- Details
- Published on Tuesday, 23 August 2011 12:41
သိုၵ်းမၢၼ်ႈတပ်ႉၵွင် 510 ၸိူဝ်းပၵ်းပႂ်ႉၼႂ်းၵႄႈၵၢင် ပၢင်ႇၵႄႇတု လႄႈတူင်ႇလၢဝ်းၽုင်ၼိုင်ႈ ၵၼ်ႉၸၼ် ၼၢင်းယိင်းတႆးၽွင်းပွၵ်ႈႁိူၼ်း။
မိူဝ်ႈဝၼ်းထိ 15.8.2011 ပူၼ်ႉမႃးယၢမ်းဝၢႆႇမူင်း 1:00 pm ၼၢင်းဢွၼ်ႇ(ၸိုဝ်ႈပွမ်) ဢႃယု 19 လႄႈၼၢင်းပဝ်း (ၸိုဝ်ႈပွမ်) ဢႃယုယႂ်ႇလိူဝ် ၼၢင်းဢွၼ်ႇဢိတ်းၼိုင်ႈ၊ တင်းသွင်ၵေႃႉပဵၼ်ၵူၼ်း ၵေးသီးပႆတၢင်းပွၵ်ႈႁိူၼ်းသေ ႁူပ်ႉ ထူပ်းသႂ်ႇသိုၵ်းမၢၼ်ႈတပ်ႉၵွင် 510 ၸိူဝ်းပၵ်းပႂ်ႉၼႂ်းၵႄႈၵၢင် ပၢင်ႇၵႄႇတု လႄႈတူင်ႇလၢဝ်း၊ သိုၵ်းမၢၼ်ႈ ၸုမ်းၼၼ်ႉႁွင်ႉထၢမ်ၶဝ်ႁႂ်ႈၵိုတ်းသေၸႂ်ႉၼၢင်းပဝ်း ၵႂႃႇသိုဝ်ႉၶဝ်ႈသွႆးမႃးပၼ်ၶဝ် ၼၢင်းဢွၼ်ႇတႄႉႁႂ်ႈ ၵိုတ်းယူႇဝႆႉၸွမ်းၶဝ် ၼႆယဝ်ႉ။
လႅင်ႇၶၢဝ်ႇလၢတ်ႈဝႃႈ “ၽွင်းၼၢင်းပဝ်းၵႂႃႇသိုဝ်ႉၶဝ်ႈသွႆးသေပွၵ်ႈမႃးၸူးၸုမ်းသိုၵ်းမၢၼ်ႈၼၼ်ႉ မၼ်းၼၢင်း ဢမ်ႇႁၼ် ၼၢင်းဢွၼ်ႇလႄႈၸင်ႇၵႂႃႇထၢမ်ၸဝ်ႈႁၢၼ်(ပူဝ်ႇမူး)သိုၵ်းမၢၼ်ႈၶဝ်သေ ၸဝ်ႈႁၢၼ်သိုၵ်းမၢၼ်ႈ ၵေႃႉၼၼ်ႉလၢတ်ႈၼၢင်းပဝ်းဝႃႈလွင်ႈဢၼ်ၼၢင်းဢွၼ်ႇႁၢႆဝႆႉၼႆႉယႃႇ လၢတ်ႈၼႄၽႂ်ၼႆသေ ဢဝ်ငိုၼ်း မၢၼ်ႈ 200,000 ပျႃးပၼ်မၼ်းၼၢင်း ပိူဝ်ႈတႃႇဢိုတ်းသူပ်း ဢိုတ်းၵႂၢမ်း” ဝႃႈၼႆယဝ်ႉ။
သိုပ်ႇလၢတ်ႈဝႃႈ ထိုင်မႃးၵၢင်ယၢမ်းၵၢင်ၼႂ် 8:00 am ဝၼ်းထိ 16.8.2011 သိုၵ်းမၢၼ်ႈၸင်ႇပွႆႇ ၼၢင်းဢွၼ်ႇ။ မိူဝ်ႈၼၢင်းဢွၼ်ႇထိုင်ႁိူၼ်းၼၼ်ႉ မၼ်းၼၢင်းႁွင်ႉႁွင်ႉႁႆႈႁႆႈၶီၶီငဝ်ငဝ်သေလၢတ်ႈ ၼႄ ပေႃႈမႄႈမၼ်းၼၢင်း ဝႃႈမၼ်းၼၢင်းလႆႈထုၵ်ႇသိုၵ်းမၢၼ်ႈၽုင်ၼိုင်ႈၵၼ်ႉၸၼ်လူလၢႆမၼ်း ၼၢင်းတင်းၶိုၼ်း ဝႃႈၼႆယဝ်ႉ။
မိူဝ်ႈဝၼ်းထိ 15.8.2011 ပူၼ်ႉမႃးၼႆႉၼင်ႇၵဝ်ႇ သိုၵ်းမၢၼ်ႈၼႂ်းတပ်ႉၵွင် 577 ၵေႃႉၼိုင်ႈ ဢၼ်ပႂ်ႉလၢၼ်ႇ (ၵဵတ်ႇ) ပၢင်ႇၵႄႇတု ၶၢၼ်ႉဢိူၼ်သေၸႂ်လမ်သႆႈၵမ်ႇယွၼ်ႉဢမ်ႇမီးၽႂ်မႃးပုတ်ႈ မၼ်းလႄႈ ဢဝ်ၵွင်ႈယိုဝ်းၸွမ်းႁိမ်းႁွမ်းပၢင်သဝ်းသိုၵ်းမၢၼ်ႈၶဝ် ၵူၺ်းဢမ်ႇတိူဝ်ႉၺႃးၽႂ်ၼႆ။
တပ်ႉၵွင်သိုၵ်းမၢၼ်ႈၸုမ်းၼႆႉလွမ်ၵူဝ်ႁႄသေ ၼႄးဝႃႈသိုၵ်းတႆးမႃးယိုဝ်းၶဝ်ၼႆယဝ်ႉ။ ဝၢႆးၼၼ်ႉ ဢဝ် ၵွင်ႈလူင်ၶဝ်ယိုဝ်းၶဝ်ႈၼႂ်းဝၢၼ်ႈ ၵူၼ်းဝၢၼ်ႈလႄႈတိူဝ်ႉၺႃးႁိူၼ်းၵူၼ်းဝၢၼ်ႈလင်ၼိုင်ႈ လုယွၵ်းၵွႆတင်းၼမ် ဝႃႈၼႆယဝ်ႉ။
