wikipedia ၽၢႆႇဢင်းၵိတ်း မိူဝ်ႈဝၼ်းထိ 18/01/12 ၸိုင် တေလႆႈႁၼ်ၼႃႈတၢင်ႇသီလမ် လႄႈဢမ်ႇၸၢင်ႈၶူၼ်ႉႁႃၶေႃႈမုၼ်းသင်။ ၼႆႉပဵၼ်ယွၼ်ႉ ဝႅပ်ႉ Wikipedia သၢၼ် ၶတ်းဢမ်ႇႁၼ်လီၸွမ်း ပၵ်းပိူင်မၢႆမီႈမိူင်း ဢမေႊရိၵၢၼ်ႊ ၸိုဝ်ႈဝႃႈ သူဝ်ႊပႃႊ (SOPA) ဢၼ်တိုၵ်ႉယူႇ ၼႂ်းၶၵ်ႉ တွၼ်ႈႁၢင်ႈႁႅၼ်းတဵၵ်းၸႂ်ႉယူႇ။

မၢႆမီႈ သူဝ်ႊပႃႊ ၼႆႉ ပဵၼ်မၢႆမီႈၵဵဝ်ႇလူၺ်ႈၵၢၼ်ႁၢမ်ႈၵႃႉၶၢႆသိင်ႇၶွင် ဢၼ်ဢမ်ႇလၢႆႈဢႃႇၼုယၢတ်ႈ တီႈၸဝ်ႈၶူင် (Copy Right) ဢွၼ်ႊလၢႆႊ လႄႈ သင်မၢႆမီႈၼႆႉထုၵ်ႇၸႂ်ႉၸိုင် ၼႆႉပွင်ႇဝႃႈဝႅပ်ႉသၢႆႉ တၢင်းလၢႆ တေဢမ်ႇၸၢင်ႈတၢင်ႇ ဝီႊတီႊဢူဝ်ႊ၊ ၵႂၢမ်း၊ လႄႈၶႅပ်းႁၢင်ႈၸဵမ်ၸိူဝ်းၼႆႉၵႂႃႇဢၼ်ဢမ်ႇ လႆႈ သိုဝ်ႉမႃးတီႈၸဝ်ႈၶွင်သေဢမ်ႇၵႃး ဝႅပ်ႉၶူၼ်ႉႁႃ ၶေႃႈမုၼ်းယႂ်ႇသုတ်းလုမ်ႈၾႃႉမိူၼ်ၼင်ႇ Google ၼၼ်ႉၸၢင်ႈထုၵ်ႇပိၵ်ႉၵႂႃႇ ၵွပ်ႈဢမ်ႇၸၢင်ႈၼႄလိင်ႉၵႂႃႇတီႈဝႅပ်ႉ ၸိူဝ်းဢမ်ႇထုၵ်ႇမၢႆမီႈ ၼႆယူႇ။

လွင်ႈၼႆႉၸၢင်ႈႁဵတ်းႁႂ်ႈၸုမ်းဝႅပ်ႉသၢႆႉၸိုဝ်ႈလင်မိူၼ်ၼင်ႇ  Firefox၊ Yahoo၊ Facebook၊ Twitter၊ eBay၊ လႄႈ Wordpress ၸိူဝ်းၼႆႉၵႂႃႇ ဢွၼ်ၵၼ်ဢွၵ်ႇသၢၼ်ၶတ်းလႄႈတုၵ်းယွၼ်းႁႂ်ႈ လူင်ပွင်ၸိုင်ႈ မိူင်းဢမေႊရိႊၵၢၼ်ႊ ၶိုၼ်းမေးထတ်းသၢင်မၢႆမီႈ သူဝ်ႊပႃႊ ဢၼ်ၶဝ်ယုမ်ႇယမ်ဝႃႈ တေႁဵတ်းႁႂ်ႈပၢႆးမၢၵ်ႈမီးလႄႈၵၢၼ်ၵႃႉၶၢႆဢွၼ်ႊလၢႆႊ လုသုမ်းယႂ်ႇလူင် ၼၼ်ႉယူႇ။

ၵၢၼ်သၢၼ်ၶတ်းၼၼ်ႉ ၵမ်ႈၼမ်တေႁဵတ်းႁႂ်ႈၼႃႈ ႁိူၼ်းဝႅပ်ႉၸဝ်ႈၵဝ်ႇပဵၼ်သီလမ်တႃႇ 24 ၸူဝ်ႈမူင်း လႄႈ တေႁႂ်ႈ ၽူႈၶဝ်ႈတူၺ်းဝႅပ်ႉၶဝ် သႂ်ႇၸိုဝ်ႈတႃႇသူင်ႇလိၵ်ႈၸူး လူင်ပွင်ၸိုင်ႈ ဢမေႊရိႊၵၢၼ်ႊ ၵဵဝ်ႇလူၺ်ႈၵၢၼ်ဢမ်ႇႁၼ်လီ ၸွမ်းမၢႆမီႈ SOPA ၼႆယူႇယဝ်ႉ။