ပၢႆးယူႇလီ

ယႃႈ​ယႃ​ႁႄႉ​ႁၢမ်ႈ​မီး​သင်​လၢႆ​လၢႆ ႁႂ်ႈ​ၸိူဝ်ႉ​မႅင်း​ဢဵတ်ႇသ် ဢမ်ႇ​ၽႄႈ​လႆႈ​ၼမ်

တၢင်း​ပဵၼ်​ဢၼ်​ၼႆႉ​ဢမ်ႇ​မီး​ယႃႈ​ယႃ​ႁႄႉ​ၵင်ႈ​မၼ်း။ ၵူၺ်း​မီး​ယႃ​ႁႄႉ​ႁၢမ်ႈ​ၼင်ႇ​ႁိုဝ်​ၸိူဝ်ႉ​မႅင်း မၼ်း​ပေႃး​တေ ဢမ်ႇ​ၵိူတ်ႇ​လုၵ်ႈ​မီး​လၢၼ်ၼႂ်း​တူဝ်​ၵူၼ်း​ၸပ်း​ၼၼ်ႉ​ထႅင်ႈ​ၵူၺ်း။ ဢမ်ႇၸႂ်ႈ​လႄႈ​ဝႃႈ​ၵိၼ်​ယႃႈ​ယႃ ၼႆႉ​သေ တၢင်း ပဵၼ်​ဢဵတ်ႇသ် ႁၢႆ​ၶႅၼ်း​ၵႂႃႇ​မိူၼ်​တၢင်း​ပဵၼ်​တၢင်ႇ​ဢၼ်​ဢမ်ႇၸႂ်ႈ။

ယႃႈ​ယႃ​မၼ်း​မီး​လၢႆ​မဵဝ်း​မိူၼ်​ပႃႈတႂ်ႈ​ၼႆႉ။

1 - ယႃႈ​ယႃ​ဢေႇ​ၸႅတ်ႉ​ထီႇ  ( AZT)
ပေႃး​ပဵၼ်ၼႂ်း​ၽႃႇ​သႃႇ​မေႃ​ၶဝ်​တႄႉ လၢတ်ႈ​ဝႃႈ( AZT) ၼႆ​ၵူၺ်း ၵေႃႈ​ႁူႉ​ပွင်ႇ​ၵၼ်​ယဝ်ႉ။ ယႃႈ​ယႃ​ဢၼ်​ၼႆႉ မၼ်း ပဵၼ်​ယႃႈ​ယႃ​မဵဝ်း​ဢွၼ်​တၢင်း​သုတ်း၊ ဢၼ်​ပိူၼ်ႈ​ယွမ်း​ႁပ်ႉ​သေ​ဢဝ်​မႃးၸႂ်ႉၼႂ်း​ၵူၼ်း ပဵၼ်​တၢင်း​ပဵၼ် ဢဵတ်ႇသ်။ ယႃႈ​ယႃ​ဢၼ်​ၼႆႉ ၽၢင်​ႁၢင်ႈ​မၼ်း​မီး​လၢႆ​မဵဝ်း မိူၼ်​ၼင်ႇ ပဵၼ်​လွတ်ႇ၊ ပဵၼ်​မဵတ်ႉ​လႄႈ​ပဵၼ်​ၼမ်ႉ ၸိူဝ်း​ၼႆႉ။ တၢင်း​လဵၵ်ႉ​တၢင်းယႂ်ႇ​မၼ်း​ၵေႃႈ​တေ​မီး  10, 50, 100, 250,လႄႈ 300 မီႊ​လီႊ​ၵ​ရမ်ႊ။

ၽွၼ်းၸႃႉမၼ်းသမ်ႉ

ပေႃး​ၵိၼ်​ယႃႈ​ယႃ  ( AZT) ၸိုင်​မၼ်း​တေ​ၸၢင်ႈ​ၵႂႃႇ​ယႃႉ​ၶႆ​မၼ်း​ၸွမ်း​လုပ်ႇ​ၵူၼ်း​ႁဝ်း​သေ  တေ​ၸၢင်ႈ​ႁဵတ်း ႁႂ်ႈ​ၸဵပ်း​ၸွမ်း​ၼိူဝ်ႉ​ၸွမ်း​လုပ်ႇ ႁဵတ်းႁႂ်ႈ​ၵူၼ်း​ပဵၼ်​ဢၼ်​လႆႈ​ႁပ်ႉ​ယႃႈ​ယႃ​ဢၼ်​ၼႆႉ ဢူၼ်ႈ​ဢွၼ်ႇ၊ ဢမ်ႇ​မီး ဢဵၼ်​မီး​ႁႅင်း၊ ၶႂ်ႈ​ဢေႃႉၶႂ်ႈ​ႁၢၵ်ႈ​လႄႈ​ႁူဝ်​ၶႆႈ ၸဵမ်​ၸိူဝ်း​ၼႆႉ။

ၶေႃႈ​ၾၢင်ႉ​မၼ်း

ပဵၵ်ႉ​သမ်ႉ​ဝႃႈ​ၵူၼ်း​ပဵၼ်​ၵိၼ်​ယႃႈ​ယႃ​ဢၼ်​ၼႆႉ​သေ​မီး​ငဝ်း​လၢႆး​ၼင်ႇ​ဢၼ်​လၢတ်ႈ​ပႃႈ​ၼိူဝ်​ၼႆႉ​သေ​တႃႉ​ၵေႃႈ ဢမ်ႇ​ထုၵ်ႇ​လီ​ၵိုတ်း​ၵိၼ်​ယႃ​ၵမ်း​လဵဝ်။ ၵွပ်ႈ​ဝႃႈ​ၸိူဝ်ႉ​မႅင်း​ဢဵတ်ႇသ်​ၼၼ်ႉ တေ​ဢမ်ႇ​ၵူဝ်​ယႃ​ၵူၺ်း​သေ​ဢမ်ႇ ၵႃး တေ​ႁဵတ်းႁႂ်ႈ​ၶဝ်​မိုတ်ႈ​ၵိုဝ်း​ၵၼ်​ၵႂႃႇ​ပႅတ်ႈ။ ႁႂ်ႈ​ၵႂႃႇ​ထူပ်း​မေ​ယႃ​သေ​တိူင်ႇ​ပၢင်ႇ​ဢုပ်ႇ​ဢူဝ်း​တင်း မေႃ​ယႃ တႃႉ၊ တေ​ပဵၼ်​တၢင်း​ဢွၵ်ႇ​ဢၼ်​လီ​သုတ်း​ယဝ်ႉ။

2  - ယႃႈယႃထရီးထီႇၸီႇ ( 3TC )
ယႃႈ​ယႃ​ဢၼ်​ၼႆႉ​ၵေႃႈ​တေ​မီး 2 မဵဝ်း မိူၼ်​ၼင်ႇ​ပဵၼ်​ၼမ်ႉ​လႄႈ​ပဵၼ်​မဵတ်ႉ။ ဢၼ်​ပဵၼ်​မဵတ်ႉ​ၼၼ်ႉ​ၼမ်ႉ ၼၵ်း​မၼ်း​တေ​မီး 150 မီႊ​လီႊ​ၵ​ရမ်ႊ ၵိၼ်​ၼိုင်ႈ​ဝၼ်း 2 ပွၵ်ႈ။ ဢၼ်​ပဵၼ်​ၼမ်ႉ​ၼၼ်ႉ မီး 66 ၸီႊ​ၸီႊ။ တဝ်ႈ​လဵၵ်ႉ​တေ​မီး 100 မီႊ​လီႊ​ၵ​ရမ်ႊ လႄႈ တဝ်ႈယႂ်ႇ​တေ​မီး 240 မီႊ​လီႊ​ၵ​ရမ်ႊ။
ယႃႈ​ယႃ​ဢၼ်​ၼႆႉ မေႃ​ယႃ​ၶဝ်​တေ​တူၺ်း​ၸွမ်း​ၼမ်ႉ​ၼၵ်း​တူဝ်​ၵူၼ်း​ပဵၼ်​သေ ၸင်ႇ​ၵွႆႈ​ပၼ်​ၵိၼ်​ၼၼ်ႉ​ယဝ်ႉ ယွၼ်ႉ​ဝႃႈ ၵူၼ်း​ပဵၼ်​ၵေႃႉ​ၼိုင်ႈ​လႄႈ​ၵေႃႉ​ၼိုင်ႈ​ၼၼ်ႉ ၼမ်ႉ​ၼၵ်း​ၶဝ်​ဢမ်ႇ​မိူၼ်​ၵၼ်။

ယႃႈ​ယႃ​ႁႄႉ​ႁၢမ်ႈ​မၼ်း​တႄႉ​မီး​လၢႆ⁠လၢႆ​မဵဝ်း​ယူႇ။ ၵူၺ်း​ၵႃႈ​တႃႇ​တေ​ၵိၼ်​ယႃ​ၼၼ်ႉ ယူႇ​တီႈ​မေႃ​ၶဝ်​တႅပ်း​တတ်း ပၼ်​ထႅင်ႈ​ၵမ်း​ၼိုင်ႈ။ ယွၼ်ႉ​ဝႃႈ​ၵူၼ်း​ပဵၼ်​တၢင်း​ပဵၼ်​ဢၼ်​ၼႆႉ လိူတ်ႈ​လူမ်း​ၵေႃႉ​ၼိုင်ႈ​လႄႈ ၵေႃႉ​ၼိုင်ႈ ဢမ်ႇ မိူၼ်​ၵၼ်။  ဢမ်ႇၸႂ်ႈ လႄႈ​ဝႃႈ​တေ​ၵိၼ်​ယႃႈ​ယႃ​ဢၼ်​လဵဝ်​ၵၼ်​လႆႈ​ၵူႈ​ၵေႃႉ။  ထႅင်ႈ​လွင်ႈ​ၼိုင်​သမ်ႉ တၢင်း ႁႅင်း​ၸိူဝ်ႉ​မႅင်းၼႂ်း တူဝ်​ၵေႃႉ​ၼိုင်ႈ​လႄႈ​ၵေႃႉ​ၼိုင်ႈ​ၵေႃႈ​ဢမ်ႇ​မိူၼ်​ၵၼ်​တေႃႈ​ၼင်ႇ​ပဵၼ်​တၢင်း​ပဵၼ် ဢၼ်​ၼႆႉ တင်း​ၽူဝ်​တင်း မေး​ယင်း​ၵိၼ်​ယႃ​ဢၼ်​လဵဝ်​ၵၼ်​ဢမ်ႇ​လႆႈ ၼၼ်ႉ​ယဝ်ႉ။