ပၢႆးယူႇလီ
သၢႆမၢႆၵူၼ်းတၢႆယွၼ်ႉတၢင်းပဵၼ် ၵႃႇလႃႉၼႂ်းမိူင်းႁေးတီႊၸမ်ထိုင် ႁဵင်ၸပ်းတၢင်းပဵၼ်ၼပ်ႉမိုၼ်ႇ
- Details
- Published on Tuesday, 16 November 2010 14:44
- Written by သႅင်ႁၢၼ်
ၽွင်းလူင် ၽၢႆႇပၢႆးယူႇလီ မိူင်းႁေးတီႊ Haiti လၢႆးငၢၼ်းသၢႆမၢႆၵူၼ်းတၢႆယွၼ်ႉတၢင်းပဵၼ်ၵႃႇလႃႉၼႂ်းမိူင်းၼမ် လိူဝ် 900 ၵေႃႉ၊ လိူဝ်သေၼၼ်ႉတၢင်းပဵၼ်ၵႃႇလႃႉလႆႈၽေႈၶဝ်ႈၼႂ်း 6 ၸေႈတွၼ်ႈ (တီႈယၢမ်ႈထူပ်းၽေး ဢိင်ႇ သၢၼ်ႇႁၢဝ်ႉႁႅင်း 10 ၸေႈတွၼ်ႈ ၼႂ်းမိူင်းႁေးတီႊၽွင်းႁူဝ်ပီ ပူၼ်ႉမႃး)။
တၢင်းၾၢႆႇ ဝႅပ်ႉသၢႆႉၽွင်းလူင်ၽၢႆႇပၢႆးယူႇလီမိူင်းႁေးတီႊ လႆႈၽိူမ်ႉသၢႆမၢႆၵူၼ်းတၢႆယွၼ်ႉၵႃႇလႃႉ တၢင်းပဵၼ်လႆႈ ၽေႈၸပ်း မိူဝ်ႈ 3 ဝူင်ႈပူၼ်ႉမႃးတေႃႇထိုင် ဝၼ်းထိ 12.11.2010 ။ လႆႈထူပ်းႁၼ်ဝႃႈသၢႆမၢႆၵူၼ်းတၢႆ မီး 917 ၵေႃႉ လႄႈ ၸပ်းတၢင်းပဵၼ်ၵႃႇလႃႉ 14,600 ၵေႃႉ ဝႃႈၼႆ။
ၽွင်းလဵဝ်ၵၼ် တီႈတွမ်း ဢႃးတိပေႃးၼိတေႉ မိူင်းႁေးတီႊ ပွတ်းၵၢင် တိုၵ်ႉပဵၼ်ၼႃႈလိၼ်တီႈထုၵ်ႇလီၾၢင်ႉ၊ တိုၵ်ႉမီးၵၢၼ်ၽေႈၸပ်းတၢင်းပဵၼ်ႁၢဝ်ႉႁႅင်း ၵွပ်ႈဝႃႈ ပဵၼ်ၸေႈတွၼ်ႈလဵဝ်ဢၼ်မီးၵူၼ်းတၢႆယွၼ်ႉၵႃႇလႃႉ ၼမ်ထိုင် 600 ၵေႃႉဢိၵ်ႇတင်းတၢင်ၸေႈတွၼ်ႈတိုၵ်ႉမီးၵၢၼ်ၽေႈၸပ်းတၢင်းပဵၼ် မိူၼ်ၼင်ႇ ၼွတ်ႉတ် ၶွတ်ႉသ် လႄႈ သုတ်ႊ ႁူမ်ႈပႃး ဝဵင်းလူင် ပေႃႊတူဝ်ႊပၽရိၼ်ႊသ် (Port-au-Prince) မိူင်းလူင်ၶွင်ႁေးတီႊဝႃႈ ၼႆ။
တီႈ ဝဵင်းလူင် ပေႃႊတူဝ်ႊၽရိၼ်ႊသ် မီးၵူၼ်းတၢႆယွၼ်ႉၵႃႇလႃႉထိုင် 27 ၵေႃႉသေ ႁဵတ်းႁႂ်ႈ လူင်ပွင်ၸိုင်ႈႁေး တီႊ လႄႈ မိူင်းဢူၺ်းလီၶဝ် တိုၵ်ႉၶတ်းၸႂ်ႁေႉၵင်ႈ တၢင်းပဵၼ်ၵႃႇလႃႉယႃႇႁႂ်ႈၽေႈလၢမ်းထိုင်တီႈပွၵ်ႉၵူၼ်း ယူႇ ၼႃၼႅၼ်ႈ (Slum) လႄႈပၢင်သဝ်းၵူၼ်းပၢႆႈၽေးလၢႆလၢႆတီႈ ၸိူဝ်းမီးၵူၼ်းမိူင်းယူႇသဝ်းမွၵ်ႈ 1.3လၢၼ်ႉ ၵေႃႉ ၸိူဝ်းႁၢမ်းႁိူၼ်းယေးတီႈယူႇတၼ်းသဝ်း ယွၼ်ႉႁိူၼ်းၵူၼ်ႇၽွင်းဢိင်ႇသၼ်ႇ ဝႃႈၼႆ။
ၸၢတ်ႈၸိုင်ႈလုမ်ႈၾႃႉ UN ထတ်းသၢင်ဝႃႈ ၵူၼ်းမိူင်းႁေးတီႊ မွၵ်ႈ 2 သႅၼ်ၵေႃႉ ၸပ်းတၢင်းပဵၼ်ၵႃႇလႃႉယွၼ်ႉ မီးၵၢၼ်ၽေႈၸပ်းပတ်းပိုၼ်ႉ တီႈမိူင်းႁေးတီႊယဝ်ႉ ႁဵတ်းႁႂ်ႈ UN တုၵ်းယွၼ်းငိုၼ်း 163.9 လၢၼ်ႉဢမေႊရိ ၵၢၼ်ႊတေႃႊလႃႊ တႃႇၸွႆႈလိူဝ် လႄႈ ႁေႉၵင်ႈတၢင်းပဵၼ်ၵႃႇလႃႉ ၼႂ်းပီၼႃႈ။
ၸိူင်ႉႁိုဝ်ၵေႃႈလီ ႁူမ်ႈဝႃႈ တၢင်းပဵၼ်ၵႃႇလႃႉလႆႈၽေႈၸပ်းယႂ်ႇလူင်ၼႂ်းမိူင်းႁေးတီႊ သေတႃႉၵၢၼ်လိူၵ်ႈတင်ႈ ၸွမ်ၸိုင်ႈမိူင်းႁေးတီႊ လႄႈ ၸုမ်းတႅမ်ႈၸၼ်မၢႆမီႈ ၶဝ်ယင်းတိုၵ်ႉသိုပ်ႇႁဵတ်းၵႂႃႇၸွမ်းၽႅၼ် ၼႂ်းဝၼ်းထိ 28.11.2010 ၼႆႉယူႇ ဝႃႈၼႆ။
