သၽႃႇဝ

လၢႆးၽုၵ်ႇသွမ်ႈပီႈၼွင်ႉတႆး ပၢၼ်ၵွၼ်ႇ

မိူင်းတႆး ပဵၼ်မိူင်းဢၼ်ႁဵတ်းၵိၼ်ႁႆႈၼႃးမႃး ဢွၼ်တၢင်းလႄႈလွင်ႈႁဵတ်းႁႆႈၼႃးၼႆႉၵူၼ်းမိူင်းတႆး ႁဝ်းၽုၵ်ႇ သွမ်ႈ ၸွမ်းသၽႃႇဝ မႃးတႃႇသေႇ။ ၵူၼ်းၵူႈၶိူဝ်းဢၼ် ႁဵတ်းၵိၼ်ႁႆႈၼႃး ယူႇၼႆႉ ဢဝ်တီႈ တႆးၵႂႃႇၵူၺ်းၼႆယဝ်ႉ။ ၵူၼ်းမိူင်းတႆး ႁဵတ်းၼႃးမိူဝ်ႈပၢၼ်ၵွၼ်ႇၼႆႉ ဢမ်ႇတွၼ်ႉလႆႈၸၢင်ႈ ပၼ်ငိုၼ်း ပၼ်တွင်းၵၼ်သေပွၵ်ႈၵူၼ်းၼႂ်း ဝၢၼ်ႈ ၼႂ်းပွၵ်ႉ ဢဝ်တိၼ် ဢဝ်မိုဝ်းၵၼ် ႁိူၼ်းတႂ်ႈႁိူၼ်းၼိူဝ် ဝၢၼ်ႈ တႂ်ႈဝၢၼ်ႈၼိူဝ် ၸွႆႈထႅမ်ၵၼ်မႃး။

လၢႆးၽေၼမ်ႉၼႃး မိူဝ်ႈၵူႈပွၵ်ႈၵေႃႈ တၢင်းၼိူဝ်သုတ်းသုတ်းၼၼ်ႉတေမီးၽၢႆၼမ်ႉယႂ်ႇယႂ်ႇ ဢၼ် ၼိုင်ႈသေလူင်း မႃး တၢင်းတႂ်ႈ ၼမ်ႉၼႃးၼိုင်ႈတူင်ႈ တေသၢင်ႈပုမ်းၼိုင်ႈလုၵ်ႈ သေၽေၼမ်ႉပၼ်ၵၼ် ႁဵတ်းၼႆဢမ်ႇတွၼ်ႉ လႆႈ ၽိတ်း ၽႅၵ်ႇ ၵၼ် ယွၼ်ႉႁိမ်ၼမ်ႉၼႃးသေပွၵ်ႈ။ လၢႆးၽုၵ်ႇသွမ်ႈၼင်ႇႁိုဝ်တီႈလိၼ်တေဢမ်ႇၸၢင်ၼၼ်ႉ လႆႈတၢင်ႇၶီႈဝူဝ်း ၵႂႃႇသႂ်ႇၼႃးဝၢႆး ဢဝ်ထူဝ်ႇလိၼ် ဢမ်ႇၼၼ် ၽွင်းတေၶိုၼ်းထႆၼႃးၼၼ်ႉၸင်ႇတၢင်ႇဢဝ်ၶီႈဝူဝ်း ၵႂႃႇသႂ်ႇၼႂ်းၼႃး ႁဵတ်းႁႂ်ႈ လိၼ်ဢမ်ႇၸၢင် သေၶဝ်ႈဢွၵ်ႇၼမ်ၼၼ်ႉယဝ်ႉ။

လိူဝ်သေ ႁဵတ်းၼႃးယဝ်ႉ ယင်းၽုၵ်ႇသူၼ်ပႃးထႅင်ႈ သူၼ်ႁိူၼ်း လႄႈ သူၼ်ၼမ်ႉတၵ်းၼႆယဝ်ႉ။ သူၼ်ႁိူၼ်ၼႆႉ ၽုၵ်ႇ တႃႇၵဵပ်းၵိၼ်ၵဵပ်းယမ်ႉ ပုၼ်ႈတႃႇၵူၼ်းၼႂ်းႁိူၼ်းၵူၺ်းသေ မၢင်ႁိူၼ်းၵေႃႈ တေၽုၵ်ႇႁိမ်းႁိူၼ်းတၢင်းလင် ႁိူၼ်း ၸိူဝ်း ၼႆႉ။ သူၼ်ၼမ်ႉတၵ်း ၼႆႉၽုၵ်ႇတႃႇၶၢႆ တေၽုၵ်ႇ ၼမ် ယွၼ်ႉလႆႈ ႁဵတ်းၼမ်ႉဝူၺ်(မူၺ်)ၵၼ်းယၢဝ်း သေ တၵ်းၼမ်ႉႁူတ်း ဢဝ် လႄႈ ၸင်ႇႁွင်ႉသူၼ်ၼမ်ႉတၵ်းၼႆယဝ်ႉ။

ႁႆႈ ဢၼ်ဝႃႈၼႆႉ ၵႆႁိူၼ်း ၵႂႃႇႁဵတ်းၼႂ်းထိူၼ်ႇ တေလႆႈပွမ်ႈမႆႉ တီႇယႃႈမၼ်းသေ ႁဵတ်း သၢမ်ပီသီႇပီၼိုင်ႈပွၵ်ႈ။ လႆႈၶၢႆႉ ပၼ်တီႈ မၼ်းထႅင်ႈ။ ပေႃး ၽုၵ်ႇ ထပ်းၵၼ်ႁိုင်ႁိုင်ၸိုင် တီႈလိၼ်မၼ်းတေၸၢင် လႄႈလႆႈၶၢႆႉပၼ်တီႈ မၼ်း။ ၵူၺ်းသင် ဝႃႈ ပွႆႇမၼ်းႁၢမ်းဝႆႉ ႁႃႈႁူၵ်းပီယဝ်ႉ ၸင်ႇၶိုၼ်းမႃး ႁဵတ်းၶိုၼ်း ႁႆႈၵဝ်ႇ၊ ယွၼ်ႉမၼ်းႁဵတ်းယၢပ်ႇ လႄႈ ၵူၼ်းႁဵတ်းမၼ်း ပေႃးလႆႈႁွင်ႉႁႆႈသေႁဵတ်းလႄႈ ၸင်ႇဝႃႈတၢင်ႇၸိုဝ်ႈ ႁႆႈ ၼႆယဝ်ႉ။