ပွင်ႈၵႂၢမ်း

လွင်ႈလႅၵ်ႈလၢႆႈ IT ၼႂ်းပီ 2011

ပီ 2011 ဢၼ်တိုၵ်ႉပူၼ်ႉၵႂႃႇၼႆႉ လႆႈဝႃႈပဵၼ်ပီလမ်ႇလွင်ႈထႅင်ႈပီၼိုင်ႈၶွင်ဝူင်းၵၢၼ် Information Technologies ဢမ်ႇၼၼ် (IT) လုမ်ႈၾႃႉ လႄႈပီႈၼွင်ႉတႆး ဢၼ်မီးလွင်ႈလႅၵ်ႈလၢႆႈတင်းၼမ် ဢမ်ႇဝႃႈၵၢၼ်ၶေႉ ၶႅင်ႇၵၼ်ၶွင် ၶွမ်ႊပၼီႊ၊ ၵၢၼ်ပၢႆးမၢၵ်ႈမီး၊ ၵၢၼ်ႁဵတ်းဢွၵ်ႇၶိူင်ႈၸႂ်ႉ IT လႄႈလွင်ႈႁူမ်ႇလူမ်ႈၶေႃႈမုၼ်းၸိူဝ်းၼႆႉၵႂႃႇ။

ၶွမ်ႊပၼီႊ IT ဢၼ်ထုၵ်ႇၵၢဝ်ႇလၢတ်ႈထိုင်ၼမ်သုတ်း လႄႈ လႆႈႁပ်ႉလွင်ႈသူၼ်ၸႂ်သုင်သုတ်း ပီ 2011 ၼၼ်ႉ  ပဵၼ်ၸုမ်း Apple ။ လိူဝ်သေၼႆႉ ၸုမ်း Apple ယင်းပဵၼ်ပႃးၸုမ်းဢၼ်မီးလွင်ႈထိုင်တီႈယွတ်ႈ ႁွတ်ႈယိူင်းမၢႆ (ဢွင်ႇမႅင်ႇ) ၽၢႆႇပၢႆးမၢၵ်ႈမီးသုင်သုတ်းၼႂ်းပီ 2011။  လွင်ႈတၢင်းဢၼ်ႁဵတ်းႁႂ်ႈၸုမ်း Apple လႆႈႁပ်ႉလွင်ႈသူၼ်ၸႂ် လႄႈ လၢတ်ႈထိုင်ၼမ်လိူဝ်ပိူၼ်ႈၼၼ်ႉၵေႃႈ ပဵၼ်ယွၼ်ႉၶၢဝ်ႇငၢဝ်းလႄႈၵၢၼ်ႁဵတ်းဢွၵ်ႇၶၢႆ iPad 2 လႄႈ iPhone 4S။ ၵူၺ်းၵူၼ်းႁၵ်ႉၶိူင်ႈၸႂ်ႉ Apple လၢႆလၢႆၵေႃႉတေတိူဝ်ႉၸႂ် ယွၼ်ႉဢမ်ႇလႆႈႁၼ် iPad 3 ၊ iPhone 5 ၊ လႄႈ Apple TV ဢၼ်ၵူၼ်းတင်းၼမ်မုင်ႈမွင်း တေလႆႈၸႂ်ႉၼႂ်းပီ 2011။ ၸိူင်ႉႁိုဝ်ၵေႃႈယဝ်ႉ ၶိူင်ႈၸႂ်ႉၸိူဝ်းၼႆႉ တၵ်းတေ ထုၵ်ႇလၢတ်ႈထိုင်ၼမ်လိူဝ်ၵဝ်ႇၼႂ်းပီ 2012 ၼႆႉယူႇ။

လိူဝ်သေၼႆႉထႅင်ႈ လွင်ႈဢၼ်ႁဵတ်းႁႂ်ႈ Apple ပဵၼ်ၸုမ်းဢၼ်ထုၵ်ႇလၢတ်ႈထိုင်ၼမ်သုတ်းၼၼ်ႉ ပဵၼ်ၵၢၼ်လုတၢႆ ၶွင် Steve Jobs ၽူႈဢွၼ်ၵေႃႇတင်ႈၸုမ်း Apple။ Steve ထုၵ်ႇယုၵ်ႉယွင်ႈဝႃႈ ပဵၼ်ၽူႈဢၼ်ႁဵတ်းႁႂ်ႈမီးလွင်ႈ လႅၵ်ႈလၢႆႈ ၵမ်းယႂ်ႇလူင်ၼႂ်းဝူင်းၵၢၼ် IT။  မၼ်းၸၢႆးယၢမ်ႈလၢတ်ႈဝႃႈ - " ၵဝ်ၶႃႈဢမ်ႇႁဵတ်းဢွၵ်ႇၶိူင်ႈၸႂ်ႉ ဢၼ်လုၵ်ႈ ၵႃႉ(ၵူၼ်းၸႂ်ႉ)ၶႂ်ႈလႆႈ၊ ၵူၺ်းၵဝ်ၶႃႈ ႁဵတ်းႁႂ်ႈလုၵ်ႈၵႃႉၶဝ်မႃးသိုဝ်ႉလႄႈႁၵ်ႉၶိူင်ႈၸႂ်ႉဢၼ်တူဝ်ၶႃႈႁဵတ်းဢွၵ်ႇ" ၼႆ။ ပိုၼ်း ၸၢတ်ႈပၢၼ်(ၽဝ)မၼ်းၸၢႆးဢၼ်ဢမ်ႇတွၼ်ႉယွမ်းသုမ်း၊ လွင်ႈႁၵ်ႉၼႃႈၵၢၼ်မၼ်းၸၢႆး၊ လွင်ႈဢွၼ်ႁူဝ်ၸုမ်း Apple  ၵႂႃႇထိုင်ယိူင်းမၢႆသုင်သုတ်းဢၼ်လႆႈယိူင်းဢၢၼ်းဝႆႉသေ ၵိုင်ႉၵၢင်ႉပွႆႇပၼ်လုၼ်ႈလင်(ၸိူဝ်းမႃးၾၢႆႇလင်)မႃး သိုပ်ႇဢွၼ်ႁူဝ်တေႃႇ လႄႈ ၶေႃႈၵႂၢမ်းၶိုၵ်ႉလိုၵ်ႉသွၼ်ၸႂ်ဢၼ်မၼ်းၸၢႆးယၢမ်ႈလၢတ်ႈ ၸိူဝ်းၼႆႉ ပဵၼ်ဢဵၼ်ႁႅင်းဢီး သူၼ်းႁႂ်ႈ မီးၵၢၼ်လႅၵ်ႈလၢႆႈ၊ ဢမ်ႇဝႃႈပၢႆးဝူၼ်ႉ၊ လွင်ႈႁဵတ်းသၢင်ႈ၊ တေႃႇထိုင် လွင်ႈႁဵတ်းဢွၵ်ႇၶၢႆၶိူင်ႈၸႂ်ႉၶိူင်ႈမိုဝ်း IT  ၼႂ်းဝၼ်းမိူဝ်ႈၼႆႉၼၼ်ႉယူႇ။   

သင်မႃးတူၺ်းၽၢႆႇၶိူင်ႈမိုဝ်းၶိူင်ႈၸႂ်ႉ IT ၼႂ်းပီ 2011 ၸိုင်ပိူင်လူင်မၼ်းပဵၼ် ၵၢၼ်ၶေႉၶႅင်ႇဢွၵ်ႇၶၢႆ ထႅပ်ႊလႅတ်ႊ  (Tablet) လႄႈၾူၼ်း ဢၼ်လၢႆမူႇလၢႆၸုမ်း ၶေႉၵၼ်ႁၢဝ်ႈႁႅင်းတႃႇၸုင်ၸၼ်ၵူၼ်းမႃးသိုဝ်ႉႁႂ်ႈၼမ်သုတ်းႁင်းၽႂ်  မၼ်း။ ပိူင်တႅၵ်ႈမၼ်း Samsung ႁဵတ်းဢွၵ်ႇ Samsung Galaxy Tab 10.1 ၼႂ်းလိူၼ် 2၊ ဢမ်ႇႁိုင်  ၸုမ်း Apple ပိုၼ်ၽႄႈ iPad 2 ၼႂ်းလိူၼ် 3၊ ဝၢႆးၼၼ်ႉၸုမ်း Amazon ပိုၼ်ၽႄႈ ထႅပ်ႊလႅတ်ႊ Kindle Fire  ဢၼ်မီးၵႃႈၶၼ်ပေႃး(ထုၵ်ႇ)လိူဝ်လႄႈလဵၵ်ႉလိူဝ်ၼႂ်းလိူၼ် 9၊ ပူၼ်ႉၵႂႃႇပႆႇလႆႈလိူၼ် Apple သမ်ႉပိုၼ်ၽႄႈ iPhone 4S ၊  လိုၼ်းသုတ်း တၢင်းၸုမ်း Samsung ႁိပ်ႈပိုၼ်ၽႄႈၾူၼ်း Samsung Galaxy Nexus ၼႂ်းလိူၼ် 12 တႃႇၶေႉ ၶႅင်ႇ တင်း iPhone 4S ၸိူဝ်းၼႆႉၵႂႃႇၼၼ်ႉယူႇ။  

လိူဝ်သေၼႆႉ ပီ2011 ၼႆႉ လႆႈဝႃႈပဵၼ်ပီဢၼ် မီးၵၢၼ်လၢတ်ႈထိုင် ပၼ်ႁႃၵဵဝ်ႇလူၺ်ႈလွင်ႈႁူမ်ႇလူမ်ႈၶေႃႈမုၼ်း ၼမ်  လိူဝ်ၵဝ်ႇ။ လၢႆၵေႃႉႁွင်ႉပီ 2011 ဝႃႈပဵၼ်ပီပၢင်တိုၵ်း ႁႅၵ်ႊၵိူဝ်ႊ (hacker) လႄႈ ၶွမ်ႊပၼီႊ ၸိူဝ်းၵမ်ႈၼမ်ပဵၼ်ၶွမ်ႊ ပၼီႊ ႁဵတ်းၵၢၼ်ပၼ်လူင်ပွင်ၸိုင်ႈ။ ၽူႈလူင်ႉလႅၼ်ႇၽၢႆႇလွင်ႈႁူမ်ႇလူမ်ႈတင်းလုမ်ႈၾႃႉ(ၵမ်ႇၾႃႇ) ပၵ်းတႃၵႂႃႇ တီႈ ၸုမ်းႁႅၵ်ႊၵိူဝ်ႊဢၼ်ၸႂ်ႉၸိုဝ်ႈဝႃႈ Anonymous လႄႈ LulzSec ၸိူဝ်းၵႂႃႇယႃႉၶဝ်ႈ Server ဢမ်ႇၼၼ်ၶွမ်းၶွင်ၶွမ်ႊ ပၼီႊ(မၢင်ၸိူဝ်းလႆႈၸိုဝ်ႈဝႃႈမီးလွင်ႈႁူမ်ႇလူမ်ႈသုင်သုတ်း)သေ ဢဝ်ၶေႃႈမုၼ်းလပ်ႉဢၼ်လၵ်ႉလႆႈမႃးပိုၼ်ၽႄႈၼိူဝ် ဝႅပ်ႉသၢႆႉၸဵမ်ၸိူဝ်းၼႆႉ။  

ဢၼ်လီသူၼ်ၸႂ်လိူဝ် လႄႈ လွင်ႈဢၼ်လၢႆၽၢႆႇမႆႈၸႂ်လိူဝ်ၼၼ်ႉ ပဵၼ်ၼမ်ႉၵတ်ႉ လႄႈ တိုဝ်ႉတၢင်းႁႅၵ်ႉ ၸုမ်းႁႅၵ်ႊ ၵိူဝ်ႊၶဝ် ၼႄၼႂ်းပီ 2011 ဢၼ်လႅၵ်ႈလၢႆႈပၢႆးဝူၼ်ႉ ၵူၼ်းတင်းၼမ်လႄႈလူင်ပွင်ၸိုင်ႈလၢႆလၢႆမိူင်းၵႂႃႇတေႃႇ ၸူဝ်ႈ။ ပိူင်တႅၵ်ႈမၼ်း ၼႂ်းပီ 2011 ၼႆႉ မီးၵၢၼ်ၶူၼ်ႉႁၼ်မႅင်းမႂ်ႇ Duqu ဢၼ်ႁဵတ်းၵၢၼ်မိူၼ်ၵၼ်တင်း မႅင်း Stuxnet ဢၼ်လႆႈၸိုဝ်ႈဝႃႈပဵၼ်မႅင်းဢၼ်လီၵူဝ်သုတ်းမဵဝ်းၼိုင်ႈ။ ၵွပ်ႈဝႃႈမၼ်းၸၢင်ႈပိၵ်ႉ လႄႈ ယႃႉပႅတ်ႈ ၶိူဝ်းၶၢႆႇၶွမ်းၼႂ်းႁူင်း ငၢၼ်း၊ ၶွမ်ႊပၼီႊ တေႃႇပေႃးထိုင် ႁူင်းၼိဝ်ႊၶရီးယႃႊ မိူၼ်ၼင်ႇမိူင်းဢီႊရၢၼ်ႊ ၺႃးၵႂႃႇမိူဝ်ႈ ပူၼ်ႉမႃး။ ၵူၺ်းမႅင်း ၼႆႉ တေႃႇထိုင်ယၢမ်းလဵဝ် ဢမ်ႇၸၢင်ႈလၢမ်းႁူႉတူၼ်ႈတေႃမၼ်း လႄႈ ဢမ်ႇႁူႉဝႃႈၵူၼ်းတႅမ်ႈပူဝ်ႊၵႅမ်ႊမၼ်းပဵၼ် ၽႂ်။ ၼႆႉပဵၼ်တူဝ်ယၢင်ႇၼိုင်ႈၶွင်ၼမ်ႉၵတ်ႉ ႁႅၵ်ႊၵိူဝ်ႊ ဢၼ်ႁဵတ်းႁႂ်ႈၽူႈလူင်ႉလႅၼ်ႇၽၢႆႇ လွင်ႈႁူမ်ႇလူမ်ႈၶွမ်းၶဝ် ႁူဝ်ၶႆႈၵႂႃႇ ၸွတ်ႇတူဝ်ႈလုမ်ႈၾႃႉ။

ထႅင်ႈလွင်ႈၼိုင်ႈ သင်လၢတ်ႈထိုင် လွင်ႈတၢင်း(ႁဵတ်ႇၵၢၼ်) IT ၼႂ်းပီ 2011 ၸိုင် လွင်ႈဢၼ်လိုမ်းဢမ်ႇလႆႈၼၼ်ႉ တၵ်းပဵၼ်လွင်ႈပၵ်းပိူင်မၢႆမီႈ ဢၼ်လၢႆၽၢႆႇ လၢႆၸုမ်း ထဵင်ၵၼ်ဢမ်ႇသုတ်းဢမ်ႇတူဝ်ႈၼၼ်ႉယူႇ။ ပိူင်တႅၵ်ႈမၼ်း ၸုမ်း Apple ၼေးၶွမ်ႊပၼီႊ Samsung ဝႃႈ Samsung ၵွပ်ႊပီႊ (ႁဵတ်းမိူၼ်) တီႊသၢႆႊ iPhone သေ ႁဵတ်းဢွၵ်ႇ ၾူၼ်း Samsung Galaxy ဢၼ်ၸုမ်း Apple ဝႃႈၽၢင်ႁၢင်ႈလႄႈလွင်ႈႁဵတ်းၵၢၼ်မၼ်းမိူၼ် iPhone။ လွင်ႈၸုမ်း Microsoft မႂ်ငိုၼ်း ၶွမ်ႊပၼီႊၸိူဝ်းႁဵတ်းဢွၵ်ႇ ၾူၼ်း Android ၵွပ်ႈဝႃႈ ၾူၼ်း Android ဢၼ်ပဵၼ် OS free (ဢမ်ႇလႆႈသဵင်ႈငိုၼ်းတႃႇၸႂ်ႉ) ႁဵတ်းႁႂ်ႈမီးလွင်ႈတုမ်ႉတိူဝ်ႉတေႃႇပၢႆးမၢၵ်ႈမီး Microsoft ၸိူဝ်းၼႆႉၵႂႃႇ။

တၢင်းၽၢႆႇ Social Media သမ်ႉ ၼႂ်းပီ 2011 ၼၼ်ႉ Facebook မီးၵူၼ်းၸႂ်ႉတင်းသဵင်ႈမွၵ်ႈ 800 လၢၼ်ႉၵေႃႉ။  တႃႇၶေႉၶႅင်ႇတင်း Facebook ၼၼ်ႉ ၸုမ်း Google ပိုၼ်ၽႄႈ Google+ ၼႂ်းလိူၼ် 6။ ပဵၵ်ႉသမ်ႉဝႃႈပိုတ်ႇတူဝ် မႃးပႆႇထိုင်ပီသေတႃႉ ၼႂ်းပၢႆပီ 2011 ၼၼ်ႉ Google+ မီးၵူၼ်းၸႂ်ႉမွၵ်ႈ 62 လၢၼ်ႉၵေႃႉ လႄႈ ၼိုင်ႈဝၼ်းလႂ် မီး ၵူၼ်းၶဝ်ႈၸႂ်ႉမႂ်ႇမွၵ်ႈ 625,000 ၵေႃႉ ၼႆယူႇ။  

လိုၼ်းသုတ်း သင်ထၢမ်ထိုင် လွင်ႈလႅၵ်ႈလၢႆႈ IT ၼႂ်းၵႄႈၵၢင်ပီႈၼွင်ႉတႆးႁဝ်း ၼႂ်းပီ 2011 ၸိုင် တေမီးယူႇလၢႆလၢႆ ပိူင် မိူၼ်ၼင်ႇ -

(1) ၽၢႆႇလိၵ်ႈလၢႆး - မီးၵၢၼ်ပိုၼ်ၽႄႈ PangLong Unicode 6.0, ဢၼ်ပဵၼ်ၾွၼ်ႉ  Unicode တႆး ၼႂ်းလိူၼ် 2 လႄႈၾွၼ်ႉယူႊၼီႊၶူတ်ႊတႆး၊
(2) ပၢႆးမွၼ်း - မီးပီႈၼွင်ႉတႆး ၸိူဝ်းၵႂႃႇထွမ်ႇၵႂၢမ်းတႆး ဢမ်ႇၼၼ် ၸိူဝ်းဢဝ်ၵႂၢမ်းၸဝ်ႈၵဝ်ႇႁွင်ႉ/ပိူၼ်ႈႁွင်ႉတၢင်ႇ ၶိုၼ်ႈ ၼိူဝ်ဝႅပ်ႉသၢႆႉ မိူၼ်ၼင်ႇ Youtube လႄႈ Facebook ၼမ်လိူဝ်ၵဝ်ႇ။   
(3) Social Media - တၢင်းၼမ်ပီႈၼွင်ႉတႆးၸိူဝ်းၶဝ်ႈၸႂ်ႉ Facebook ၼၼ်ႉ လႆႈဝႃႈပဵၼ်ၵၢၼ်လႅၵ်ႈလၢႆႈယႂ်ႇသုတ်း  ၶွင် IT တႆးၼႂ်းပီ 2011 ၵေႃႈဝႃႈလႆႈ။ ၼႂ်းပီဢၼ်ပူၼ်ႉမႃးၼႆႉ ပဵၵ်ႉသမ်ႉဝႃႈဢမ်ႇႁူႉတႅတ်ႈၼႅတ်ႈလႆႈဝႃႈ ၸၢဝ်းတႆး ၸိူဝ်းၶဝ်ႈၸႂ်ႉ Facebook မီးၵႃႈႁိုဝ်သေတႃႉ ၵူၺ်းသင်ထတ်းတူၺ်း ၵၢၼ်တူင်ႉတၵ်ႉဢုပ်ႇဢူဝ်း၊ ၵၢၼ်ႁႃဢူၺ်း ၵေႃႉ လႄႈ ၵၢၼ်လႅၵ်ႈလၢႆႈၶေႃႈမုၼ်းၵၼ်ၶွင်ပီႈၼွင်ႉတႆး ၸိူဝ်းၸႂ်ႉ Facebook ၼႂ်းပီ 2011 သေ တႅၵ်ႈၼိူင်းတင်း ပီ 2010 ၸိုင် ပိုၼ်ႉတီႈၵၢၼ်လႅၵ်ႈလၢႆႈမၼ်းၵႂႃႇၵၼ်တင်းၼမ်။

ၼွၵ်ႈသေႁူဝ်ၶေႃႈပႃႈၼိူဝ်ၼႆႉယဝ်ႉ ၼႂ်းပီး 2011 ၼၼ်ႉ ယင်းမီးလွင်ႈလႅၵ်ႈလၢႆႈ IT တၢင်ႇၸိူဝ်ႉတၢင်ႇပိူင်တင်းၼမ်။ ပဵၼ်ႁိုဝ်ၵေႃႈယဝ်ႉ ပီ 2011 ဢၼ်ပူၼ်ႉၵႂႃႇၼၼ်ႉ လႆႈဝႃႈပဵၼ်ပီလမ်ႇလွင်ႈထႅင်ႈပီၼိုင်ႈတႃႇတူင်ႇဝူင်း ၽူႈႁၵ်ႉ IT ၶဝ် ဢၼ်ႁဵတ်းႁႂ်ႈမီးလွင်ႈလႅၵ်ႈလၢႆႈ ဢမ်ႇဝႃႈၽၢႆႇၶေႉၶဵင်ႇႁဵတ်းဢွၵ်ႇၶိူင်ႈၸႂ်ႉၶိူင်ႈၸၢၵ်ႈ၊ ၽၢႆႇလွင်ႈႁူမ်ႇလူမ်ႈ၊ ၽၢႆႇပၵ်း ပိူင် မၢႆမီႈ၊ ၽၢႆႇငိုၼ်းတွင်း လႄႈ ၽၢႆႇ Social Media ၸိူဝ်းၼႆႉၵႂႃႇ။ လိူဝ်သေၼႆႉ လွင်ႈလႅၵ်ႈလၢႆႈ IT ၸိူဝ်းၼႆႉတေ သိုပ်ႇထုၵ်ႇလၢတ်ႈထိုင်၊ သိုပ်ႇမူၼ်ႉမေး လႄႈ သိုပ်ႇႁဵတ်းသၢင်ႈပွင်ပဵၼ်မႃးၼမ်လိူဝ်ၵဝ်ႇ ဢၼ်သူၶဝ် ႁဝ်းႁႃးတေလႆႈ ထူပ်းၼႂ်းပီ 2012 ဢမ်ႇၼမ်ၵေႃႈဢေႇ ၼၼ်ႉယူႇ။