joomla templates Youth Power Media

ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉ ၸဝ်ႈသိုၵ်းလူင်မူးဢမ်ႊမႃႊလ် ၵတ်ႉတႃႊၾိ ၽူႈဢွၼ်ႁူဝ် မိူင်းလိပီးယႃး ၶဝ်ႈႁုပ်ႈသိမ်းဝဵင်းလူင် တရီပိူဝ်ႊလီႊလႆႈယဝ်ႉ လႄႈ တူဝ်ႈတၼ်းတႃႇႁုပ်ႈသိမ်း ၸဝ်ႈဢႃႇၼႃႇသိုၵ်းဢၼ်ဢုပ်ႉမိူင်းမႃးၶၢဝ်းတၢင်း 42 ပီ။

ၸုမ်းၶၢဝ်ႇၼွၵ်ႈမိူင်းလၢႆးငၢၼ်းမိူဝ်ႈဝၼ်းထိ 22/08/2011 ဝႃႈ ၸုမ်းယိပ်းၵွင်ႈၵၢင်ႇ သၢၼ်ၶတ်း ဢႃႇၼႃႇၶွင် ၸဝ်ႈသိုၵ်းလူင်မူးဢမ်ႊမႃႊလ် ၵတ်ႉတႃႊၾိ လႆႈၶဝ်ႈသိမ်းဝဵင်းလူင်တရီပိူဝ်ႊလီႊ မိူင်းလူင်ၶွင် လိပီးယႃးလႆႈယဝ်ႉ မိူဝ်ႈၼႆႉယၢမ်းၵၢင်ၼႂ်သေ ၽွမ်ႉတူဝ်ႈတၼ်းတႃႇတေၽဝ် ၶႅပ်း ႁၢင်ႈၸဝ်ႈဢႃႇၼႃႇသိုၵ်း လိပီးယႃး လႄႈ ၵူၼ်ႇလူင်းတီႈၼင်ႈဝၢႆး ဢုပ်ႉပိူင်ႇၽွင်းငမ်းမိူင်းမႃး ႁိုင်ယၢဝ်းၶၢဝ်းႁိုင်ထိုင် 42 ပီဝႃႈၼႆယဝ်ႉ။

ၼႂ်းလၢႆးငၢၼ်းၶၢဝ်ႇလၢတ်ႈထႅင်ႈဝႃႈ ၸုမ်းလုၵ်ႉၽိုၼ်ႉ ၵတ်ႉတႃႊၾိ လႆႈၶဝ်ႈသိမ်း ပိုၼ်ႉတီႈၼႂ်း ဝဵင်းလူင် တရီပိူဝ်ႊလီႊလႆႈမွၵ်ႈ 90% မိူဝ်ႈၶိုၼ်းဝၼ်းထိ 21.8.2011 ပူၼ်ႉမႃး လူၺ်ႈပိုတ်ႇ ၼႃႈသိုၵ်းၶဝ်ႈမႃးပွတ်းတူၵ်းၶွင်ဝဵင်းသေၽွမ်ႉၵၼ်ယိုဝ်းၵွင်ႈၶိုၼ်ႈၾႃႉ သႅၼ်ႇႁွင်ႉ မူၼ်ႈၵျေႃႇၼႂ်း ပၢင်ဢွင်ႇပေႉပွၵ်ႈၼႆႉဝႃႈၼႆ။

ၽွင်းလဵဝ်ၵၼ် ၵတ်ႉတႃႊၾိၵေႃႈ တိုၵ်ႉယူႇၼႂ်းဝဵင်းလူင်တရီပိူဝ်ႊလီႊ ယူႇ လႄႈ ယုမ်ႇယမ်ဝႃႈ တေမီးသိုၵ်းထႅင်ႈႁူဝ်ႁဵင်ၵေႃႉဢဝ်ႁူမ်ႈလူမ်ႈပၼ်ယူႇသေ ၽူႈဢွၼ်ႁူဝ်မိူင်းလိပီးယႃး ပိုတ်ႇ လၢတ်ႈတၢင်းတီႊဝီႊ သူၼ်းႁူၺ်းႁႂ်ႈၵူၼ်းမိူင်းၼႂ်းဝဵင်းလူင် တရီပိူဝ်ႊလီႊဢွၵ်ႇမႃးသၢၼ်ၶတ်း တေႃႇသူႈ ၸုမ်းလုၵ်ႉၽိုၼ်ႉ လႄႈ ၽွမ်ႉတူဝ်ႈတၼ်းတႃႇတေပိုတ်ႇယေးၵွင်ႈလၢၵ်ႈၼၢၵ်ႈပၼ် ၵူၼ်းမိူင်းတႃႇၸႂ်ႉၼႂ်းၵၢၼ်တေႃႇသူႈၽွမ်ႉၵၼ်ၼႆ။ မၼ်းၸၢႆးလႆႈလၢတ်ႈထၢင်ႇလဵၵ်ႉၸုမ်းလုၵ်ႉ ၽိုၼ်ႉဝႃႈ ပဵၼ် “ၼူဝူၺ်ႇယွၵ်း” ဢၼ်ၶဝ်ႈမိူင်းလူင် ဝႃႈၼႆ။

လိူဝ်သေၼၼ်ႉၸုမ်းလုၵ်ႉၽိုၼ်ႉၶဝ် ပိုၼ်ၽၢဝ်ႇဝႃႈ သႃႊဢိၾ်ႉ ဢႃလ်ဢိသ်ႇလၢမ်ႊ လုၵ်ႉၸၢႆး ၵေႃႉလဵၵ်ႉသုတ်းၶွင် ၵတ်ႉတႃႊၾိ ၺႃးၺွပ်ႉယဝ်ႉ လႄႈ မူဝ်ႊႁမ်ႊမဵတ်ႊ ဢႃလ်ၵတ်ႉတႃႊၾိ လုၵ်ႈၸၢႆးလူင်သမ်ႉ ပဵၼ်ၵူၼ်းမႃးယွမ်းသုမ်းတေႃႇၸုမ်းလုၵ်ႉၽိုၼ်ႉ ဝႃႈၼႆ။

မူတ်ႉသ်သႃႊ ဢိပ်ႊပရႃႁိမ်ႊ ၽွင်းလူင်ၽၢႆႇၶၢဝ်ႇသၢၼ် လၢတ်ႈဝႃႈ ပၢင်တိုၵ်းၼႂ်းမိူင်းလူင်တင်ႈ တႄႇဢဝ်မိူဝ်ႈဝၼ်းထိ 20 ထိုင် 21 ပူၼ်ႉမႃးၼႆႉ မီးၵူၼ်းတၢႆထိုင် 1300 ၵေႃႉလႄႈမၢတ်ႇၸဵပ်း ထႅင်ႈ 5000 ၵေႃႉသေၼမ်လူၼ်ႉပူၼ်ႉလိူဝ် တႃႇႁူင်းယႃႇတေၸၢင်ႈ ယူတ်း ယႃလႆႈဝႃႈၼႆယဝ်ႉ။