ပွင်ႈၵႂၢမ်း

ထိုင်ၶၢဝ်းယၢမ်းၵူၼ်းၼုမ်ႇ ယုမ်ႇယမ် ပိၼ်ႇပႆႇ ၶဝ်ႈႁႃၵၼ်

ငဝ်းလၢႆးလုမ်ႈၾႃႉမိူဝ်ႈလဵဝ် ၵွပ်ႈလွင်ႈသင်ၵေႃႈၵိုင်ႉၵၢင်ႉလႅၵ်ႈလၢႆႈၽႂ်းၶၼ်ဢၼ်သမ်ႉပေႃး ဢမ်ႇ တၼ်း လမ်းၸၼ် ၶိုတ်းတၢမ်းတၼ်းလႆႈၼၼ်ႉလႄႈ သင်ၵုမ်ႇပႂ်ႉမိုဝ်ႉ လိူၼ်ဝၼ်း ယူႇၸိုင် ယိုင်ႈ ႁိုင်ယိုင်ႈႁဝ်း တူၵ်းလိုၼ်း တိုၼ်းဢမ်ႇတၼ်းပိူၼ်ႈတေႉတေႉၼၼ်ႉယဝ်ႉ။

သင်ၶိုၼ်းဝၢႆႇတူၺ်းငဝ်းလၢႆးဝၢၼ်ႈႁဝ်းမိူင်းတႆးႁဝ်း ဢၼ်ယူႇႁူမ်ႈၵိုၵ်းဝႆႉမိူင်းမၢၼ်ႈ ဢၼ်ႁွင်ႉၵၼ်ယူႇဝႃႈ မိူင်းႁူမ်ႈတုမ် မိူင်းမၢၼ်ႈ ၼႆၼၼ်ႉၸိုင်ၶႅၼ်းမႅၼ်ႈၽွင်းငဝ်း လၢႆးလၢႆလွင်ႈတေ ၶဝ်ႈသူႇ ၼႂ်းၶၢဝ်းယၢမ်း လႅၵ်ႈလၢႆႈဢၼ်ႁွင်ႉဝႃႈ Transition time ၼၼ်ႉလႄႈယိုင်ႈၶႅၼ်းပဵၼ်ၶၢဝ်း ယၢမ်းၶိုၵ်ႉၶၢႆး ဢၼ်ၵူႈၾၢႆႇ ၵူႈပၢႆးတၵ်း လႆႈလူတ်းယွမ်းမႃႇၼႃႉ တေႃႇၵၼ်သေ ႁႃတၢင်းႁူမ်ႈမိုဝ်း ႁူမ်ႈၸ်ႂ ႁူမ်ႈပၢႆးဝူၼ်ႉ ႁူမ်ႈလၢႆးႁဵတ်းသၢင်ႈ တႃႇပုၼ်ႈပၢင်ႈၸိူဝ်ႉၸၢတ်ႈ ဝၢၼ်ႈမိူင်း ၸိူဝ်ႉၶိူဝ်းႁဝ်း မိူဝ်းၼႃႈတေႉတေႉ။

ဢိင်ၼိူဝ်လွင်ႈတၢင်းၸိူဝ်းၼႆႉသေလႄႈ မိူဝ်ႈဝၼ်းထိ 17-18.12.2011 ၶၢဝ်းတၢင်းသွင်ဝၼ်း ၸုမ်းသိုဝ်ႇ ႁႅင်းၼုမ်ႇ ဢၼ်တူင်ႉၼိုင်ပုၼ်ႈ သုၼ်ႇလႆႈၵူၼ်းၼုမ်ႇ လႄႈတူင်ႉဝူင်းတႆးဢၼ်ပၵ်း လုမ်းယူႇ ၸွမ်းလႅၼ် လိၼ်တႆး-ထႆး လႆႈဢွၼ်ၸတ်းပၢင်ဢုပ်ႇဢူဝ်း လႅၵ်ႈလၢႆႈတၢင်း ႁူႉၵူၼ်းၼုမ်ႇ Shan Youth Exchange လႄႈ ၵၢၼ်ငၢၼ်းဢၼ် လႆႈတူင်ႉၼိုင်ႁဵတ်းသၢင်ႈမႃး။ ၼႂ်းပၢင်ၵုမ် ၼၼ်ႉပေႃးတေၼပ်ႉ ပဵၼ်ၸုမ်း ၸိုင် တင်းမူတ်းၸုမ်းၸိူဝ်းၶဝ်ႈႁူမ်ႈမီး 23 ၸုမ်း။ သင်တေၼပ်ႉ ပဵၼ်ႁူဝ်ၵူၼ်းၸိုင်မီး 70-98။ သင်ၼပ်ႉ ပဵၼ်မိူင်းၸိုင်ၵူၼ်း ၼုမ်ႇၸိူဝ်း လုၵ်ႉမိူင်းတႆးမႃးတင်း မူတ်းမီး 35 မိူင်း/ဝဵင်း။ ၼႆႉလႆႈဝႃႈၸမ်ၶႂ်ႈၸေးၵူႈ ၸေႈဝဵင်း ၼႂ်းမိူင်းတႆးပတ်းပိုၼ်ႉသေသမ်ႉ ပဵၼ်ၵူၼ်းၼုမ်ႇ တင်း မူတ်းလႄႈလႆႈဝႃႈပဵၼ် သၢႆငၢႆ ၶိုၵ်ႉၶၢႆး ပိူင်လီတႃႇၸိူဝ်ႉၶိူဝ်းမိူဝ်းၼႃႈတေႉ။

ၼႂ်းပၢင်ၵုမ်လႆႈပိၼ်ႇပႆႇဢုပ်ႇဢူဝ်းၵဵဝ်ႇလူၺ်ႈၵၢၼ်ငၢၼ်းၵၼ် ၸိူဝ်းတူင်ႉၼိုင်ႁဵတ်းသၢင်ႈမႃးလႄႈ ၸိူဝ်းၶႂ်ႈ ပဵၼ် တေႁဵတ်းမိူဝ်းၼႃႈ။ လွင်ႈ ဢုပ်ႇၵၼ်ႁူဝ်ယွႆႈႁူဝ်ယႅမ်းတႄႉၽူႈတႅမ်ႈ တေဢမ်ႇၶႆႈၼႄ မူတ်းယဝ်ႉ ၵွပ်ႈၵူဝ်မၼ်းယၢဝ်း ပူၼ်ႉတီႈလႄႈ ၽူႈဢၢၼ်ႇတေၶၢၼ်ႉလူ။ ၵွပ်ႈ ၼၼ်တေၶႆႈၼႄ ၸိူဝ်းပႅၵ်ႇသေလမ်ႇ လွင်ႈ ၶိုၼ်ႈမႃးမႂ်ႇၶိုၵ်ႉတွၼ်း ၼင်ႇၸဝ်ႈၵဝ်ႇတွင်းလႆႈၸိူဝ်းၼၼ်ႉၵူၺ်း။

ႁူဝ်ၶေႃႈဢၼ်ဢဝ်ဢုပ်ႇဢူဝ်းလႅၵ်ႈလၢႆႈတၢင်းႁူႉၵၼ်တႄႉ လမ်ႇလွင်ႈၶိုၵ်ႉၶႅမ်ႉတင်းၼမ်ၼင်ႇၵၼ် ၵူၺ်း ဢၼ်ပႅၵ်ႇတႄႉ မီးလွင်ႈတူင်ႉၼိုင် လုၵ်ႈႁဵၼ်းၸၼ်ႉၸွမ်၊ ဝူင်းႁႆႇတိုင်ႈမႂ်ႇ ဢၼ်သႂ်ႇၸိုဝ်ႈဝႃႈ ဝူင်းၼူဝ်း ၼဵမ်း လႄႈၵဵဝ်ႇၵပ်းလိူင်ႈ IT ဢၼ်မႅၼ်ႈၽွင်းတိုၵ်ႉႁိူဝ်ႈႁိူင်းသေသူင် တိုၵ်ႉႁိတ်ႉ (Hit) ၵၼ်ၼႂ်း တူင်ႇဝူင်းၵူၼ်းၼုမ်ႇလႄႈ လုမ်ႈၾႃႉယၢမ်းလဵဝ်။

ၸုမ်းလုၵ်ႈႁဵၼ်းၸၼ်ႉၸွမ်ၼွၵ်ႈမိူင်း Shan University Student. ၸုမ်းၼႆႉပဵၼ်ၸုမ်းၵူၼ်း ၼုမ်ႇ ဢၼ်ၸင်ႇႁႃတင်ႈမႃးၼႂ်းပီ 2011။ ယိူင်းဢၢၼ်းပိူဝ်ႈတႃႇၸွႆႈထႅမ်ၵူၼ်းၼုမ်ႇၸိူဝ်းႁႃ တိုဝ်ႉတၢင်း ငိုၼ်း ထုၼ်းၵၢၼ်ႁဵၼ်း Scholarship ၶႂ်ႈၵႂႃႇႁဵၼ်းၸၼ်ႉၸွမ် မိူၼ်မိူင်းၼွၵ်ႈ။ ၸုမ်းလုၵ်ႈႁဵၼ်းၸၼ်ႉၸွမ် ၼႆႉၸွႆႈၵပ်းသၢၼ်ပၼ်လႅင်ႇငိုၼ်းထုၼ်းၵၢၼ်ႁဵၼ်းလႂ်၊ ၸွႆႈပၼ်ၶေႃႈ မုၼ်းတႃႇႁဵၼ်းၸၼ်ႉၸွမ်လႂ်၊ ၸွႆႈၵပ်း သၢၼ်ပၼ်တႃႇၶိုၼ်ႈၸၼ်ႉၸွမ်လႂ်၊ ၸွႆႈႁႃတိုဝ်ႉတၢင်း တႃႇလႆႈငိုၼ်းထုၼ်းၵၢၼ်ႁဵၼ်းလႂ်ၸဵမ် ၸိူဝ်းၼႆႉယဝ်ႉ။ ၵူၼ်းၼႂ်းမူႇၸုမ်းၵေႃႈ ပဵၼ် ၵူၼ်းၼုမ်ႇ ဢၼ်တိုၵ်ႉႁဵၼ်းဝႆႉတီႈၸၼ်ႉၸွမ် ၼႂ်းမိူင်းထႆး လၢႆလၢႆတီႈၼၼ်ႉယဝ်ႉ။

ၸုမ်းႁႆႇတိုင်ႈဝူင်းၼူဝ်းၼဵမ်း (No Name) ပိၼ်ႇပဵၼ်ၵႂၢမ်းတႆးၵေႃႈဝူင်းဢမ်ႇမီးၸိုဝ်ႈၼၼ်ႉ ယဝ်ႉ။ ဝူင်းၼႆႉၵေႃႈၸင်ႇႁႃၶွတ်ႇၽွတ်ႈတင်ႈ ၶိုၼ်ႈမႃး မိူဝ်ႈဝၼ်းထိ 22/01/2011မိူၼ်ၵၼ် ၼင်ႇၵဝ်ႇ။ ယိူင်းဢၢၼ်း 1. တေၸႂ်ႉ ပၢႆးမွၼ်းၽဵင်းၵႂၢမ်းၼႂ်းၵၢၼ်တေႃႇ သူႈႁႂ်ႈၵူၼ်းတင်း ၼမ်လႆႈ ႁပ်ႉႁူႉၸွမ်း လွင်ႈယၢပ်ႇၽိုတ်ႇၵိၼ်းၸႂ် ၵူၼ်းမိူင်းၸိုင်ႈတႆး။ 2.ဢၢၼ်းပိုတ်ႇလၢတ်ႈႁွင်ႉသႅၼ်ႇ ၼႄ လွင်ႈသုၼ်ႇလႆႈ ၵူၼ်းဢၼ် ၵူၼ်းမိူင်းၸိုင်ႈတႆး ၵူႈၸၢဝ်းၶိူဝ်းလႆႈထုၵ်ႇတဵၵ်းတဵင်ၵၼ်ႉၸၼ် လူလၢႆ၊ ႁႂ်ႈပဵၼ်လွင်ႈ ၵမ်ႉထႅမ်ၸွႆႈလိူဝ်ပိူဝ်ႈတႃႇႁႂ်ႈမီး လွင်ႈလႅၵ်ႈလၢႆႈ ထၢင်ႇ ႁၢင်ႈ ၵတ်းယဵၼ် ၼႆယဝ်ႉ။
 
ၵွပ်ႈသင်ၸႂ်ႉၸိုဝ်ႈဝူင်းၼူဝ်းၼဵမ်းၼႆၼၼ်ႉ ၸၢႆးတိုၼ်းလီ ႁူဝ်ၼႃႈဝူင်းသပ်းလႅင်းၼႄဝႃႈ “ၵွပ်ႈ ယုမ်ႇယမ် ဝႃႈ တႃႇႁဵတ်းၽွၼ်းလီပုၼ်ႈ ၵူၼ်းတင်းၼမ်ၼၼ်ႉဢမ်ႇၸမ်ပဵၼ်တၵ်းလႆႈမီးၸိုဝ်ႈ သဵင်ယႂ်ႇ၊ တႃႇ ႁႂ်ႈၸိုဝ်ႈ သဵင်လင်ဢမ်ႇၸႂ်ႈထိၼိုင်ႈ၊ ဢမ်ႇမီးၸိုဝ်ႈ ဢမ်ႇလႆႈၸိုဝ်ႈ ၵေႃႈပေႃးပဵၼ် ပုၼ်ႈပၢင်ႈၵူၼ်းတင်းၼမ် တိုၼ်း တေႁဵတ်းၼႆလႄႈၸင်ႇလိူၵ်ႈၸိုဝ်ႈ “ၼူဝ်းၼဵမ်း ” ဝႃႈၼႆယဝ်ႉ။

ဝူင်းၼူဝ်းၼဵမ်းလႆႈႁၢင်ႈႁႅၼ်းဝႆႉတႃႇပိုၼ်ၽေမူၼ်ႉၶႅပ်းၵႂၢမ်း VCD ပႃး။ ဢၼ်ဢဝ်ၼႃႈတီႈပုၼ်ႈၽွၼ်းသေ လဝ်ႇမူၼ်ႈ တူၼ်ႈၸႂ် ၼင်ႇႁိုဝ် ၽူႈ ၶဝ်ႈႁူမ်ႈပၢင်ၵုမ်ပေႃးတေဢမ်ႇ ႁူဝ်ၶိုၼ်ႈ ႁူဝ်ၶႆႈယွၼ်ႉလိူင်ႈၼၼ်ႉ လိူင်ႈၼႆႉ ၼၼ်ႉၵေႃႈပဵၼ်ဝူင်းၼူဝ်းၼဵမ်းၼႆႉယဝ်ႉ။ ၼင်ႇႁိုဝ်ပၢင် လႅၵ်ႈလၢႆႈပေႃးတေမီး တၢင်းသိူဝ်းသေ ႁူဝ်ဢမ်ႇလႆႈပၼ်ႇၶင်ႇ ဢွၵ်းဢမ်ႇလႆႈသုၵ်ႉယုင်ႈၼၼ်ႉ ၸိူဝ်းၶဝ် ၸွႆႈႁွင်ႉ ၽဵင်းၵႂၢမ်း ပူၵ်းတိုၼ်ႇ ၵၢၼ်ႁၵ်ႉ ၸိူဝ်ႉၸၢတ်ႈ ဝၢၼ်ႈမိူင်း ပၢႆးမိူင်း ပၢႆးႁၵ်ႉ ၼင်ႇၵၼ်။

ဢၢႆႊထီႊ Information of Technology (IT) ၵၢပ်ႈပၢၼ်မိူဝ်ႈလဵဝ်ၵွပ်ႈပိူဝ်ႈပဵၼ်ၵၢပ်ႈပၢၼ် IT ႁိူဝ်ႈႁိူင်း လႄႈ လွင်ႈသင်လိူင်ႈသင်ၵေႃႈ ၽႂ်း ၶၼ်တေႉတေႉ။ တူၺ်းတူဝ်ယၢင်ႇမၼ်းငၢႆႈငၢႆႈမိူၼ် မိူဝ်ႈလဵဝ် ဢၼ်သူင်ႁိတ်ႉၵၼ် ၼႃႇၼႆႉပဵၼ် ၾဵၵ်ႊပုၵ်ႊ (Facebook) www.facebook.com လွင်ႈသင်လိူင်ႈသင်ၵေႃႈ ၵႆႉဢဝ်ၶိုၼ်ႈၼိူဝ် ၾဵၵ်ႊပုၵ်ႊ သေဢုပ်ႇၼႄသမ်ႉၼႄလၢတ်ႈၼႄၵၼ်၊ ၵွပ်ႈၼၼ်ပေႃး မေႃၸႂ်ႉတိုဝ်း IT ပဵၼ်ၶိူင်ႈမိုဝ်းသေတူင်ႉၼိုင် ၸိုင်လႆႈဝႃႈပဵၼ်ၶိူင်ႈမိုဝ်းဢၼ်ၸၢင်ႈ ၸႂ်ႉတိုဝ်းတႃႇၸဵဝ်းႁွတ်ႈယိူင်းမၢႆဢၼ်ၼိုင်ႈ။

ႁူဝ်ၶေႃႈ IT ၼႆႉတႄႉဢၼ်ဢဝ်ဢုပ်ႇလၢတ်ႈၶႆႈၼႄ ၵမ်ႈၼမ်ပဵၼ်လိူင်ႈၾွၼ်ႉယူႊၼီႊၶူတ်ႊ (Font Unicode)။ ၵွပ်ႈဝႃႈၵႃႈပူၼ်ႉမႃးတႆးဢမ်ႇမီး(Font Unicode)လႄႈလႆႈဢဝ်တီႈယူႇပိူၼ်ႈ သေၶူင်ဢွၵ်ႇ ႁဵတ်းဢွၵ်ႇၾွၼ်ႉ ႁင်းၽ်ႂႁင်းမၼ်း လွၵ်းမိုဝ်းၽ်ႂလွၵ်းမိုဝ်းမၼ်းသေၸႂ်ႉတိုဝ်းမႃး။ ၵမ်းၼႆႉ တႆးၵေႃႈမီး ပိုၼ်ႉတီႈ (Font Unicode) မႃးယဝ်ႉလႄႈၸိူဝ်းၽူႈ လူင်ႉလႅၼ်ႇၾၢႆႇဢၢႆႊထီႊ ၶဝ် ဢွၼ်ၵၼ်ၶူင်သၢင်ႈ ႁဵတ်းဢွၵ်ႇၾွၼ်ႉ (Font Unicode) တႆးမႃး။ ၵူၺ်းၵႃႈပၼ်ႁႃသမ်ႉမႃး ၵိုတ်းယူႇတီႈဢၼ် လွၵ်းမိုဝ်းယင်း ပႆႇမိူၼ်ၵၼ်ၼၼ်ႉယဝ်ႉ။ တႃႇတေႁႂ်ႈလွၵ်းမိုဝ်း ပဵၼ်ပိူင်လဵဝ် တီႈလဵဝ်ၵၼ်ၼၼ်ႉ ၽူႈလူင်ႉလႅၼ်ႇၾၢႆႇ IT ၶဝ်လၢႆၾၢႆႇလၢႆတၢင်း ၸဵမ်ၼႂ်းမိူင်းၼွၵ်ႈမိူင်းတၵ်း လူဝ်ႇလႆႈ ဢုပ်ႇဢူဝ်းၵၼ်၊ ယွၼ်ႇယၢၼ်း ယွမ်းႁပ်ႉၵၼ် ႁူမ်ႈၵၼ်ႁဵတ်းသၢင်ႈလႆႈၸႂ်ၸႂ်ႉတိုဝ်းပိူင် လဵဝ် ၵၼ်ၵႂႃႇၵွၼ်ႇ ၸင်ႇၸၢင်ႈပဵၼ်မႃးလႆႈ။ လွင်ႈၼႆႉတၵ်းလႆႈ ဢဝ်ၶၢဝ်းယၢမ်းၵႆႉဢုပ်ႇဢူဝ်းႁူမ်ႈ ၵၼ်ႁဵတ်းၵႂႃႇၵွၼ်ႇ။ ၵူၺ်းၵႃႈ ဢၼ်တိုၵ်းသူၼ်းၼႂ်းပၢင်ဢုပ်ႇဢူဝ်း တႄႉၶႂ်ႈႁႂ်ႈၸႂ်ႉတိုဝ်းၾွၼ်ႉ(Font Unicode) ဢၼ်သၢင်ႈမႃးမႂ်ႇၵၼ်ၵႂႃႇ။

ၵမ်းၼႆႉတေၶႆႈၼႄငဝ်းလၢႆးၵၢၼ်မိူင်း ဢၼ်ဢႃးၸၢၼ်ၶိုၼ်းသႂ် ၽူႈၵွၼ်းၵေႃၶၢဝ်ႇၽူႈတွႆႇႁွၵ်ႈ မႃးၶႆႈၼႄ မိူဝ်ႈဝၼ်းထိ 17.12.2011 ငဝ်းလၢႆးၵၢၼ်မိူင်း မိူင်းတႆး မိူင်းမၢၼ်ႈသေတိုၵ်းသူၼ်း ပၼ်တၢင်းႁၼ်ထိုင် တႃႇၵူၼ်းၼုမ်ႇႁူမ်ႈၵၼ် ႁဵတ်းသၢင်ႈမိူဝ်းၼႃႈ။

မၼ်းၸဝ်ႈၶႆႈၼႄငဝ်းလၢႆးပိူင် ပဵၼ်ယူႇၼႂ်းလုမ်ႈၾႃႉ ၸဵမ်လွင်ႈၵူၼ်းမိူင်းဢႃႊရပ်ႊၶဝ်လုၵ်ႉႁိုၼ်ႇ ၵူၼ်ႇပင်းပႅတ်ႈ ၸဝ်ႈဢႃႇၼႃႇ ၼႂ်းၵုၼ်ဢႃႊရပ်ႊ လၢႆလၢႆၸိုင်ႈမိူင်းဢိၵ်ႇတင်းလွင်ႈမိူင်းဝႅတ်ႊၼမ်ႊ ၶဝ်ႁဵတ်းႁိုဝ်လႆႈမိူင်းၵွၼ်းၶေႃ ၸဵမ်ၸိူဝ်းၼႆႉလႄႈ ငဝ်းလၢႆးဝၢၼ်ႈမိူင်း ၼႂ်းမိူင်းႁူမ်ႈတုမ်မိူင်းမၢၼ်ႈ ၸဵမ်ငဝ်းလၢႆးၵၢၼ်ဝၢၼ်ႈမိူင်းၼႂ်းမိူင်းတႆး ၸိူဝ်းၼႆႉၵႂႃႇ။

ၵွပ်ႈဝႃႈငဝ်းလၢႆးၵိုင်ႉၵၢင်ႉလႅၵ်ႈလၢႆႈၽႂ်းသေ သမ်ႉလူဝ်ႇလႆႈမေႃထတ်းသၢင် လဵပ်ႈႁဵၼ်း လဵၼ်ႈတူၺ်း၊ ငဝ်းလၢႆးဢမ်ႇၸႂ်ႈၽူႈၶဵၼ် ဢၼ်တေလႆႈၶဵင်ႇတႃႉ ငဝ်းလၢႆးပဵၼ်ဢူၺ်းလီဢၼ်တေလႆႈႁဵတ်းၵေႃႉ (ထုင်း ၵႂၢမ်းၶႄႇ)။ ဢၼ်တေမီးဢဵၼ်မီးႁႅင်းၵႅၼ်ႇၶႅင်သေ ႁဵတ်းသၢင်ႈတႃႇၸိူဝ်ႉၸၢတ်ႈ ဝၢၼ်ႈမိူင်း မိူဝ်းၼႃႈ လႆႈတေႉတေႉ ၵေႃႈပဵၼ်ၵူၼ်းၼုမ်ႇ။

မၼ်းၸဝ်ႈလၢတ်ႈဝႃႈ “ပေႃးဢဝ်ပၢႆးဝူၼ်ႉပုတ်ႉထၸဝ်ႈဝႃႈၸိုင်ၵူၼ်းၼုမ်ႇၵူၺ်းဢၼ်ၸၢင်ႈပဵၼ် ၽြႃးလႆႈ၊ (ပွင်ႇဝႃႈ ပေႃးမီးတၢင်းၶတ်းၸႂ် လွင်ႈလႂ်ၵေႃႈတိုၼ်းပဵၼ်မႃးၸွမ်းလႆႈ) ၵွပ်ႈဝႃႈဢဵၼ် ႁႅင်းတိုၵ်ႉၵႅၼ်ႇၶႅင်လီ ၵူၼ်းထဝ်ႈတႄႉ မီးၸႂ်ၶႂ်ႈႁဵတ်းၵူၺ်း ဢမ်ႇၵႅၼ်ႇၶႅင်မိူၼ်ၵူၼ်းၼုမ်ႇ၊ ၵွပ်ႈဝႃႈ ဢဵၼ်ႁႅင်းဢမ်ႇၵႅၼ်ႇၶႅင်ယဝ်ႉ” ဝႃႈၼႆယဝ်ႉ။

တႃႇတေႁႂ်ႈႁူမ်ႈမိုဝ်းၵၼ်ႁဵတ်းသၢင်ႈလႆႈလီ ၸၢင်ႈၸဵဝ်းထိုင်ယိူင်းမၢႆလႆႈၼၼ်ႉ ဢႃးၸၢၼ်ၶိုၼ်းသႂ် ပၼ်တၢင်းႁၼ် ထိုင် ၼႂ်းပၢင်လႅၵ်ႈလၢႆႈတၢင်းႁူႉၵူၼ်းၼုမ်ႇသေတိုၵ်းသူၼ်းႁႂ်ႈႁဵတ်းၸွမ်းသၢၼ် 5 သၢၼ်။
1. သၢၼ်ၵၼ်တင်းၵူၼ်းဢႃယုယႂ်ႇ
2. သၢၼ်ၵၼ်ၵူၼ်းၼုမ်ႇၼႂ်းမိူင်း-ၼွၵ်ႈမိူင်း
3. သၢၼ်ၵၼ်ၵူၼ်းၼုမ်ႇဝၢၼ်ႈၼွၵ်ႈ-ၼႂ်းဝဵင်း
4. သၢၼ်ၵၼ်ၵူၼ်းၼုမ်ႇတႆးလႄႈၵူၼ်းၼုမ်ႇၸၢဝ်းၶိူဝ်း
5. သၢၼ်ၵၼ်ၸိူဝ်းပဵၼ်မူႇၸုမ်း-ပဵၼ်ပႃႇတီႇ  ၸိူဝ်းၼႆႉယဝ်ႉ။

ဢၼ်လမ်ႇလွင်ႈလၢၵ်ႇလၢႆးထႅင်ႈလွင်ႈၼိုင်ႈၵေႃႈ ၵူၼ်းၼုမ်ႇႁူမ်ႈဢွၵ်ႇသဵင်လဵဝ်ၵၼ်သေ တႅမ်ႈ လိၵ်ႈသူင်ႇ ၸူး ၶွင်ႊသီႊဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ဢၼ်တိုၵ်ႉၸွမ်း ၶၵ်ႉတွၼ်ႈဢုပ်ႇ ဢူဝ်း ၵိုတ်းသိုၵ်း သၢင်ႈလွင်ႈငမ်းယဵၼ် ဢုပ်ႇဢူဝ်းၵၢၼ်မိူင်းဢိၵ်ႇတင်းပႃႇတီႇ မႂ်ႇသုင် ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လႄႈလၢႆမူႇလၢႆၸုမ်းၸိူဝ်းႁဵတ်းၵၢၼ်ပုၼ်ႈ ၸိူဝ်ႉၸၢတ်ႈဝၢၼ်ႈ မိူင်းတႆးယူႇ။

ၸိူင်ႉႁိုဝ်ၵေႃႈလီ ၵၢၼ်ၵူႈၾၢႆႇၾၢႆႇၵူႈပၢႆးပၢႆး ၼင်ႇဢၼ်ၸုမ်းၽ်ႂၸုမ်းမၼ်းဢဝ်မႃးဢုပ်ႇလၢတ်ႈ ဢုပ်ႇ ဢူဝ်းလႅၵ်ႈလၢႆႈ တၢင်းႁူႉၵၼ်ၼႂ်းပၢင်လႅၵ်ႈလၢႆႈတၢင်းႁူႉၵူၼ်းၼုမ်ႇပွၵ်ႈၼႆႉ ၶိုၵ်ႉၶမ်ႇ လမ်ႇလွင်ႈၼင်ႇ ၵၼ်တင်းမူတ်း။ တၢင်းႁဵတ်းလၢၵ်ႇလၢႆၵေႃႈ ယိူင်းဢၢၼ်းသမ်ႉပဵၼ်ဢၼ်လဵဝ် (Common Goal Diverse Action) တီႈလဵဝ်ၵၼ် ၵူၺ်း လႄႈ သင်ၵႆႉပိၼ်ႇပႆႇ ၶဝ်ႈႁႃၵၼ် ယုမ်ႇယမ်ပၼ်ႈၵႅၼ်ႇ ယိူင်း မၢႆဢၼ်လဵဝ်ၵၼ် ႁူမ်ႈသၢၼ် ႁဵတ်းသၢင်ႈၵႂႃႇၸိုင် လႆႈဝႃႈထိုင်ၶၢဝ်းယၢမ်း ၵူၼ်းၼုမ်ႇႁူမ်ႈပွင်သၢင်ႈ ပုၼ်ႈပၢင်ႈၵၢၼ်ၸိူဝ်ႉၸၢတ်ႈ လၢတ်ႈ ႁဵတ်းသၢင်ႈ တူင်ႉၼိုင် ဢၼ်တၵ်းထိုင်ယိူင်းမၢႆလူင်ႁဝ်းဢမ်ႇႁၢင်ႉ။